Party 孖寶 - New York Cheese Cake + Brownies

老公琴日開始調組，為左搭謝同事們的照顧，佢吩咐我做左兩樣１８人份量ｏ既甜品精佢地食。　　最好食，最受歡迎同最容易整ｏ既就係呢個Party孖寶啦。
即係New York Cheese Cake 同Chocolate Brownies喇。　Cheese Cake要雪兩日先好味，所以星期六晚就焗好，放入雪櫃定型，星期日一早就整Brownies, 雪到夜晚就可以兩個一切件同加工喇。　老公話ｄ餅好受歡迎，一陣間就無晒喇，佢自己一件都食唔到。　下次我諗要整多幾件先得喇。


Tips :  如果切出靚靚Cheese Cake: 之前有朋友問切餅忌巧，而家同大家分享Owenmama的心得：　New York Cheese Cake 要切得靚，我會在煮食爐旁邊切，先長開住最細火，每切一刀前先用火輕輕燒熱把長刀，襯刀熱切餅，而切完每一下都要用廚紙抹淨把刀先再重複（餅店會用火鎗，不過住家有小朋友，就太危險了，所以我轉用固定爐火)。　呢個動作都有d危險，要小心呀。　　

**呢個係大型蛋糕ｏ既切法，如果整一般size的蛋糕，將用熱水代替火就得喇，其他步驟一樣。

各位朋友，本人已於 Facebook 開了 Fan page, 請登入以下網址送個"like"比我啦。

透心涼 -皮蛋肉鬆豆腐

夏天天氣悶熱，食下冷盤會開胃好多架。  呢味冷盤，我夏天請客必做，仲每個客人都鐘意。

呢個係台灣菜出名的涼菜 ，通常係用台式油膏做佐料，但係我就覺我自家調配o既汁料更合我口味喇，而家同供煮同好，佢好睇又好食，包你同朋友們都會愛上呀。

＊＊呢個菜式超級易做，新手都一定會成功架。

食譜：

百福豆腐兩件 / 皮蛋兩隻切粒 /  脆口肉鬆適量

醬汁（用量匙份量）： 糖4茶匙 + 熱水1湯匙 / 蠔油 2湯匙 / 生抽2茶 匙 / 麻油隨意

**不同牌子的調味料鹹度不一，要試味同自行調節呀。

1)   豆腐倒扣再碟上隔水 蒸5分鐘攤涼，蓋好，　放在雪櫃雪凍 (豆腐會出水，要不時倒去水份)

2)   舖上肉鬆，皮蛋粒，蔥粒　（配料要放在豆腐上面，以防被豆腐流出的水浸濕）。

3)   最後淋上適量醬汁便可。

**醬汁不用下太多，建議用小碗盛起 on the side好d，客人可以隨意添加。

LC 梅菜鯇魚煲仔飯

今晚同Owen 仔的二人晚餐 - 梅菜鯇魚煲仔飯，只$20材料費咋，d飯粒粒分明仲有飯焦食，配埋煲仔飯豉油，Yum Yum!  
老公好鐘意食"一粥麵"午市o既梅菜鯇魚煲仔飯，但係好多次去到都賣晒(每日只賣幾客)，每次都要同人鬥早買先有幾會，而家屋企整到，以後唔駛同人爭喇。


食譜(我用La Creuset 18cm)：

1）2杯米用水浸20分鐘，放入LC煲加水(1:1)大火煮至水滾，其間用筷子攪動米粒

2）轉小火, 蓋上蓋煮兩分鐘，開蓋,（此時水已差不多全被吸收），加入鯇魚(見註) 再用手捽和甜梅菜粒(見註)

3)再度蓋上煲蓋，最細火煮十分鐘，之後熄火焗十分鐘便完成了
**想有飯焦則在最後一分鐘轉大火便可

註：鯇魚處理：  沖水，用生粉捈在魚上，一面沖水一面用手指捽，可去腥及更乾淨
梅菜處理：  (要甜梅菜)用水沖乾淨，浸半小時，搾乾水，切粒 (梅菜份量可以減少dd)
 
呢個狀態就可以加入魚同梅菜喇。

不黏底，但有飯焦，如果老公o係度就o岩晒佢喇。

簡單，美味 - 芒果牛奶布丁 (父親節快樂)

一如以往，父母親節正日晚餐都會在我家食，吾使同人迫。 祝眾父親有個溫馨父親節呀！

老公之前胃病，要清淡所以好耐無整過甜品喇，剛好返d，琴日又係父親節，就整個最簡單o既甜品比佢同家人食。

雪櫃有大半盒淡忌廉，加埋我早餐o既脫脂奶，都係剩物資，溝埋用黎整左個牛奶忌廉布丁，再ｏ係上面用熟透ｏ既芒果肉打成蓉，放係布丁上面，就成為呢個簡單得黎，好睇又好味ｏ既甜品。

