鹹魚蓉煎肉餅

 

 上星期日，朋友仔到訪打牌，咁o岩老公放架，我就負責煮飯。　呢個餸大家都好喜歡食，平時打牌叫外賣都會叫黎食，今日ｏ既然有時間，就等我黎整啦。
平時外賣成50蚊得6件，今日自己整，都係買左50蚊材料，不過就整到17件，我地9個人食都夠晒。 加上一煎起即食，熱辣辣，個面仲有小小脆口，鹹鹹香香的，送飯真係一流呀。

材料(9人份量)：


免治半肥瘦豬肉約1磅

鹹魚兩小件 (雜貨店有售，預先切好一件件的)

馬蹄8粒 (拍碎成小粒)

薑蓉(連汁) – ½湯匙

老抽2茶匙 (加色用)

生抽2-3茶匙 (**)糖2-3茶匙 (**)　

豆粉一茶匙

雞粉1茶匙 (可免，但落左好食好多)

蛋白1 隻


1)   鹹魚先蒸5分鐘，用兩隻叉起肉，猜成蓉

2) 馬蹄去皮拍碎

3) 將魚肉，馬蹄調味料加入豬肉內拌混，撻數下， 臨煎加入蛋白拌勻,  搓成小球，下鑊壓平煎熟，便可上檯。

(**) 溫馨提示

每件鹹魚鹹味唔一樣，我習慣調味料先下少一點，臨下蛋白前先拿小許煎熟試味，然後作最後調味，

先至多下蛋白撈勻再煎，咁就實唔會失敗呀。

Cooking Class with James Martin

 

 

 琴日Owenmama有幸被BBC lifestyle channel的PR邀請參與名廚James Martin (BBC Celebrity Chef)  的HK Tour Workshop, 能跟星級名廚學嘢，很榮幸呀。 場地係由香港西廚學院提供贊助，我都係第一次去咋。　James無架子，廚藝了得，不愧為國際星級大廚。    當日佢示範左一個主菜同兩個甜品，我地要ｏ係佢ｏ既快速示範後自行製作一模一樣的主菜，成個過程好開心同刺激，亦學到好多野。  



呢個就係係我嘅作品 - 之前James示範一次，之後要記住step，然後就埋位自己整，過程好刺激呀！  呢個仲係我地琴日o既午餐，正式係自食其果，呢個午餐味道唔錯，唯一係食o既時候已經凍左。
上面係我o既作品, James 都話well done，真開心。

  

James示範，佢做得好快，好專注，專業，快得黎每個步驟都好清楚利落, 只係兩刀就起了原件魚柳，大家都好留心學。起魚柳後全程用火鎗燒熟，連爐都唔駛開。  配菜係蕎麥Blini，仲有個紅菜頭汁，全程都係自己整，充滿挑戰性。

 

今日重點學到兩刀起原條魚柳，日後好有用，D魚全程用火鎗燒熟，吾駛開火，勁香呀，交功課時仲同老師合照一張。  煮的過程好急，所以無乜時間影相，只係請PR哥哥有空檔時同我影左幾張。

James 堂上示範十分鐘完成拉糖花草苺蛋糕，大師級出品真係勁快，勁靚，又好味呀！（我地午餐第一度甜品）呢個蛋糕係請客佳品呀。　仲學到用燒紅左o既鐵枝做蛋糕面o既裝飾，不過就要好小心喇。

再次多謝BCC Lifestyle PR Janice的邀請，令我有機會同國際星級大師學藝，真獲益良多呀！

如果想睇多dJames的廚藝，可以留意： James Martin's Mediterranean 將於5月4日下午6時45分首播，其後逢星期六同一時間於BBC Lifestyle (nowTV 221台/ Cable TV 131) 台獨家播出

To my darling son - 雲石芝士蛋糕

星期六，4月20日，係Owen 17歲生日，禮物我地一早送左，仲一早book定佢最愛去的Congress食自助餐慶祝添。　轉下眼佢就17歲喇，我同老功都希望佢做個開心快活人，健健健康康咁成長就心滿意足了。

因為一早決定去食自助餐o既原故，所以初時講好左唔會整蛋糕，但係又好似無乜氣氛，所以最後都係用屋企僅有o既材料，整左個雲石芝士蛋糕比佢，但係最後食完自助餐實在食唔落，所以琴日先食到，仲分左部份比鄰居食添。

而家仔仔大個喇，唔係好喜歡上鏡，呢幅係我地兩個熱烈要求下先肯影咋。 你地睇下雖然已經17歲，仍然似個大BB。

講返個蛋糕， 呢個蛋糕好易做，材料又簡單，你地都可以試下架。

食譜：

7吋慕絲圈 ，消化餅底

芝士餡：忌廉芝士　－　350ｇ

淡忌廉　－　300ｇ

 奶 - 100ml

糖　－　110ｇ

魚膠片　－　4 片 (每片約5g)

