平安夜自家聖誕餐

 

Merry Christmas！ 祝大家和家人有個喜悅平安嘅聖誕！

每年平安夜都會留喺屋企兩口子撐檯腳。 我煮， 佢洗分工合作越嚟越合拍！ 年紀大咗、經歷多咗； 學懂珍惜所擁有的； 感覺有您在身邊就好； 承諾為您煮到老！

平安夜晚餐：

湯： 蟹肉南瓜蓉濃湯

今年係老公最愛嘅南瓜蓉湯加入鮮蟹肉； 佢負責拆蟹肉， 一路拆一路偷食， 哈哈！

前菜：煎鵝肝配肉桂蘋果蓉、松露黑醋汁

老公平時怕鵝肝羶味； 只食半件鵝肝， 今次我將煮好嘅肉桂蘋果打成蓉； 老公讚減少咗大部份羶味； 佢今次食曬成件呀！

主菜： 牛油黑椒焗龍蝦尾、燒汁牛扒

本來想買急凍龍蝦尾； 但丁屎咁大都要＄80幾蚊一隻；師奶仔性格就去街市用同樣價錢買咗兩隻瞓覺龍蝦自己將佢分體； 果然鮮甜爽口得多； 剩下龍蝦頭今日做下午茶； 即刻覺得抵曬。

甜品： 朱古力心太軟、呍呢嗱雪糕

呢個冰火配搭冬天最啱啦； 老公食咗一份半， 哈哈！

蟹子花枝炸蟹鉗(圖文食譜)

 蟹子花枝炸蟹鉗

冬至快到喇！ Owenmama x Mozala HK提供呢個易做、好味嘅美味菜式啦。   今次仲加入咗卜卜脆嘅蟹子； 口感更豐富！   外層炸到金黃香脆；賣相超靚仔， 食過嘅朋友都話同酒樓出品無異， 誠意推介！！

蟹子花枝炸蟹鉗

材料(3件份量)：

急凍二本爪蟹鉗3隻

墨魚膠150克

蟹籽1茶匙

粗粒日式麵包糠適量

萬歲粟米油適量

泰式雞醬適量

 
 

1/ 墨魚膠加入1茶匙蟹仔攪拌均勻

2/ 二本爪蟹鉗解凍, 用廚紙輕力吸乾蟹肉的水分
 
3/ 手心沾少許水（可免墨魚膠黏手）, 取約50克墨魚膠放掌心； 按扁後放上蟹鉗
  

4/ 用墨魚膠包裹蟹鉗(由蟹鉗可活動的下端開包裹)； 封口後再搓成橢圓形狀
 
5/ 在蟹鉗表面均勻沾上日式粗粒麵包糠; 此時可再調整造型
 

6/ 中火燒熱適量萬歲粟米油; 轉慢火後下蟹鉗， 炸至微微金黃色
  (用較小的煲有助減少用油量)
 
7/ 轉中火逼出蟹鉗內多餘油份及炸至金黃
 
8/ 放在廚紙上吸去表面油份便可趁熱以配以泰式雞醬享用

#MazolaHK   #Owenmama簡易菜式  #簡易菜式  #我都識煮酒樓菜

芥蘭兩吃 （冰鎮芥蘭莖 + 鹹魚蓉炒芥蘭葉） **雙食譜**

呢個時候芥蘭最當造； 見顏色翠綠又粗又嫩就買咗斤幾， 請客就做冰鎮芥蘭莖；爽脆香甜,  用Washabi 同魚生醬油佐食風味一絕呀！ 第二晚就用鹹魚蓉炒菜葉， 惹味送得飯; 一D都無浪費㗎！

食譜： 

冰鎮(凍吃)

1/ 燒熱水下糖／鹽各 1/4茶匙； 水滾後下菜莖煮1分半鐘

2/ 撈起即浸冰水中至冷卻;  撈起放雪櫃冷藏2小時便可以Washabi 同魚生醬油佐食

Tips:  最緊要係熟度拿捏； 我只將芥蘭莖煮至8成熟便要撈起浸冰水； 如煮過熟就失去爽脆口感。  用Washabi 同魚生醬油佐食風味一絕呀！

鹹魚蓉炒芥蘭

1／鹹魚半件先用水稍為沖洗； 抹乾後切成蓉備用 /  準備薑／蒜粒

2／ 燒熱油2湯匙油下鹹魚蓉； 薑蒜粒同爆香

3／ 下菜葉， 小許糖及2湯匙燒酒大火兜炒至菜熟透便可上碟

Tips: 今次大蓋炒了12兩菜葉； 半件鹹魚蓉便足夠鹹； 下小許砂糖可中和鹹味。 

豉椒炒蜆 **食譜**

豉椒炒蜆

Owenmama係為食鬼， 發夢都掛住食嘢。 上星期六晚就夢到同家人喺大排檔食炒蜆喇。 第二日就立即去樓下街市買咗斤半鮮蜆肥美無沙； 落埋之前用剩的彩椒； 做咗呢個惹味又送得飯嘅豉椒炒蜆喇。 今次夢想成真喇。。。。。

食譜

材料: 
鮮蜆1.5斤
辣椒粒隨意
蒜粒1湯匙
豆豉2湯匙
辣椒粒隨意
彩椒片隨意（可免）

調味：
蠔油2湯匙
生抽1湯匙
砂糖1湯匙
水2湯匙
(以上先調勻)
生粉水適量 (後下)
**（不同品牌的調味料鹹味有別， 請自行試味及微調）

1/ 鮮蜆用鹽水浸半小時； 洗淨

2/ 豆豉用水浸10分鐘；倒去水份備用

23/ 燒熱油； 下蒜粒和豆豉爆香； 用鑊剷將部份豆豉壓散 (豆豉會更易出味）

4/ 下辣椒粒爆香

5/ 下鮮蜆兜炒至蜆隻開始開口; 調味下兜炒至蜆全熟 

（蜆開口後會流出些蜆汁；故調味中的水份不要太多）

6/ 下彩椒片兜炒

7/  試味及作最後調味後下適量生粉水埋芡便可上碟

    (因蜆開口時流出的蜆汁會帶些鹹味；所以要試味呀！)

【香辣金不換炒蜆】🌟（食譜）🌟

材料： 
鮮蜆1斤
金不換葉2棵
蒜粒1湯匙
辣椒粒隨意
甜椒片適量

調味： 
豆瓣醬1.5湯匙
蠔油1湯匙
生抽1茶匙
砂糖1.5茶匙
水70毫升
生粉水適量

步驟： 

1/  鮮蜆放碗中； 加入水及鹽、攪勻後浸30分鐘， 讓蜆吐出沙粒及污物

2/ 倒去污水； 把蜆沖洗數次同時用手把蜆搓洗乾淨； 再瀝乾備用。

3/  煮滾一鍋水； 把蜆放進，煮至蜆剛開口立即撈起； 瀝乾備用 

4/ 待蜆稍涼後把沒連著蜆肉的半殼去掉

5/ 把金不換葉撕出備用;  把調味料內的水／糖／蠔油及生抽調勻備用

6/ 燒熱2湯匙油； 下蒜蓉、豆瓣醬及辣椒粒爆香（辣椒可按喜好加／減）

7/ 蜆回鑊兜炒； 再下調味料兜勻

8/  下甜紅椒片及半份金不換葉兜炒均勻； 試味

9/ 投進餘下的半份金不換葉; 同時加入適量生粉水兜炒至汁料微稠便可上碟。