士多啤梨忌廉蛋糕

ｏ岩ｏ岩過左ｏ個個星期日，全家齊人同Owen + 姨甥女珊珊補祝生日喇。　本來應承佢由我煮比佢食，但係我左膊頭肩周炎，舉高都唔得，所以無煮，只可以整個蛋糕比佢，女仔多數喜歡士多啤梨，就整左呢個較簡單ｏ既Cream Cake比佢。

蓋念來自James Martin Workshop ｏ既十分鐘蛋糕，立即學以至用，改一下就成為自己的版本啦。　　呢個士多啤梨圍邊我都係第一次，配白白ｏ既忌廉真係好靚呀。　但係當然我無用到現成蛋糕（因為買唔到），所以焗左個綿花蛋糕。

用士多啤梨裝飾後覺得有ｄ單調，就整左一片圓型朱古力花放ｏ係上面，加埋上次用剩ｏ既金鉑，睇落即刻唔同晒呀。

珊珊好鐘意呢個蛋糕，仲係咁影相要立即放上FB喎。


蛋糕組合：

綿花蛋糕兩片，底面各一片（做８吋，脫模後用７吋模壓下成為７吋，確保無虛位）
剩下的蛋糕邊我都放埋落去，一來好軟熟唔好浪費，二來忌廉層唔會咁厚，無咁漏。

忌廉 - 淡忌廉４００ｇ，３湯匙糖（好隨口味加減），雲呢拿香油半茶匙，打至企身


士多啤梨適量。

綿花蛋糕製作圖 - 呢個蛋糕口感好濕潤，好軟熟，又唔難整，做cream cake一流。

朱古力片製作圖　－　用不調溫朱古力隔水坐溶，放入唧袋（剪小孔，不可過大），再隨意劃在預先劃了圓型的牛油紙上。　然後置於室溫待凝結，之後小心撕去牛油紙就得架喇。