栗子雙生兒

 

 

過去的星期六/日，分別為大伯同家姐慶生，佢兩個都係栗子蛋糕迷，我就買左一大罐甜栗子蓉，分別做兩個蛋糕比佢地。

大伯向來腸胃唔多好，同埋星期六得四個人，所以我選左做個小卷蛋比佢，同時卷蛋可以用小d忌廉。   原來想唧得d栗子條靚一d都唔容易要好用力同埋會一路唧一路斷，不過味道又真係好好o既。

星期日一家齊晒共12人，要整個大蛋糕先夠，其實係換煲不換藥，材料完全一樣，只係形狀唔同，仲有就係家姐超愛栗子，三層內蛋糕上都舖滿栗子，佢好喜歡呀。

星期日整蛋糕加埋12人的飯菜，一早忙到夜晚，但係真係過足癮呀。


o個晚成檯都係餸, 但係食到一半，老公去添湯先發現焗爐面仲有一大碟蝦醬炒通菜，拿拿林拎埋出黎，好菜咋，唔係就浪費晒啦。  抵老公話我大頭蝦架。

芝士肉醬意粉

呢個係兩個星期前整o既，老公返中更，我同Owen都會整簡單晚餐或者係出街食就算，上次Owen忽然話想食肉醬意粉，我放工就去吉之島買料，因為只得兩個人，我無買到茄糕，因為只用小小費事浪費，只係用左茄汁同糖調味，不過都用左細半枝茄汁至夠。

做法好簡單：

燒熱油下洋蔥粒爆至半熟(1個，小的)，下蕃茄粒(1個，中形)，炒至出水份，下肉碎12兩(牛/豬/雞均可)炒至9成熟，下茄汁，糖調味。

(煮肉醬時，另一爐頭同時煮意粉）

將剛煮熟的意粉撈梢為瀝乾水粉，立即直接放入肉醬內（不要過冷河），讓意粉沾上肉汁便可上碟。　最後襯熱灑上芝士碎便可。

＊＊煮肉醬時不可太乾，否則放意粉後會更乾。　
＊＊意粉不要過熟，否則太淋不好吃。



加個煙肉炒露荀，呢個係就我同Owen的晚餐喇。　　

 

木糠布丁 + 囍宴

除左New York cheese cake, 另一個最受朋友同同事們歡迎o既就係木糠布丁了。  之前部門同事補請我去囍宴食生日飯，我就整左呢個黎做回禮喇。
佢地個個都好鐘意，仲有兩個同事問我拎食譜，佢地都想自己o係屋企試整下。

做呢個甜品我每次整都係用麥維他，因為我試過一次用瑪莉柄餅，但我覺得口味太淡，同質感太鬆散，用麥維他味道會豐富d(純屬個人觀點)，所以之後我每次都係用麥維他整，雖然唔正宗，但大家對我呢個版本都好受落呀。 

講返餐生日飯，囍宴o係太古城其實開左好耐，但係呢次都係第一次試，d菜式好味之外，難得賣相同Menu張相係幾乎一模一樣，真係色，香，味俱全，加上價錢真係好合理，唔怪得門口成日都有大班人等位。　我得閒一定會帶老公Owen去試下，佢地實會鐘意。

Super Easy - 蝦醬通菜

夏天最當造嘅通菜，用蝦醬或椒絲腐乳炒都好惹味，又好送飯，有時得我一個人食飯，就咁炒碟通菜加半碗飯又可以係一餐，既好清腸胃又好味。

想炒出好味的蝦醬通菜好簡單， 只要起鑊將薑絲，蒜粒炒一會，下蝦醬兩茶匙爆香，下通菜（1斤），雞粉一茶匙，花雕小許（菜會出水，不要下太多），炒至菜剛熟，再用小許生粉水令汁料稍稍變杰，便可上碟。 （下小許辣椒絲更惹味） 

Owen暑期工@初體驗

上星期，Owen一連七日去左親戚再旺角開的水草店做暑期工，工時由每日11-9, 做足十個鐘，而且生意好好，日日都無停手。

每日佢早想要同ｄ姨姨一齊將ｄ蝦仔入袋比人選購，然後在袋上寫價錢，跟住招呼客人，撈魚仔，收錢........總之乜都要幫手，就連收舖拉閘佢都有幫手。

經過呢幾日佢開始知到搵食唔係佢想像中咁容易，要付出好多先有糧出。  我初時都擔心佢返兩日就話頂唔順，但係佢又頂到喎。 見佢頭兩日放工返黎，札袋札到兩隻手指都紅腫左，個心都好赤，不過我地兩個都無開口問佢，淨係吼佢訓左我地先至講。    始終男仔係要捱下先得架。

星期六我地去左突擊談訪佢同接佢晚飯，見到佢做野o既實際情況， 真係好忙，奇嫂同d姨姨對佢都非常nice, 重猛咁讚佢幫得手，又捱得喎。 我地兩個聽到都老懷安慰。

星期日係佢last day + pay day, 佢一放工返黎，就將幾份錢放o係檯面，話出糧比我(20%)，公公，婆婆(20%)同舅父(10%)喎，之前佢講過，我仲以為佢齋講，完來係真，雖然得好少錢，但係我地都好心甜呀。

聽日係OWEN最後一日返工，多謝奇嫂同各為姨姨同哥哥對佢嘅教導同容忍，令呢個特訓順利完成：） 

 

比佢發現到我突擊佢添＞-＜

 

Owen 出品同專業姨姨出品，一眼就分得出，姨姨ｏ個ｄ脹卜卜，佢紮ｏ個ｄ就............,hehe.....

