Secretaries gathering

 

好耐無整過焦糖燉蛋啦，琴日喺屋企宴請公司秘書們，特別整左呢個女仔實會鐘意嘅甜品，果然無錯呀。
 
隔離係第二道甜， 芒果糯米糍， 呢排芒果當造，都唔錯。

**是日晚餐 - 古法羊腩煲， 白酒煮花甲，蒸肉餅，酒香鹹雞，番茄炒蛋，銀鱈漁西京燒，雞汁炒芥蘭。

再戰朱古力淋面

好雀友Belle打比我，話佢想我做個生日蛋糕比佢老公，當然無問題啦!   我又有機會練習我o既朱古力淋面喇。今次照版煮碗，做返同上次整比老公o既蛋糕一模一樣，不過就係圓型，同埋今次用黎送禮，所以專登加左金箔，望落去會大體d。

今次淋面比上次進步，開始掌握到技巧，但仲要再練多d。

睇一次放金箔，發覺原來好真係好薄，仲超吸“疵”整都成隻手指都係，之後改用牙簽，就好少少喇，加左金箔效果真係好好多呀，好個鏡面好相襯，連Owen見到都話個蛋糕好高貴添呀。　

琴晚收到Belle 短訊，話老公同屋企人都覺得個蛋糕好靚同好好味，雖然係客氣說話，但係已經令我好開心啦，多謝Belle!

哈哈! - 真正金手指
 

臘腸炒芥蘭

新年因為要請客所以買左好多臘腸，前日煮飯就用左兩條要o黎炒芥蘭，因為同時整左酒香雞，所以就用雞汁黎調味，最後用d咁多生粉水兜幾o下，就已經夠晒味啦。

Happy Valentine's Day 2011

 

琴晚同老公預祝情人節，呢個係今年送比佢嘅禮物。 第一次做全個蛋糕淋朱古力鏡面，原來一啲都唔容易，要練多啲至得。

今次第一次做心型蛋糕, 仲唔係甩底模，脫模幾困難，要用小刀同火鎗攪咗好耐，個面溶晒咁滯先脫到模，下次都係買個心型模絲圈至得。今次造嘅朱古力慕絲，好濃又唔太甜，好滿意。

裝飾方面，仲用哂屋企唔同種類嘅朱古力嚟裝飾，就地取材，都OK啦。

食譜係參巧忽然一週內刊登BonBon Pastry嘅食譜, 但係佢登嘅份量有啲問題(魚膠同酒），所以我係以經驗更改左，佢仲有焦糖香蕉餡，不過我覺得太甜，所以無跟呢part.

煙肉菠蘿磨菇Pizza (食譜)

數吓已經有年無整過Pizza，今日忽然好想整，就去買齊材料，
整個煙肉菠蘿磨菇Pizza做下午茶啦。


天氣涼涼地，麵團發酵左個半鐘先夠。 雖然整Pizza手功多啲，但係好好味，值得！

批皮食譜，我無整芝心批，因為已經好"漏"，我覺得普通批皮更好。

材料:　

 高筋粉　 150克

 依士粉 3/4 茶匙

 糖　5克 

 鹽 　2克

 欖油　5克
  
水　100克

將所有批底材料撈勻，搓至滑身發酵約45 分鐘至倍大, 碌平成PIZZA狀，再上面刺洞.　

放入預熱180 度，　底袈位焗 ５分鐘至半熟取出, 再隨個人喜好灑上TOPPING 及芝士, 再焗約20-25分鐘即成 。

豆辦醬蜜糖豆炒豬頸肉

呢個幾星期掛住週圍去拜年同玩，今日先得閒上同大家見面。祝大家兔年心想事成，身體健康，萬事勝意呀！

今次介紹豆辦醬蜜糖豆炒豬頸肉，好簡單, 仲好惹味添㗎:


1)      將豬頸肉切片，再用鹽，糖，生抽，豆粉同油醃數小時，

2)      蜜糖豆先用熱水焯至半熟，撈起，浸於凍水中，至冷卻，撈起瀝乾水備用

3)      下蒜蓉起鑊，下豬頸肉炒至9成熟，灑小許老抽加色（按喜好），下蜜豆兜炒，最後下醬汁（用蠔油，生抽，糖，水，豆辦醬開成）， 試味，再以小許生粉水至收汁便可上檯。