酒香薑葱雞煲 (食譜)

酒香薑葱雞煲

呢個酒香薑蔥滑雞煲短短一個月已經煮咗3次； 受歡程度可想而知！ 朋友都想話自己試做吓整； 今次專登剪輯咗Video； 就可以邊睇邊煮喇！ 

先用鑄鐵鍋煮再用餘溫將雞焗熟； 保留肉汁； 雞肉嫩滑， 料頭方面薑、蔥、蒜、芫茜頭、乾蔥鍾意點配搭都得。 我落咗大量乾蔥； 煮完吸曬D雞汁； 超甜超好食。.

有興趣嘅朋友仔都可以試吓； 必成功！

食譜： 

材料:
雞一隻
雙蒸酒 3湯匙
 
醃料：
四季鹽焗雞雞粉 3/4包
油1湯匙
 
料頭：
薑粒一件 （切1cm粗粒）
紅蔥頭十多粒
蒜數粒
芫茜頭數棵
 
1/雞斬件洗淨； 徹底瀝乾水份； 加入鹽焗雞粉撈勻
2/再下油撈勻醃2小時
3/鑄鐵鍋燒熱2湯匙油； 下所有料頭爆約30秒
（料頭要足夠鋪滿底）
4/把雞件均勻鋪在料頭上 
（雞件不要重疊）
5/在鑊邊淋進雙蒸酒； 立即蓋上鍋蓋
6/中火煮8分鐘後立即關火焗分鐘（中途不要開蓋）
7/完成後灑上大量芫茜／蔥粒便可享用！
 
本來叫無水薑葱雞煲； 但因為佢有加雙蒸酒，所以我決定改名為【酒香薑葱雞煲】
原食譜係用瓦罉；將雙蒸酒淋喺蓋邊等佢流入煲內； 屋企無就改少少做個鑄鐵鍋版直接將酒贊入先概算上煲蓋煮； 後果一樣好！ 就改名為酒香薑蔥雞煲啦!

 

一人前 - 吉野牛肉飯定食（食譜）

 

一人前 - 吉野牛肉飯定食（食譜）

星期日忙完一個早上 ,下午Baba返工，煲煲下劇瞓著咗😆  晚飯就簡單煮個吉野牛肉飯食， 雪櫃常備日本豆腐，麵豉湯包同叮叮珍珠飯，就來個一人餐，繼續邊食邊煲劇, 爽🥰🥰

材料：(以下為二人份量)

薄切肥牛片 350克（越薄效果越好）
小洋蔥 1個（切幼絲）

配料：
蔥粒、烘香芝麻
珍珠白飯

自調汁料：
味醂（日本料理酒）100ml
生抽 2.5湯匙
糖 適量

 

食譜:

🍳 烹調步驟

1/ 處理食材：薄切肥牛片退冰後切成粗絲；洋蔥切成幼絲。

2/ 爆炒洋蔥：燒熱易潔鑊，下少許油，放入洋蔥絲爆炒至半熟。

3/ 熬煮醬汁：倒入調好的味醂和生抽醬汁，煮至洋蔥完全熟透、變軟。

4/ 加入牛肉：放入肥牛片，迅速用筷子把牛肉弄散，讓它們均勻沾上醬汁。

5/ 餘溫迫熟：肥牛片煮至 9成熟 時便可熄火，利用鑊中的餘溫把牛肉迫至剛熟（這樣牛肉會嫩滑些）。

6/ 組裝盛盤：把牛肉和洋蔥汁在熱騰騰的珍珠飯上，灑上芝麻及蔥花即可享用！

 

 

番茄炒蛋

 

番茄炒蛋

呢餐約咗Owen公公上嚟屋企食飯； 整咗D老人家啱食嘅餸； 以少骨； 軟腍為主。 呢餐Owen幫手整咗個番茄炒蛋。 公公知道係Owen整嘅就成餐飯不停讚好味; 食咗半碟!

個女整個三味連提都無提； 偏心到呢………   不過粒孫又真係好錫公公嘅； 見老豆食得咁開心； 無投數喇！

 

是日公公少骨餐：

上湯浸娃娃菜

煎豬扒

鹽燒鯖魚

Owen番茄炒蛋

 

呢個係我自家食譜，嚴格o黎講係蕃茄汁撈滑蛋哈哈！

(睇o下就知點解)， 我成家都好鍾意食架！

 

信呢個會簡單d ：

 

材料：

蕃茄 2 (大)   

水   2湯匙       

茄汁  1/3枝   

糖  1.5-2湯匙 (視個人口味加減)

大蛋  6隻

 

1. 蕃茄兩個，一開6，再將裏面jelly狀種子同肉分開，落鑊炒至半熟（香D同減少出水

2. 下茄肉兜炒至開始軟身； 下1/3枝茄汁、糖調味

3. 煮至稍為收杰，試味； （酸甜o岩自己口味便可）

4. 蛋加小小鹽打勻，易潔鑊下3湯匙油燒熱，下蛋轉中火，慢慢從外至內推，推至蛋8成熟，再將茄汁加入輕輕推至蛋9成熟兜勻便可上碟。

家鄉蓮藕煎肉餅 (圖文食譜)

 

