韓國行

21號晚同老公搭夜機去左首爾玩4日, 呢4日, 只係去左幾個景點, 其餘時間都係喪食同喪買.  攪到對腳同個肚都好累.   返到香港真係要好好管理下體重, 吾係好快會變大肥師奶.

仁寺洞 art street

鷺粱津巨蟹 - 咁啱有幾個朋友嗰幾日都喺首爾, 就約埋一齊去, 多人可以食多D嘢呀.

咁大隻蟹先賣6百幾,超好肉,正呀.

 南山塔, 情人瑣

景福宮

羌虎東烤肉, 豬五花好味, 其他好一般.

2人餐約HK$400

 鷺粱津

多款海鮮, 連工包料 + 飲品約HK$300一位. 

宮廷宴, 超多道菜, 好睇又好味.
(公司請, 免費)

明洞韓國烤肉, 又係豬比牛好.
但係生牛肉就吾差喎. 

2人餐, 好豐富,HK$500














醬油蟹, 係生食的, 初初我都有D抗拒, 但息落口又OK喎. 尤其個蟹膏飯超級好味.

但都吾平, 前菜, 每人一隻蟹, 一個海鮮堝share, 一個蟹膏飯share, 加兩個白飯 (個蒸蛋免費), 每人HK$350.

 部隊堝, 好辣呀. HK$100, 兩位份量.

 景福宮小路小Cafe, waffle超好味, 但呢個餐HK$150, 好貴下.

首爾人氣沙冰, HK$63, 都吾平, 但行到熱辣辣, 透心涼㗎.

金華麒麟雞

今朝起身去斟水飲，忽然發覺雪櫃面有一盒冬菇， 見佢呢幾個月一路原封不動
 橫豎屋企人今晚o黎食飯,  忽發其想諗起整金華火腿麒麟雞片比佢哋試下.    呢味餸吾太難做, 不過就要花d心機砌得靚靚哋.

我一拎碟雞出黎，屋企人就嘩一聲話呢味係酒樓菜黎喎，老父最喜歡, 佢話夠懷舊喎，見佢哋邊食邊讚，我好開心阿。
 
食譜: 

1) 4隻新鮮雞脾去皮, 起骨切成片醃最少一小時
     醃料(用糖，生抽，紹興酒，生粉，油)

2) 金華火腿切薄片，用水浸1分鐘，以免大鹹，再抹乾待用
(火腿要買原隻切件的那種(見下圖, 好似一條肉的), 否則一切便會散.

3) 冬菇隔夜用凍水浸軟, 搾乾, 切斜片, 用小許砂糖, 油拌勻備用

4) 順序：雞片 - 火腿 - 冬菇排好

5) 蒸約15分鐘至熟透

6) 把碟上的汁倒起，加小許雞湯，胡椒粉，麻油和鹽調味，最後用生粉埋薄身琉 
    璃芡淋上即成。

五柳鯇魚腩

鯇魚腩6件 (請魚檔代切成粗條)
醃料: 生抽1湯匙,   糖1茶匙, 紹酒1/2湯匙
另外用一大碟倒入數湯匙生粉備用


汁料: 

 五柳1份 (一小袋的, 雜貨店又售) / 茄汁3湯匙 / 白醋3湯匙 / 水5湯匙
片糖1/3片
生粉水適量


1) 魚腩洗淨, 抹乾, 用醃料醃半小時備用
2) 用一大碟倒入數湯匙生粉備用, 魚囡平均地沾上生粉, 用易潔鑊慢火半煎炸至熟透, 轉大火迫出多餘油份, 至微焦香脆便可離鑊, 吸乾放碟上
3) 將五柳 / 茄汁 / 白醋 / 水混合,  易潔鑊加1湯匙油, 下汁料及片糖慢火煮至片糖溶化, 試味, 此時可加糖或醋較至合自己的酸舔度, 最後下生粉水埋簿芡, 將芡汁淋在魚柳上便完成.

