２１週年之旅

下星期就係結婚２１週年，我同老公今年會去馬來西亞　亞庇（Kota Kinabalu) 玩幾日，今次有兩晚會住ｏ係 Gayana Eco 水上屋，希望天公造美啦　（因為ｄ　ｂｌｏｇｇｅｒｓ話如果天氣唔好ｄ水唔清呀）。


返黎同大家分享旅遊點滴呀。

New York Cheese cake

 

 今日係舊鄰居兄妹的生日，前日Owen親自去買定料，叫我整左呢個New York Cheese cake 送去比佢地食，難得佢咁有心，我都吾介意接呢單蝕本生意呀.   

 

祝善同&諾文兩兄妹做的生日蛋糕，預祝二人明日生日快樂，日日開心 ^^

 

呢個蛋糕人見人愛，亦係最易整ｏ既，最好雪兩日先食，咁就一定夠硬同夠凍喇。

 

 

 

蝦米上湯浸豆苗

 

 

天氣開始凍，豆苗又當造喇。 琴日經過街市，見賣$24蚊斤，就賣左斤黎食，但當然唔係杯苗，不過我愛有莖的多d，因為平d，高纖d又有咬口ｄ，　個湯加左蝦乾仲好香添架。

用上湯浸，加埋ｏ係曼谷買返黎ｏ既蝦乾，香口又惹味呀。

做法好簡單：

豆苗１斤，雞湯２杯，花雕１湯匙，蒜頭去衣５粒，蝦乾隨意

１）蝦乾先用１／３碗水浸泡１０分鐘，撈起，水留用
２）下３湯匙油，慢火煎炸蒜頭至微焦，下蝦乾爆一會
３）下雞湯＋蝦乾水煮至大滾，下花雕，再下豆苗煮至熟便可上碟。

圃國雞

簡易圃國雞，呢個菜請客同開party最啱，配飯，意粉，法包同印度Roti都一流，仲好容易整又好味道添呀！ 

材料8-10人份：

雞扒三大件去皮切塊，用小許盬醃一小時備用

一個洋蔥 （大）切片/ 甘筍兩條 - 切角 / 薯仔一大個切件  /李x記葡汁一樽 / 水適量 /淡奶或椰槳100ml

1) 薯件下鑊用小件油爆香表面，加水煮至半熟撈起備用

2) 爆香洋蔥片，下雞翼爆一會

3) 下葡汁 +水 + 薯仔這紅甘筍(水剛蓋過全部材料便可)

4) 兜勻，轉小火炆10分鐘左右，至甘筍熟透，加奶或椰汁，減輕醬料鹹味，最後試味便完成（有需要可下小許生粉水埋薄芡。

**炆的期間要留意水分多少，稀濃到要適中。

**薯仔分開處理，係因為如果吾煮至半熟，起碼要煮20分鐘，而甘筍同雞塊好快淋，煮得耐吾好味，但如果用雞翼或脾（連骨）做，就可以一齊炇。

泰好味 - 咖哩魷魚

上次去完蘇梅，o係食店見到廚師整咖哩炒蟹肉，不過急凍蟹肉好難買到，所以我決定用返我自己o既方法，整返我自己版本o既咖哩鮮魷喇, 因為呢個汁，老公食左三大碗飯呀。

食譜：

-魷魚洗淨切花，再切件， 出水，不要過久，剛熟便可，撈起，過冷水, 瀝乾備用

-先爆香洋蔥，再下青椒爆一會，下半包 咖哩粉爆香 (鑊不可太乾，否則會焦，如需要可加小許油)，爆至聞到咖哩香味，再下細半碗雞湯

-魷魚回鑊，再加唐芹炒一會

 -下調味( 魚露 2湯匙/ 糖 1湯匙 //半罐花奶) 煮至滾起

-轉最小火，最後下2隻漿兜至起蛋花，試味及用魚露和糖最後調味。

**我個人覺得，呢個菜都係要帶小小甜味先有泰菜風味，不過最緊要係o岩你自己，所以試味係好重要架。

**魷魚回鑊後不能炒太耐，過熟唔好食架。

曰式茶碗蒸蛋

Owenmama整親腰骨，瞓左幾日床今日先好番D，一家三口吾駛再捱外賣。冰箱有日式鹽漬魚（在Apita日本節promo買100蚊兩條）只要解凍，掃油再用焗爐焗熟就得，老公一手攪得掂。