 

9點，夠鐘收舖，準備收返ｄ魚仔，放返落魚缸

 

呢ｄ魚仔同水草，Owen都有幫手紮架。  要分類收返。

 

拉閘都係佢幫手，佢覺得好好玩咁呀。
















呢d就係Owen 第一次比我地o既"家用" 喇。

Owen的大碗餐

 Owen 終於完成佢o既暑假特訓，呢7晚，晚都係自己食大碗飯，或許係食壽司，或外賣， 不過睇黎佢最enjoy d大碗飯，其中牛肉飯仲要encore添，不過我雖然食材一樣，我用左唔同醬汁去做，咁就唔會咁悶喇。 不過每日做足10個鐘，返到屋企都好肚餓同好攰，我諗啦就算淨比白飯佢都覺得好味架。  

 呢個係最後一晚Owen要求encore的牛肉飯，今次用左現成日式燒肉汁，仲加左隻糖心水煮蛋，Owen話呢碗最好味喎

 
中間隔左餐烏冬，本來係雲吞+丸丸，但係懵豬媽咪買雲吞，比左錢唔記得拎雲吞，所以就用午餐肉代替喇。











吉野牛肉飯，用左親子飯o既汁料，只係加左豉油，同減左d糖o既比例，因為呢個汁係唔會好似親子飯咁甜架。

Owen 的大碗飯 - 親子丼

呢幾日我地安排咗OWEN去親戚的水草店做7日暑期工，等佢體驗現實，每日11至9，都好辛苦，呢兩晚為佢整咗簡單嘅大碗飯，等佢放工返嚟食, 等佢又啲心理補償。 本來想買枝現成親子飯汁黎做，就更簡單，點知賣晒，唯有自己較啦，不過都好簡單o既。

佢返到黎都差唔多10點先有晚飯食，話好佢係負責將ｄ水草入袋同買按客人order撈魚仔，因為旺角人流多，除左食飯時間係無得休息，都幾攰，一口氣食左兩大碗飯添。    而家的90後都係衣來申手，飯來張口，希望佢經過呢7日勞動，會令佢真係知到大人搵錢一ｄ都唔容易，要收穫要先付出，要珍惜而家所擁有ｏ既野。

材料：　

二人份量：

-去皮雞睥肉兩塊，切件，用1/2茶匙鹽醃半小時備用
-洋蔥一個，切粗絲
-蛋2隻 (打勻備用)

汁料：

-味淋((日式料理酒)2湯匙，水1湯匙，生抽2湯匙，糖1.5-2茶匙


1)　下油燒熱，轉細火下洋蔥爆一會，下雞肉炒至９成熟
２）下汁料煮至滾起，確保雞肉熟透，下蛋液，輕輕炒至蛋剛熟便成。

Happy Happy Birthday

 

多謝各位的祝福，仲有各好同事，好隣居，雀友+darling同老公送的各式生日餅，我過了一個super sweet 的生日，I really luv u all !!!! Muah xxxxxx

今年的生日喺泰國芭堤雅渡過，好開心，今年老公同OWEN送咗個泰式香蕉    比我做生一蛋糕，但係返到酒店發現佢哋派人放咗個蛋糕同蠟燭喺度，真係好貼心啊！ 本來已經食都好飽，結果個蛋糕都要流返第二日先食度。

好多年無去過芭堤雅喇，今次揀咗呢間 Centara Grand Mirage，因為泳池超大，成個水上樂園咁，啱哂老公同OWEN玩餐飽。  原來佢仲學埋Club Med 咁，每日有三，四樣免費集體活動比住客，好似水中 Aerobic, 水中手球，排球，攀石，沙灘足球等等，成班住客玩埋一齊，好快又一日。


View from our room - Soooooo nice

蘋果提子Muffin （食譜)

你地睇，雖然只係用o左一個蘋果，但係8個鬆餅，個個都超多蘋果架,(當然有我全家o既"飛佛" - 提子啦)，我仲落o左d肉桂粉黎炒蘋果，真係超香呀!!   剛焗起食o左一個，外面脆，裡面鬆，真係好好味呀!!

整埋餅，上埋blog 都係10點半咋，好彩老公仲有一個鐘就返喇，haha.....

材料 - 8個(2.5吋紙模)份量：

餡：

大青蘋果 1個切小粒      糖1.5湯匙    檸檬汁１湯匙   玉桂粉 小許 (可省掉)

-蘋果粒加檸汁和糖炒至乾水，加小許玉桂粉拌勻

-提子乾用小許水浸軟，再瀝乾水份備用

鬆餅：

牛油 75g     糖 75g    蛋 1.5隻    牛奶75ml    泡打粉 1/2茶匙  蘇打粉1/2茶匙

鹽小許        低粉150g

-牛油室溫放軟加糖打至順滑， 加入蛋汁打勻

-加入牛奶，小許鹽

-加入已篩粉類拌勻，最後加入蘋果粒及提子

-用唧袋唧進模內，180度焗約15分鐘至金黃。