酥皮蘋果批 (食譜)

話o左要"Tum" o下阿B同伴讀書童(即係我嚕)，一定要整樣甜品。 我諗最容易都係酥皮蘋果批啦掛。   我公司每日都有幾十個青蘋果放o係 reception比d  staff 同  guests食，咁琴日放工就拎o左一個，跟住去Apita買o左包酥皮同枝玉桂粉返屋企。 天氣好濕同熱，翻到歸包酥皮都開始軟啦，個包裝上寫住唔好溶雪後開翻雪，咁我返都屋企就立刻將佢一開五，只用o左兩份，(因為老公要返工)，其餘3份就即刻放入冰格，希望唔好浪費啦。
一共整o左兩個 (4" x 5")，我同亞B share 一個，另一個就送o左比關太食。

材料好簡單：

牛油小許
青果一個切粒 (臨炒先切，唔係會變色）
提子乾隨意 (可以唔加，但我最鐘意，所以加埋，整之前要用小小水浸軟)
糖   2-3茶匙 (視乎個人口味，可加可減)
玉桂粉隨意
檸檬汁數滴 (本來唔使加，但雪櫃有本個檸檬，就隨手搾幾滴，無就算啦)

做法：
用小許牛油起鑊，炒蘋果粒一會，加入糖炒至糖完全容解
加入玉桂粉炒勻，加入提子乾 (倒去水份）
以上材料上碟，攤涼
預熱焗爐200度
酥皮roll成長方型，2mm 厚
把餡包入酥皮, 邊位塗小許蛋漿，用差壓邊
入爐200度焗約20分鐘，或至金黃色。
耍上糖霜，可伴雲呢拿雪糕伴食，更加美味。

星期日老公返工，夜晚得我同阿B兩個，我呢排晚餐又要介殿粉減肥，所以都係買ｄ簡單野返屋企整。

呢碟係阿B o既，我o個碟"走粉"。

做法一字咁淺：

龍利柳兩片 - 解凍，切底抹乾，用小許胡椒+海鹽醃一小時

沾蛋漿，再上面粉(薄薄的)，煎至兩面金黃熟透便可。

*我好懶，白汁係用罐頭磨菇湯，再灑上黑椒，快，靚，正!!

日式甜咖哩

我係日式甜咖哩o既擁躉，上星期係Youtube見到有個台灣節目用蘋果咖哩磚整雞 (不過只上載了一半，真弊)。  今日去百街shopping時見到有蘋果味既咖哩磚賣，今晚就整o黎食下先。

 

我用o左去皮雞脾肉1塊 (用小許鹽醃半小時) ，金荀1小條，蘋果1小個，薯仔1小個，全部切粒，再用了一盒咖哩磚o黎整 (因為係做甜咖哩，最後凈係加糖調味就得) 。 雖然每樣食材都係用少少，但煮出  o黎竟然有大半褒(煮公仔面的sauce pan)，就即刻畢o左一碗比隔離屋，一於分甘同味。

結果味道真係差唔多好似o係出面食咁好味，so good!!!  最有，原來ｄ蘋果同日式咖哩真係好夾架。

京都肉排

嚴格o黎講，只可以叫京都肉，因為我係買ｏ左梅頭肉整，並無"排"。 因為五點先去買餸, 如過買豬排一定醃唔徹，於是就買梅頭肉切片，返屋企琢鬆再醃，我仲死驚佢"un", 用支差係咁督佢地，醃o左一個鐘，都夠入味，仲夠曬"林"添。 酸酸甜甜，好開胃啊!!

涼拌海踅頭

每次去東湖飲茶，都會叫海踅頭食，要$30+一碟，得十幾舊倒，因為唔係間間酒樓都有得食，所以貴d都會叫黎食。(平時大家食o既海踅係一條條o既，應該係鬚黎既)，開踅頭係滑d正d。

呢排因為Apple (阿婆o既暱稱)病重，成日都要去律墩治醫院探佢，每次都會經過灣仔街市，竟然見到有海踅頭賣，就買d返屋企試整。 食o既時候再加d用糖+醋醃過的青瓜，好清新，好開胃。
海踅頭並唔難整，回家將海踅頭切粗粒，用蝦眼水(約80度左右)煮一陣，好快就要撈起，因太熟會變橡筋一樣，跟住用水浸去鹹味(海水)，要換幾次水直至完全淡口。 瀝去水份，用小許雞粉(開小許滾水)+生抽+麻油就食得。

Ah B 終於恨到喇!! - 焦糖燉蛋

應承過Ah B，如果佢乖乖地介口(凍同甜)，可返就即刻整焦糖燉蛋比佢食，佢呢兩個星期都好乖，就算我同Daddy食雪糕，佢都係睇住吞口水，乖仔!!
今日佢終於無咳，d藥食晒全部療程，就守諾言整比佢食，睇佢幾開心。
上星期六特登買o左幾隻梳芙厘杯，比以前用開的鐵杯大ｄ，又靚ｄ阿。不過以前用鐵杯傳熱ｄ，燉蛋好快焗熟，用梳芙厘杯無咁傳熱，要焗耐d，不過真係靚好多o既。

翠肉瓜甘荀牛肉

呢味餸好味，又靚又可送飯，牛肉係o係惠康肉檔買的，已醃好，味度同口感似係酒樓食o個d，想o係屋企食牛肉又怕"un"的話可以試下，相信佢同酒樓一樣落左添加劑去醃，但係耐唔時一次無乜壞o既。


做法係：
1) 甘荀切粒蒸8分鐘(瀝去倒汗水)，備用；
2) 先炒牛肉至８成熟，炒時下小許黑椒，備用；
3) 下小許油炒翠肉瓜，一會後下金荀粒，再下牛肉兜炒；                               
4) 用小許蠔油，生抽，糖 ， 再加豆粉小許和水小許，兜炒便完成。