西瓜涼粉椰汁西米撈 (附西米處理法)

上星期同同事去筲箕灣越華會食飯，跟住走行去買六合彩，經過豆腐檔，見到一舊舊涼粉排晒o係度，Joyce 就話要食涼粉，天氣咁熱，確係一個好提議。  星期日無野做，就開工整，星期一拎翻公司比佢地食。　諗o下齋食涼粉好悶，就決定整個椰汁西米露，涼粉另上，等佢地可以各適其式啦。

成件試除左處理西米要多少少時間，其餘真係無難度。
o個晚跟係比老公同阿B食左先啦。 佢地鐘意西米，我就留左一碗淨西米撈比佢地食，仲加埋超甜西瓜粒，當然超正喇。

 

西米處理法：

煲滾水後落西米，蓋上煲蓋，煲到大半透明 (剩返一點點好細的白點)，就熄火，再焗到完全透明，撈起過冷河至完全冷卻。　之後我會再用水浸住佢再放係雪櫃雪1-2個小時(呢個時候佢仲會索小小水，所以要用多d水浸)，等佢索飽水就可以放入椰汁內，咁樣雪兩三日都唔會再發大架啦。

洋蔥圈 (附食譜)

其實呢個係舊年整o既舊作，不過我前幾日舖左炸魷魚圈之後，好多網友都問洋蔥圈的食譜，而加同大家分享o下。
炸漿：
1) 麵粉  45g 　泡打粉半茶匙　吉士粉１茶匙 　鹽小許
2) 水 60ml
－把全部才料（１）加水拌勻(一面加一面攪，不要心急)，放雪櫃雪30分鐘備用
－洋蔥切圈，先醮乾麵粉，再上炸漿 (要均勻)
－中火炸至金黃便可。
**吉士粉作用係令顏色金黃d，如無可省去，可再麵粉份量+5g就得
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
呢個魷魚圈係用中式面包糠（超細粒）整ｏ既，都係最近用日式中粒麵包糠整靚好多，係咪。

紅莓汁香煎豬柳配番薯及四季豆 (點煮網 x Secret Ingredient)

多謝點煮網 x Secret Ingredient 邀請，用佢地今日提供嘅新鮮食材, 連油料同調味料都齊哂，只要你屋企有爐同鑊，只要按食材上英文字母遂樣烹調，果然好快就煮到一客兩份嘅美味西餐。 如果要OT又想食餐好，呢個係吾錯嘅選擇。

今次我揀左做"紅莓汁香煎豬柳配番薯及四季豆＂　　豬柳好軟熟,　配紅莓汁係絕配，so yum!

薯蓉同南瓜蓉食得多,　番薯蓉係第一次食,　古吾到幾好味喎．　十分鐘就做好.　
由於仔仔吾太愛番薯，我加左一小杯炒飯比佢，但我很喜歡番薯蓉，，不用加飯都夠哂飽。

今日至5月18日，如果你地有興趣試secret ingredient 嘅餐品，要要在網上落單時輸入discount code : owenmama  就可以即時有$60折扣了。

食材好靚，　仲有晒Label, 只要按食譜,　跟上面英文字母遂樣烹調，　新手都無難度.

薯蓉同南瓜蓉食得多,　番薯蓉係第一次食,　古吾到幾好味喎．　十分鐘就做好.　

由於仔仔吾太愛番薯，我加左一小杯炒飯比佢，但我很喜歡番薯蓉，不用加飯都夠哂飽。

 豬柳好鮮嫩,　跟食譜煎封,　再用錫箔紙焗就得.　（其中一件豬柳超大件，　我將烹調時間加長左）

最後煮埋豆，　加熱紅莓食就OＫ．　

熱辣辣 - 西米布甸

老公元誕要返特別更，.我就要倍Owen溫習，雖然佢已經大個，我已經幫唔到佢溫書，但o係到倍下佢比d支持佢都好o既。 仲可以全日煲劇添。
到7點半老公都未收得公，我就煮左d烏冬同Owen食，跟住就諗住整個暖笠笠o既甜品比老公返黎做宵夜。

冰箱有蓮蓉，話咁快就整左幾個西米布甸，凍冰冰o既元誕夜食個熱辣辣o既布甸，一定暖晒。   一個份量整到5杯，連隔離屋o既小朋友都受惠埋，一齊有個暖暖甜甜o既元誕夜呀。唯一無o既就係牛油，之前整Brownies比Owen 開Party用晒唔記得補貨，所以無落到，但係都ok喎，仲無咁肥膩添呀。

下面有齊 demo video 同食譜, 跟住做無難度呀. 

