平安夜自煮

一連玩左幾日，今日先有時間上Blog,  希望大家同家人都過左個甜蜜開心o既聖誕。  今年平安夜同舊年一樣，我同老公老留o係屋企撐檯腳，Owen照舊同朋友仔去玩。 唯一唔同o既係我公司今年無得放早，要返足全日，所以今年無時間好似舊年咁整咁多度菜。   我只係買左d現成材料堆堆砌砌，整係住菜真係要落手煮，不過同老公一齊煮，一齊食，真係比出街食溫暖好多呀。


下面就係我地o既菜單：

今日o既第一道頭盤，係暖盤，將日本豆腐蒸熱攤至微暖 (夏天凍食仲好，不過今日好凍，唔想個個頭盤都凍冰冰)，放上加拿大海膽同魚子，淋鰹魚汁，就成為呢個咁高貴，又好味o既前菜喇。老公勁讚好味呀。   

要讚吉之島而家有兩人份量既海膽賣，$88四大件唔太多，兩人食剛好呀。

第二道前菜，煙三文魚沙律，呢味係臨時加o既，係Vendor送來的禮物，同事們送左比我，係酒店貨色，好甘香肥美呀。

法國麵包蟹，解凍就食得，d膏ok，不過肉就好鞋, 下次都係食返加拿大蟹好d

主菜 - A5和牛加焗薯，煎牛扒我諗個個都食，不如講下個焗薯。 預先將薯仔掃油灑鹽，放入焗爐180度焗約一個鐘，之後攤一會，切開頂部，淋上用沙律醬+煉奶混合的汁，灑上炸煙肉粒，就成為呢個連皮都食得o既脆皮焗薯喇。 

o個日咁凍，食心太軟就最o岩喇。

煎釀豆腐

 我同老公最近呢一兩年都愛上食豆腐，不過只限盒裝o個隻，我地都知佢o既豆香同營養價值及唔上板豆腐，但係就獨愛佢滑嘟嘟，入口即溶ｏ既口感。

平時會釀墨魚滑蒸，做涼拌，又或者用雞粒扒，今次就第一次用黎釀豬肉煎，豬肉煎到香脆，豆腐滑滑，架埋個蠔油芡, 好送得飯呀。

上圖係一人份量，Owen食完自己ｏ個份都好似唔係好夠喉，不過我同爸爸每人四件都係o岩o岩夠，所以Sorry, 無人肯割愛呀!  


做法：

-碎豬肉用生抽，糖，豆粉醃一會，用力撻幾下，備用，
-豆腐2盒，脫盒，於室溫中放1小時 (待水份全流出)，切成片狀，到去水份，用廚紙抹乾表面，撒小許生份，
-用小刀釀上豬肉
-在平底易潔鑊灑一層薄薄的油，把豆腐排上 (有豬肉一面向下)，排好才開火
-煎至豬肉全熟，面微焦(中途不要移動豆腐)， 小心地把豆腐反轉，煎另一面。

-輕經把煎好的豆腐上碟, 灑蔥花。

-雞糖半杯，加蠔油，生抽，砂糖調味，煮沸，以生粉水埋薄芡, 淋在豆腐上便可上桌。

＊＊今次只係`左小量豬肉，所以乜都無加，亦只係用左好簡單o既調味料，不過我專登架左多小小豉油，令d豬肉煎起上黎有鹹香，配起豆腐好合拍架。

久違了的美味 - 梅子炆鴨

 

今日做左梅子麵豉炆鴨，酸酸甜甜好開胃, 係老媽以前的拿手菜，因為花時間，媽媽年紀大無耐性煮，所以好多年冇整過，今次由我做，重溫返兒時食過的味道，第一次煮，老爸老媽都話好好味，夠香濃，又好懷舊，感覺很窩心! 