 水- 4  湯匙

朱古力餡：

朱古力粒 – 60g

淡忌廉 – 2湯匙

1) 淡忌廉打至6成起 放入雪櫃備用(6成是豐厚流質狀，剛起紋便可，否則餡會太杰，不易劃紋)

2) 魚膠片用冷水浸軟，加入水份，隔熱水坐溶備用

3) 同時將朱古力粒隔熱水坐溶，加入兩湯匙淡忌廉備用

4) 室溫回軟的忌廉芝士加湯打至滑身，加入奶打勻

5) 將魚膠溶液加入芝士醬內，用膠刮快手混合，再加入淡忌廉，充份混合

6)分一小碗芝士糊與朱古力醬(3)混合，放入唧袋

組合：

先放芝士糊至圈的1/3高度，唧朱古力糊 (見下圖) 用筷子打圈劃紋，

再小心舖上一層芝士糊至圈的九成高度，唧朱古力糊 (見下圖) 用筷子打圈劃紋放進雪櫃雪至少8小時就得啦。

劃花技巧：用唧袋唧在蛋糕表面隨意唧出長形弧形紋，再用筷子插入打小圈便成花紋。

 

中層花紋製作跟上圖一樣，但要唧深一點，亦不用唧太多，否則再在上面倒芝士醬時朱古力會浮起，不能全部被蓋住，影響賣相。

台灣狂食之旅

琴晚剛從台灣返黎，呢4日半，食左好多美食，攪到返黎要節食減磅呀。   不過真係餐餐都好好味 (尤其係上引水產同胡同燒肉，一定要去呀)，而家同大家分享下。

呢個係呢排大熱o既遊客必去食肆，不過都好值得推介

上引水產，全部係立食（企位，不設座位），魚生，壽司，熟海鮮，燒物，乜都有齊，仲可以即買游水海鮮請廚師烹煮，價錢比香港平得多。不過立食壽司店超多人，要有耐性呀！吾想等可以在現賣區買走食，門口設立食區。一樣好味，仲好多選擇呀！

上引幅相一共食左兩餐，1）龍蝦兩食加壽司 - 最抵係龍下兩食，都係NT$720 (HK$180)，真係睇得又食得。
2）鮑魚，蟹腳，三文魚頭加魚飯，每餐都係約1，500新台幣 (HK$375)左右。
 

 上引水產
地址： 民族東路410巷2弄18號

新增說明文字

胡同燒肉夜食，共五店，我今次去第一店，呢度每樣食物都好好味，尤其係午類，仲有專人代燒（自己動手也可以）師父們很好客，親切，食得好開心。都你平香港好多，不過店很少，只有廿個位左右，所以經常爆，記得訂座呀！

 

胡同呢餐包括相內食物，兩杯酒，兩杯凍飲共3，000新台幣，約HK$750,比香港平得多呀！地址 - 位於敦化南路一段161巷，17號 (一號店)
Tel:  02 2776 1575
http://www.facebook.com/hutongyakiniku#!/hutongyakiniku
**共5間分店

 Melange Cafe - 最出名係冰滴咖啡，仲有超厚Waffle, 4片Waffle，仲有雪糕，鮮香蕉，香蕉醬同朱古力醬，賣相好得。兩杯飲品連Waffle約HK$140，呢個下午茶真係超給飽，不過呢間餐廳超人氣，成條街得呢間門口企滿人，我地等左大半個鐘先有位。(不過可能係星期六下午啦)

地址 - 台北市中山北路二短16巷23號
**不設訂位，每人要叫一杯飲品。

 第三日落左北投溫泉區，我地左不投春天就店，o個道環境唔錯架(會o係另一篇分享)。  我地黃昏去左浸露天風呂，晚上北投區無乜野食，就留o係酒店中菜廳叫坐兩個一人晚餐，如果唔食中餐就只有懷石料理，但係早一日食左日本餐，所以今次食中菜。   結果又唔錯喎，大多數都幾好味喎，碟碟細細碟，好精美，一人份，我地兩個餐大家Share, 好好味呀。

 

北投春天酒店　－　北投區，幽雅路１８號
http://www.springresort.com.tw/

老公的晚餐　－　NT$1,080 +10%

 我的餐　－　NT$880 + 10%

永康牛肉麵　

同事本來推介牛爸爸，但係太遠喇，為左食一碗麵好似唔係幾值，我地去左另一人氣店　－　永康牛肉麵，試左兩個前菜（一般），同牛肉麵　（１）清燉半筋腩　－　個湯好清香，充滿牛味　（２）紅燒半筋腩　－　呢個湯好濃，帶少許辣，好惹味呀。　兩個都好好味，　埋單共NT$560台