好好彩買到又平有靚ｏ既呂宋芒，家人對我呢創作激讚啊，老公仲order 定30號請同事黎食飯時要整返呢個甜品添。

鮮奶忌廉布丁食譜：

約7小樽份量(7分滿，預留位置比芒果蓉)

材料： 200g 淡忌廉，300g脫脂奶

魚膠片 兩片(5g一片)

砂糖40g 左右(或隨個人口味調教)

芒果(三個，用攪拌機打成蓉，雪凍備用)

做法：  　

１.將牛奶 、糖加熱，不必沸騰，糖溶了就ok

2.加入先用冷水浸軟的魚膠片，攪拌至完全溶化熄火，加入淡忌廉混合

3.等一會至暖，倒進溶器，雪約7小時至凝固（如隔日食，用1 3/4片魚膠片就得啦）

4. 將適量芒果蓉放在布丁上，完成。

溫馨提示：

緊記全過過程要用最細火，不可滾起。


住家父親節晚餐，自己煮，唔駛同人迫。

家鄉煎粽子

 

 

 

煎粽係老公的家鄉食法，佢細個奶奶會咁整比佢食。   奶奶去世多年， 琴日我都煎左隻比佢食等佢回味一下。    呢個整法令粽面微脆，再用砂糖伴食，一絕呀!   連一向唔食粽o既Owen都話好味呀，多謝老公教我呢個做法，雖然功夫多左，但係真係好食好多呀 (尤其係個鹹蛋黃，更香呀)!

做法：粽先”丁”1分鐘，去葉切開用易潔鑊煎香 (切時刀要濕水，唔係好難切得靚)

翠塘豆腐

呢個改良版蒸水蛋係Owenmama o既自家菜， 亦係Owen最喜歡食，其實好簡單，只係在蒸水蛋上淋上一個加左蟹柳絲o既玻璃芡，仲可以加菜粒 (芥蘭同菜心都得)，咁就會無咁齋，更加送得飯，個賣相仲會靚左。 如果宴客，想高貴d，可以用帶子，蝦粒，(預先用水煮熟)代替就更正喇。

每次我話整呢個菜式，佢都會大叫 : "好ｏ野”" ， 然後o係食完飯收碗o既時候，佢就會返埋飯檯，同我清晒剩底o既蛋，仲會好比心機用匙羹將黏ｏ係碟邊的蛋都清埋，我同佢daddy就會坐住欣賞佢呢個為食相(無作大架，下面有相為證架。

食譜 ：

蒸水蛋底 ：

-蛋四隻打散，

-加入雞湯 (份量為蛋的1.5倍)充份混合

-將蛋液過篩，到進深碟中

-蓋上微波爐保鮮紙，中火蒸9分鐘至剛熟

**時間按碟的大小自行調節。

蟹柳芡汁：

-雞湯250ml + 鹽小許 / 菜粒 / 蟹柳(撕成絲狀) / 生粉水適量

-雞湯+鹽小許煮滾，轉小火下菜粒，至菜粒剛熟，下蟹柳絲

-下生粉水埋薄芡

-將芡汁倒在蒸蛋上便成

 

油鹽水花蛤

而家有雞湯o既幫忙，想整出同出面口味差不多o既菜式唔再ｏ係難事。　我地一家係海鮮怪，附近街市又多平靚海鮮賣，所以經常有得整。
今次我買左３０蚊花蛤，整左呢煲簡單的用油鹽水煮，加d紛絲，老公同仔仔讚不絕口呀。   雞湯加埋花蛤汁真係好正呀， 仔仔仲用d湯黎整湯飯，最後湯都無滴剩呀。
好快手就整好呢味避風堂酒家小菜，份量仲比出面多成倍，但係又平好多架。


食譜：

鮮花蛤一斤 / 雞湯600ml / 頭菜一件(約2吋x1吋，切粗條)，胡椒粉(隨意)，粉絲1小包


1)花蛤徹底洗淨，瀝乾水備用
2)600ml雞湯 (如無雞湯，可用清水加雞粉代替) ，加入頭菜條，加胡椒粉煮滾，
3)下花蛤及粉絲，煮至花蛤開口
4)試味，灑上蔥段即成 (好隨喜好加點麻油)。

溫馨提示：
*我個人覺得多d胡椒粉會惹味d，所以都落左幾多，個湯辣辣地好開胃。
*頭菜本身已有鹹味，加上花蛤的鮮甜，不用另加鹽也ok。
*用蜆更平，但係好多時都會有沙，用花蛤就一定無沙啦。