家鄉蓮藕煎肉餅

呢個煎肉餅望落已經好吸引， 一口咬落去, 口感、味道層次超豐富！  加咗鯪魚肉嘅肉餅Q彈， 蓮藕粒爽口、 蝦米、臘腸、冬菇味加埋重手芫荽蔥粒， 香味衝曬出嚟！   淨係睇文字都知道有幾豐富喇！ Baba一口氣食咗兩大碗飯;  Owen空口鯨吞三件一路食一路讚👍。   下廚嘅滿足感就係見到屋企人食大啖大啖咁食得開懷喇💕💕！

材料： 
蓮藕100g
鯪魚肉150g
豬絞肉150g
蒸軟蝦米粒1湯匙
熟冬菇粒1湯匙
蒸軟臘腸粒1/2條(切粒)
芫茜蔥粒適量
胡椒粉適量
蛋白1隻

豬肉醃料：
生抽2茶匙
糖1/2茶匙
 

1.   豬絞肉加醃料撈勻備用

2. 蓮藕洗淨後去皮；再切成小粒備用 

3/  燒熱2茶匙油； 先以慢火爆香冬菇粒、 蝦米粒後再放進臘腸粒及蓮藕粒略爆後盛起徹底待涼
     **不用把蓮藕煮熟；目的只是去除青澀味。  

     

4/ 全部材料放在深碗中； 加入蛋白順同一方向攪至結實

5/ 再拿起肉團用力撻至起膠性

6/  用保鮮紙蓋好冷藏30分鐘

7/   取出肉團; 手沾小許水把適量肉團搓成小球狀再壓扁成圓餅狀

 

8/  易潔鑊倒進適量油後排進肉餅； 慢火燒至油大熱後蓋上鑊蓋慢火煎2分鐘，揭開鑊蓋把肉餅反轉;  反覆煎至兩面金 ;       黃便可盛起； 襯熱享用

免炸健康版 【魚香茄子】

免炸健康版 【魚香茄子】

我家老頑童（89歲老父）最愛食物榜首系【魚香茄子】； 一般餐廳會用油炸法， 油膩得驚人！今次為他做了這個以蒸代炸的方法； 效果一樣美味但健康得多！  多些吃也無妨！

材料： 
鹹魚肉20克（切粒）
茄子350克
豬絞肉（瘦）200克
蒜粒兩湯匙

醃料：
生抽2茶匙
砂糖1茶匙

汁料：
蠔油2.5湯匙
生抽1湯匙
砂糖3茶匙
水70毫升
生粉水適量

1) 豬肉先用醃料醃20分鐘; 茄子切成條狀， 立即大火蒸四分鐘至半熟備用

2) 燒熱兩湯匙油， 將鹹魚粒炒熟， 再下蒜蓉爆香

4) 下豬絞肉爆炒至肉熟透

5) 下茄子翻炒一會;  下水及汁料中火煮一會至茄子軟身（不要煮爛） 及稍為收汁

7) 試味， 用少許生粉水埋薄芡便完成。

Tips:   不同品牌的調味料味道不一,及鹹魚鹹度不同， 請按自己的口味將調味料的份量微調。

焦糖燉蛋.....香， 甜、脆、滑、Yummy! (食譜連結)

焦糖燉蛋.....香， 甜、脆、滑、Yummy!  (食譜連結)

呢個甜品真係人見人愛㗎！   焦糖面同燉蛋兩個唔同甜度、口感； 集合香， 甜、脆、滑； 食咗人都開心D。 難怪個個客人聽到Mama整咗Creme Burlee都笑晒口。

最搞笑係我有D唔食甜嘅朋友仔； 初初話試一啖, 結果成杯食哂仲想encore， 哈哈！

正式焦糖燉蛋唔會加蛋白, 但我加入2隻蛋白;  個人覺得質地會較firm D及滑D； 仲唔駛咁浪費。 

***下面係不失敗食譜啦！***

食譜(約10個2.5吋小杯):

材料 ： 
淡忌廉250g
全蛋2隻 + 蛋黃2個
奶250g (我用高鈣脂奶)
糖50g

1) 淡忌廉+4個蛋黃及2個蛋白打勻
Tips： 不要過份打發； 打勻便可

2) 奶+糖慢火加熱, 煮至糖溶解
Tips： 不要著滾； 煮至糖溶化便可

3） 火待10分鐘至降溫;    將奶加分三次加入忌廉蛋液中, 期間一路輕力攪拌
Tips： 可座水加速冷卻

4)  將蛋液過篩, 倒入小杯中

5) 將杯子放焗盤中； 注入熱水（約到杯1/3高）

6）小心把焗盤放進放入預熱130度的焗爐內, 焗約25分鐘左右或至蛋凝固便可出爐 
**個別爐溫可能有別； 建議焗15分鐘後觀察一次再調整時間

6) 燉蛋冷卻後蓋好放雪櫃冷藏

7) 奉客前在蛋面上平均灑上適量砂糖或黃糖, 用火鎗燒至糖溶化燒好後放雪櫃10分鐘便可食用

（目的是減低燒焦糖後的溫差； 不要雪過久；否則糖面會溶化）

Tips： 如蛋面有水份要先用廚紙印去才灑上糖

註： 

**焗的時間按杯的厚薄 / 深淺自行調節.

**坊間一般食譜無加蛋白, 但我加入2隻蛋白;  個人覺得質地會較firm D及滑D