我只係企左五分鈡做左幾個茶碗蒸蛋，一家三口簡單食個燒魚定食，好過再食超油同味精外賣。

要做茶碗蒸吾難，做法如下：

-蛋同雞湯比例為 1 : 2 (即150ml蛋加300ml 雞湯）雞湯份量內包括1湯匙鰹魚汁

-先打散蛋，再下雞湯攪勻，過篩再倒入茶碗

-慢火蒸8分鐘（火太猛蛋會孩口） 

**如做普通蒸水蛋側不用下鰹魚汁

**蒸的時間按容器大少及爐具火力自行調節

鰹魚汁, 呢個汁好好用，加冰可以送冷素麵/烏冬，加水煮熱就成為日式湯烏冬，一汁多用架。

魚解凍，掃油，放入焗爐220度焗約十分鐘至金黃便可

超鬆軟棉花蛋糕

上星期老父生日，我做左個栗子蛋糕比佢，今次用左鬆軟嘅日本棉花蛋糕做底，結果比用一般海棉蛋糕好得多。

呢個食譜轉載自"烘出蛋糕香＂，吾難做，但好軟，香，滑㗎！ 

食譜： 本來係13.5" x 9.5"盤， 我今次用了7吋方模

牛油 60g / 低粉 80g / 牛奶 80ml / 蛋 6隻 / 砂糖 90g / 鹽 小許

 做法：

- 預熱焗爐160度

- 牛油置煲申慢火煮容，關火，加入低粉拌勻，加奶，1隻全蛋和5隻蛋黃慢慢攪到滑身，右粒粒

 

- 5隻蛋白打至起泡，下鹽，及分三次下砂糖，再打到呈現尖角狀

- 蛋黃漿分兩次拌入蛋白霜（fold in) 至混合至均勻，然後倒入舖牛油紙的盤中，雙手提高盤在桌上輕敲一下使空氣排出

 

 
- 置於焗爐中層焗15分鐘（160度），之後轉140度焗五分鐘，用竹簽測試熟度，如刺過拔出沒有黏著蛋糕漿便可出爐

 

- 出爐後馬上在鐵架上倒扣待涼，便可撕去底紙，切成方塊，搽上奶油忌廉㚒心便完成

**我用了7吋方模，蛋糕較厚，焗的時間差不多用多了十分鈡，記住用竹簽測試，熟透才可出爐呀！

自家製栗子蛋糕 + 焦糖燉蛋

上星期六係爸親大人生日，為佢做左佢最鐘意嘅栗子蛋糕，用左棉花蛋糕做底，好香軟呀！

爸爸同家人都超鐘意呀！一行12人食完海鮮再返我屋企食蛋糕  + 睇巨輪結局，好開心呀！

今次用左罐裝無糖栗子439g一罐，加左80g糖霜打勻，再加100g淡忌廉打勻，放入雪櫃雪一個小時就可以放入唧袋。

棉花蛋糕片，好軟，好棉，做cream cake 底一流呀！ 

同場仲整左十幾個焦糖燉蛋，雖然大家都好飽，但係一樣清哂呀！

大製作

 

 

 

 

 

 

 

 

 

 

 

 

 

 

 

 

 

琴晚忙左一晚，今朝一早起身切餅同裝飾，100+件小甜品order順利完成！yay!
 