網址：　http://www.beefnoodle-master.com/sendus.html（捷運東門站）






台北士林夜市，夜市大樓地庫好多野食，但係大樓外面條街仲多呀，仲一d都唔貴。 我地食左好多樣野，每樣買小小，掃街好開心呀。
我地星期五晚去，真係好多人呀。

 

籠仔金蒜蝦蒸飯

 

每次出街食飯，唔多唔少都會比到我一ｄ新煮意。 呢個係柴灣街市大樓o既泉記的照牌菜。 上星期去先同老公+Owen仔去食，佢地都好鐘意，一於又整個A貨比佢地嘆。   只係將d蝦開邊，放在蛋炒飯上面，灑上金蒜粒用蒸籠隔水將蝦蒸熟就得，其實成件事唔係好難，  不過就真係幾好味架。

自己整當然d料會靚d，又比出面食平好多。　我用$45蚊買左9隻超大蝦，個籠得8吋，剛好夠放晒d蝦o係上面。 因為要保持乾身，唔會淋豉油同醬料，蝦的調味就靠晒d金蒜粒喇。 我o係泉記專登dap多幾粒，試真下有乜野o調味。  應該係有雞粉同鹽，返屋企有樣學樣，真係整到9成像真o既味道，以後又有一道新菜宴客喇。

做法；

金蒜粒　－　 只要將蒜粒用油炸到轉金色，撈起放在碗中，加入小許雞粉同幼鹽撈勻備用，

將蝦開邊放在蛋炒飯上，灑上蒜粒，再隔水蒸10分鐘就得喇　（如用蒸籠，請先用錫紙舖在籠底，正版係用荷葉的）。　

溫馨提示：

＊＊ 我沒有蓋上蒸籠蓋，因鑊不夠深，所以蒸的時候要留一條小縫在鑊邊，咁ｄ蒸汽有位走，咁d飯上面就唔會有倒汗水喇，如果d飯濕左就唔好食架喇。

＊＊ 我在舖蝦前灑左ｄ金蒜粒ｏ係炒飯上面，蒸完ｄ蒜粒會邊軟，加埋ｄ飯就會更有味同更香喇。

 金蒜粒

  
先用錫紙舖在籠底，正版係用荷葉

o既。

自家叉燒菜飯

呢個係復活節假期30號o個日整的。 o個日本來去BBQ, 但係全日不停落住雨，所以取消左。　
落住長命雨又唔想出街食，食完早餐去街市賣菜，再買件半肥瘦梅頭整碟頭叉燒菜飯，簡簡單單又一餐。

今次件梅頭好靚，真係唔瘦，脂肪同肉相連，呢兩件叉燒好滑好好味呀。我鐘意厚切，老公喜歡薄切，兩樣都好味。

叉燒 (食譜按此)已經整過好多次，今次介紹菜飯食譜，計起有幾年無整過喇，不過真係幾簡單同好味架。

材料：

小棠菜12兩切粒 / 薑米一茶匙 / 酒+鹽小許 / 珍珠米 3杯

1) 下小許油炒香薑米，下菜粒兜炒，贊小許酒，下小許鹽調味，盛起備用　（菜只炒至七成熟，因為之後仲要入煲焗。

2) 米洗淨加雞湯(代替清水分量)，亦可隨意調教雞湯同水的份量。(雞湯份量越多則越濃味）

3) 當飯煮至9成熟（或時間倒數剩2分鐘），便可加入菜粒，快手拌勻，蓋起繼續煮至全熟，(緊記如焗太耐，菜會變黃)

（因為煮當日太替雨，最後無落街買珍珠米，但用譜通米都ｏｋ呀）

無花果芝士蛋糕

 

29號一班好友聚餐，姍姍送我三個新鮮無花果。  就咁食好次寡左d，趁31號再有朋友黎開檯，雪櫃又有齊材料，就整左個6吋薄薄地o既小芝士凍餅黎伴食，諗住分甘同味。 點知掛住打牌，無左件事，個cheese cake就坐左o係雪櫃到成晚，(仲未脫模), 無得出櫃，hehe…

結果1號先脫模裝飾，簡單地用左忌廉同無花果，呢個小蛋糕就成為左老公呢幾晚o既宵`夜喇。

芝士餡我用美味DIY的果籃蛋糕

  的餡 ，有時整

Fruit Tart我都用佢做Tart 餡架。    其實，我經常會將一d我愛的蛋糕食譜，mix & match而成為合自己口味o既版本架，可以有好多邊化架。 ( 食譜：  http://www.rthk.org.hk/elearning/dessert/cake_charlotte.htm )