My Baking Corner - Gierre

多謝老公出錢出力，為我打造嘅baking corner，因為個爐太大，要將原先廚櫃ｏ既擋板同燈罩拆去先至放得落，　仲要做埋清理，老公琴日為左佢忙左一日，我真係好多謝佢。

以後一次可以焗多盤brownies，蛋糕， 各朋友，同事們，等食啦！

今晚返去會試下開爐，希望以後同佢合作愉快喇。

Goodbye and Thankyou

 "爐生" 告別作 - 朱古力忌廉蛋糕

 

今日我要告別幫左我５年ｏ既好幫手，佢係我ｄ朋友５年前送比我ｏ既生日禮物，佢幫我焗左好多個成功ｏ既蛋糕，火力有足又均勻，不過今日之後佢將要退役喇。　收埋佢之前忍唔住要用多佢一次，作最後敬禮。　

今次應Owen要求整左ｏ個朱古力蛋糕。　你地睇下佢真係仲好Work 架。  我會睇下邊位親戚會接收佢，等佢可以繼續發熱，發光。


Goodbye and Thankyou!

"爐生"真面目

Homemade Pizza

夏天最好就係整Pizza，天氣咁熱，麵團發酵會好順利，加有Kitchen Aid幫手，一個鐘多ｄ就有熱辣辣o既Pizza 食。 自己整一來平，二來自己鐘意食乜就放乜，真係唔錯架。　　

麵團材料：

高筋粉100g
酵母 1/2茶匙 (加30g暖水，1/2茶匙砂糖預先發酵至起泡備用)
水40g
砂糖 3/4茶匙
幼鹽 1/2 茶匙
油5g

-所有材料攪成麵團 - 先用中速混合材料成麵團，用手感覺麵團濕度，standby 小許粉 / 水 調節麵團濕度，太黏加小許粉，太乾則加小許水，最後再用個速打約5分鐘成麵團
-深碗掃薄油，麵團置碗內，用保鮮膜蓋好，放溫暖處發酵至兩倍大 (我用左約45分鐘)
-取出麵團，用手略搓排氣，桿成薄塊，越薄越好，用叉再麵團上均勻地刺上小孔，掃上千島醬，灑上其他材料，最後放芝士
-放入已預熱20分鐘，200度的焗爐，用最低架位焗20-25分鐘便可。

**麵團要薄和不要太貪心，放太多料會令麵團潮濕，個底會較難熟

簡單的一餐 - 豉油皇炒麵

上星期六老公有飯局，剩底我同Owen, 兩個人煮飯又唔係，又唔想出街食，兩母子食完午飯就去左遊街市搵”煮意”，　行經麵點見到ｄ麵餅，Owen 問：　媽咪，你識唔識炒麵？　咁即係佢想食啦。　無問題，雖然未炒過，但係應該係easy job。    完來兩個生麵餅可以炒到好大好大碟炒麵架，炒到我手軟，整多幾次我諗連拜拜肉都收埋呀，哈哈。

做法：

1) 生麵兩個，
-出水（滾水落，用筷子弄散　一散開即離鑊，浸冷水。冷卻後瀝乾水備用）
-用較剪剪數下，麵條過長會很難跟配料混合

2)配料切絲(無特定配料，隨喜好加乜都得)
-如下菜類就要先炒熟備用

3) 燒熱易潔鑊，加小許油，先爆香洋蔥，再下麵條兜炒至麵全熱，
下配料，及適量炒麵豉油兜炒至全部材料混合，麵乾身便可上碟。

**豉油不而過多，太濕/太黑都不好。
**姿整d就可以好似我咁煎一片蛋皮切絲裝飾，如果灑上炒香左o既芝麻就更香口啦。

自家忌廉磨菇湯

本來買左磨菇要黎試整Beef Wellington，但係忘記左一早醃左隻春雞，都係要用焗爐焗，一爐不能同時焗兩味，所以去後犧牲左牛柳，冰住先下星期再整。
剩返ｄ磨菇唔留得，就整忌廉磨菇湯好了。  200g磨菇整左兩-三人份量ｏ既忌廉湯，好濃，好香，好好味呀。

磨菇切粒幼粒

 用牛油炒至乾身
 炒到咁就得喇。 (我留左小小唔打瀾，最後放落湯到，得佢有d咬口)

加半碗雞湯用攪拌器打爛，放入煲內煮沸，加入半碗雞湯，半碗脫脂奶，半碗忌廉，加鹽，黑椒調味，最後用適量麵粉開水埋薄芡就得喇。