Demo Videos Links: 

西米布丁 video Part 1

西米布丁 video Part 2

西米布丁video Part 3


食譜: 

材料：

1	西米 40g
2	吉士粉 30g +粟粉 10g ＋50ml水開勻 (或用 吉士粉 40g  + 50ml水開勻 亦可)
3	牛油     30g    糖   40g (按個人口味加減) 水分 200ml (可以係水 + 奶 或 椰汁)
4	蛋 黃1個 (蓮蓉隨意)

做法：
(1) 滾水放入西米，轉最細火煲5分鐘，熄火，焗至半透明、過冷河，隔水備用
(2) 吉士粉+粟粉用50ml水開勻
(3) 材料(3)加入加熱至牛油同糖溶化
(4) 逐少加入(2)吉士粉水，邊煮邊快手攪勻，免結成小塊，再加入西米攪至杰身
(5) 熄火加入蛋黃(4)攪勻，入模

*倒一層薄的布丁漿入模，加入蓮蓉，再倒入一層較厚的布丁漿，
*放入已預熱200度上火(高架位) 焗至面層起焦便可 (我用了約20分鐘)

自家炆腩片頭撈麵

Owen一到星期六，就會鬼上身咁話要去筲箕灣食炆腩片頭撈麵，見琴日做節剩下牛筋同西蘭花，買左半斤片頭同鲍魚麵，用自己方法就做左呢個住家版本。

按此往柱候牛腩食譜

豉油撈麵底:

只要在煮熟鲍魚麵餅後(2個)，撈起用1茶匙欖油，3/4湯匙煲仔飯豉油撈勻就成為麵底。

戚風蛋糕 - 徒手脫模示範 Video （朱古力雲石戚風）

風蛋糕用徒手脫模法，會比用小刀脫模更完美，你地都可以試下。

呢個video係舊年拍o既，今日先首次學識上載去Youtube.

加上呢個片段只係舖過o係Facebook,  琴晚整理完File發覺未舖過blog，可以同大家分享下。

**重點係只要蛋糕焗得成功，就算你點用力按都會自動回彈(唔駛擔心會按扁架)，用呢個方法脫模就可以做出完美無缺o既慼風蛋糕。

http://www.youtube.com/watch?v=pNYOLCBEzik



切開左係咁架，見到又手痕喇，今晚得閑幾話整返個先。

芒果糯米飯

 

 

哥哥喺曼谷送我兩個靚泰芒，用黎整芒果糯米飯最好不過了：）

材料： 約4人份量

糯米 150g

椰漿 A - 椰漿40g / 水30g / 糖 1/2湯匙拌勻備用

椰漿 B - 做法(1) - 椰漿100 / 糖 3/4湯匙(15ml量匙)拌勻備用

**（糖份量可按個人喜好調節 ）

**椰漿我用佳樂牌 (Kara)，印尼店有售，呢隻較杰新，唔使煮都得，好方便。

   **椰漿B做法 (2)如用較稀的椰汁可先煮熱椰汁+糖，再用小許生粉水埋薄芡

做法:

1)   糯米用水浸四小時，到去水份，用布盛起再放在蒸籠隔水蒸約20-25分鐘至熟透

2)   將糯米飯放在碗內，拌數下稍為散熱，襯熱逐小放入夜椰漿A拌勻至完全吸收，室溫攤涼，便隨時可供食用。（完全攤涼後用保鮮膜蓋好，不用冷藏）

3)   將飯用小碗盛起，倒扣再碟上，配上適量芒果，再淋上適量椰漿B便成。

雲石紋戚風蛋糕 (附劃花demo video)