感謝老公不停幫手洗用具同去買補給物資，呢個任務先可以順利完成呀。 

 

 



次係受託於朋友的榮休餅，亦係第一次收錢的order，所以我對產品要求提高，有小小壓力架。
訂單：

 

訂單：

Chocolate Brownies x 34

New York Cheese cake x 24

木糠布丁 x 25

雙層朱古力忌廉杯 x 21

雖然忙左成晚，但係真係好開心，同埋越做越起勁，總之我o係廚房就會充滿力量呀。

日式薯仔沙律

平時日式西餐廳食晏，有時都會食到，但係通常都係得一個細細的雪糕球份量，真係到喉唔到肺。 平時o係Jusco / Apita 買，二十幾蚊得d d咁多，我地都覺得好唔抵，無奈愛食，有時都忍唔住要買。

原來自己整並不難，竅門只係要全部材料都要索得好乾(呢個沙律要好乾身先好食架)，同埋薯仔同紅甘筍煲熟後要切厚片，放入雪櫃雪凍先切粒，就會實身ｄ，無咁易散。　汁就係用蛋黃醬加鍊奶較到合自己口味就得喇。

材料：　

薯仔４個 /紅甘筍1條　-  煲熟後要切厚片，放入雪櫃雪凍先切粒，     

          

日本青瓜(幼小的那種) 2條  - 去籽, 切超薄片，用鹽醃一小時，渣乾水備用

熟蛋白4個 – 切小粒

厚火腿一片 – 切粒

洋蔥蓉 1茶匙  (隨意，可免)

卡夫蛋黃醬1樽 (小)

鍊奶 2湯匙 (或隨口味加減)

如果呢都喜歡食薯仔，一定會超愛呢個沙律架。

咖哩炒魷魚

呢個又係睇一次整架，因為上次買左枝魚露黎整魚露炸排骨，老公話想食魷魚，就諗起我地兩個都鐘意食o既泰式鮮魷。  我知都完本係要用辣椒油o既，但係因為要就 阿B 同唔想好似o係街食咁肥膩，就只係用左咖哩粉。 個樣整出黎唔係好次泰國餐廳o個隻，不過勝再唔油膩，個汁仲好送得飯添，至於賣相，都唔大差丫。

做法一ｄ都唔難：

-魷魚洗淨切花，再切件，用薑汁酒醃一會，

-魷魚出水，不要過熟，卷起邊食便可，撈起，過冷水。

-先爆香洋蔥，再下青椒爆一會，下1-2湯匙 (或隨喜好)咖哩粉爆香 (鑊不可太乾，否則會焦，如

需要可加小許油)，再下唐芹

-下調味( 魚露 3湯匙/ 糖 1湯匙 / 雞粉小許 / 半罐花奶 / 水 3/4半碗)

-下魷魚兜炒，最後下２隻漿兜至起蛋花，試味 

-如有需要，可以小許生粉水埋芡 (但緊記汁不能太杰)

**我個人覺得，呢個菜都係要帶小小甜味先好食，不過最緊要係o岩你自己，所以試味係好重要架。

**魷魚回鑊後不能炒太耐，過熟唔好食架。

上湯肉蟹+伊麵底

Owen 每次去親飲，都會問："唔知今晚有無龍蝦伊麵食呢？"  佢只係去飲食過兩，三次，愛上了，每次去飲都希望食到。  o係屋企整上湯龍蝦就太大工程，仲好貴添，所以將佢降低一級，用肉蟹整就有家庭 feel 好多，仲平好多添。  

  材料： 花蟹兩隻(大)

1) 蟹洗淨切件，瀝乾水份，撲上生粉以半煎炸兜炒至熟，起鑊，瀝乾多餘油份

2)伊麵兩個用熱水煮淋，隔水放進深盤中備用

 

3) 準備一碗雞湯，加入小許鹽，胡椒粉同麻油，同時準備生粉水(埋芡用)

4) 用鑊煮熱(3)，蟹回鑊，逐少加入生粉水至合適濃度，隨意加蔥花，再把全部材料淋在伊麵上便成 。

**上湯份量可隨意加減。

自製午餐盒

喺太古城返左廿幾年工，D食肆食到悶哂，呢排每星期都會為自己整兩三日午餐盒，住家飯盒也可以好精美，而且配大量蔬菜，既健康又吾駛傷䐉筋，雙贏！ 

呢度係上星期同聼日的午餐，成本最貴係黑豚肉餐，要三十幾蚊，其餘每個廿蚊有找，也不錯吧！