日式蟹子沙律

琴日整定左ｄ蟹子沙律，同買定鰻魚整鰻魚飯，諗住一家三口坐定定睇衝上雲宵。　忽然鄰居Bonnie請我同哥哥兩家人一齊去佢度飯聚，就將原來3人分量o既蟹子沙律加大成8人份量，再拎埋條鰻魚上去， 齊齊食開心好多。 

呢個沙律好易整，無難到就整到同日本餐廳出品差不多的賣相口味，你的家人，朋友實鐘意架。

材料： 

青瓜兩條，蟹棒半包，蟹子適量，日式沙律醬適量，煉奶一湯匙 

-青瓜切絲(切法見下圖)，蟹棒解凍，楂乾水再撕成絲，加入一湯匙蟹子 ，拌入適量沙律醬及鍊奶

-上桌前再在沙律上放上蟹子就食得喇。

只要用利刀沿住青瓜的外圍慢慢片成薄片，再切成幼絲，呢個方法如果掌握到，好快就會切出又薄幼的青瓜絲 (見圖2)

 (瓜囊部份會出水，所以唔會切，留黎當口果食，一樣青甜好味，無浪費)

切青瓜絲技巧係食日本餐時見師傅o既切法，佢地當然係用手楂住枝青瓜垂直切，我地無咁好刀功，用呢個方法都可以成功。