戚風蛋糕確係人食人愛，口感軟綿綿，又好味。　我上星期一口氣做o左兩個黎招呼親友。　個個食完都問ｄ朱古力花點整，話好靚喎。　　其實有ｄ網友都曾經問過我呢個問題，我用文字解答過，咁ｏ岩ｏ個老公得閒，就叫佢幫我拍低佢同大家分享下。　想做出靚靚雲石紋戚風蛋糕並不困難，睇下呢個示範就知點做。 今次我只示範了兩層隔花，如做三層隔花的話，雲石效果更美，朱古力味更濃。

紐紋戚風：  普通7吋原味戚風蛋糕食譜，用深碗將兩大湯匙無糖可可粉加適量熱水拌成朱古力糊，把1/4蛋糕麵糊加進，變成朱古力蛋糕麵糊，再跟demo video 做法就得啦。

Demo Video
戚風蛋糕劃花示範

金罐牛油+花生醬曲奇 (附食譜)

呢個係星期日整呀，我朋友買左金罐牛油，用剩少少(約 (60g)，我就叫佢送比我試o下整鬆脆曲奇，因為牛油份量太少，無理由加d硬牛油落去，唯有加d花生醬黎整花生醬曲奇。
整出黎的確係係好鬆呀，真係好似 Jenny's Bakery 的口感　（鐘意食鬆的曲奇就愛死）。 我用左高根粉+低根粉整，因為高根粉會令d花紋"出"ｄ。　　的確係好好味呀，不過確實有ｄ肥膩。 我情願食較脆的，乾身d。
唯一麻煩就係，我貪靚要整唧花，初初用細唧咀，唧爆２個唧袋先唧到１０幾塊，最係轉用大咀先至好ｄ。

食譜 (係自創既食譜，試左成功先介紹比你地)：

金罐牛油60g + 花生醬100g + 80g糖粉打勻
加半隻蛋打勻 (別打太久)

加入45g低粉 + 25g高粉，拌勻便可
180度焗約15分鐘

*可用保鮮紙包好雪30分鐘，切塊焗
*如果好似我貪靚可唧花(但要用較大花咀)，每次唧唔好落咁多料，唔係好難唧同埋易爆袋。  仲有唔好唧咁厚花，如果唔係個邊燶左，個心都未熟。
今日腸胃炎，食止嘔藥后暈跎跎， o岩o岩食左碗粥就上網 (應該精神d)，上載完坐一陣就要"訓"，養足精神聽日返工啦畏。

朱古力戚風蛋糕 (食譜)

 

 呢個係上星期朋友生日蛋糕o既cake base.   本來應該用海棉蛋糕, 但我愛戚風蛋糕鬆軟香滑,

 加上今次用六吋小模, 所以用佢黎代替.  (之前試過吾用中空模, 改用7吋圓模, 中間位潮濕同升吾起.)

以下係７吋中空模份量食譜, 我今次用心型６吋模,加上只需要一片蛋糕,  只用左半個份量就ok,剩低o個d就做左我哋兩母子o既下午茶. 

 食譜:７吋中空模　

７吋中空模

材料A:

蛋白4個

鹽小許

砂糖 60g

材料B:

蛋黃4個

奶30g

砂糖40g

菜油30g

低粉65g

發粉1/2粉

可可粉15g

1)      材料A - 蛋白加小許鹽打至起泡, 分三次加入砂糖, 打至白色忌廉尖峰狀蛋白霜備用

2)      材料B – 蛋黃加液體材料攪勻, 加入已過篩的所有粉類攪勻

3)      將1/3蛋白霜與材料B混合, 再將餘下的蛋白霜加進, 輕力混合成蛋糕漿糊

4)      蛋糕槳倒進模中, 放入預熱至180度焗約30分鐘或至熟透.

**用長竹簽刺過蛋糕, 拔出時沒有蛋糕黏著, 蛋糕便熟透了.

5)      出爐後立即倒扣, 徹底冷卻後脫模便完成.