今次我用左兩種麵豉，因此淺色的有豆，味較淡，但係我鐘意個汁有d豆，會靚d，所以加埋佢，呢兩個醬o既組合好成功，結果個汁真係好得。

食譜：

材料： 急凍光鴨一隻 / 乾蔥約10粒 (橫切成厚片)

調味料 ：梅子4粒 （搾爛）/ 有豆麵醬1.5湯匙 (較淡口) / 黑麵醬2.5湯匙 (較濃味) / 老抽2湯匙（加色用）/ 冰糖約3大粒 (如乒乓球大小）(糖份請按個人口味調較)

鴨解凍，秣乾內外，用適量老抽搽勻鴨身，待20分鐘至上色。 

 

用意潔鑊下兩湯匙油，爆香乾蔥，下鴨，均勻地爆至金黃色。

 

 

 

爆完用廚紙將鑊內的油吸去 (我經常用呢個方法煎雞或三文魚，可以去左多餘油份)

 

加適量水蓋過半隻鴨(我用左約700ml)，使鴨胸向下，煮滾汁料，蓋上蓋，轉細火煮15分鐘,  反轉鴨炆25分鐘(呢個時候d汁會有好多鴨油，要用隔油網撈起，唔係炆好隻鴨會好油)，再反轉胸向下最後炆25分鐘。 (炆的時間也視乎鴨的大小調節)

炆好就係咁樣架喇。 　　

＊＊如鴨已淋但汁太多再開中火，將汁略收及作最後調味。  鴨上碟，稍為攤涼才斬件，大熱斬鴨肉會散的。

初試 Madeleines

從未食過Madeleine, 第一次食，係上次去Liberty Private Works 最後一道小甜品，佢做得好細粒，上碟後仲係暖暖地，不太甜，好香，好好味。　我同老公都好有印像。　最近去烘焙店入貨見都有矽膠模賣，仲好平$28一塊，就買左兩塊返屋企玩。

我今次用左半份 Openrice 的 Madeleines食譜，可以做6件 （我只係加左小小檸檬汁），做法超簡單，全程唔駛用機幫手，好輕鬆

就做到喇。我見屋企有快將過期o既杏仁片，加左香脆口感，唔錯呀。 　美中不足就用矽膠模d貝殼紋唔明顯，影響左賣相。

老公返中班，佢一開門入黎就知有宵夜食(因為一出 lift 就聞到香味)，佢一口氣食左5件半(因為有半件我食左試味)，真係好胃口。

呢個就係我地o係Liberty Private Works食的超迷你Madeleines.

 

Owenmama 的大糯米雞 （附食譜)

大多數o既星期六，我同老公都會一齊食早餐，好多時都會去大快活。　　因為佢平日返工都係食西早，所以星期六佢成日都想食糯米雞，但去親都已經沽清。　見佢咁恨食，星期六我地無去街，就去買料整比佢食。

老公好滿意，佢話雖然只有雞同臘腸做餡，清清仲o岩佢。 其實只因我初次試整，連冬菇蝦米都無落，求求祈祈，就算衰左都唔駛徙咁多料

其實功夫都唔少，都用左個幾鐘先整到個出面廿多蚊o既糯米雞，自己買料都差唔多價錢，但係都係o個句： 我很enjoy.

因為我初整唔知分量，今次整左隻6吋勁大的糯米雞，亦可份成小份，做兩隻小型的。


食譜：

糯米約5兩　（用水浸兩小時）

急凍雞胸柳2小條 (切粒用小1/2茶匙糖，3/4茶匙生抽醃好備用)

臘腸 半條 (先蒸10分鐘，切斜片備用)

乾荷葉一片(要選無缺的，先用滾水煮5分鐘

至軟身，瀝乾水備用)

芡汁： 蠔油3茶匙，糖3茶匙，雞粉1茶匙，生抽2茶匙，水4湯匙 ，麻油小許(隨意)，生粉水適量  (蠔油同生抽唔同牌子鹹味不一，記緊要試味再調節呀)

做法 ：

-浸好的糯米放在舖好魚湯袋的蒸籠上蒸約15分鐘至飯約8,9成熟 (中途用唧壺噴小許水在米上，再用筷子把米攪鬆，再蒸)，之後離鑊用糖3/4茶匙，鹽1/2茶匙撈勻，令飯有點味，蓋上蒸籠蓋備用。

-用小許油起鑊，炒熟雞柳，下芡汁，用生粉水埋芡，記緊芡要較杰，要有點似漿糊狀，否則包餡時糯米會浸濕，所以生粉水要一路煮一路加止杰，盛起被用。

-在瀝乾的荷葉上薄薄的掃小許油，放一層糯米飯，舖上雞粒芡 (先舖好雞粒，再在上倒放適量芡漿，如有多的可棄掉)，再舖上臘腸片，最後在上面再蓋上餘下的糯米飯

-最後把荷葉包好成糯米雞。

-食之前隔水蒸20分鐘，便成為美味又熱辣辣o既糯米雞喇。