My Happy Birthday

今年過了很特別的生日，Owen一早約定我話要親自煮飯比我食，今次係我第一次留O係屋企食生日飯。我同爸爸都無抱好大期望，以為佢下杷輕輕，到o個朝先知佢煮乜，結果又出其地好喎。 17歲的他，由寫菜單到買料，洗／切／炒都包辦，我只係在旁口述，佢照做，仲做得好好添，真抵錫呀。　呢幾個綵唔難整，牛肉係O係惠康買的現成貨，我只係教佢整左個汁，蝦仁炒蛋佢母親節整過，所以無乜大困難。　不過我覺得佢都好叻仔，仲好有我心添。

加埋老公一早起身睇住Ipad整的咖啡布丁(將牛奶布丁變成咖啡布丁)，雖然佢地都有d雞手鴨腳，但呢餐真係很甜，很難忘呀!

鹹菜胡椒豬肚湯

平時同屋企人飲茶，如果見有呢個，都會叫碗食下。  上星期五同同事一檯十三人去飲茶，又叫左兩碗，不過份量真係好少，一人無一件豬肚，真係唔係幾夠喉架，仲唔平添。 

前日行過Apita超市，竟然比我見到處理得乾乾淨淨o既巴西豬肚，仲好平添，廿幾蚊一pack, 琴晚返媽子度晚飯，見多人就心思思想整比屋企人試下，咁o岩仔仔去太古城朋友仔到玩，就拜托佢回程時幫我買，夜晚可以拎去媽咪家同屋企人分享。

做法同材料其實真係好簡單，整出黎仲同出面一樣味道架。  鐘意o既朋友可以試下 (不過始終係高膽固醇食物，耐唔耐食下好了)。


食譜：

-豬肚一份 (我買左274g，有成廿小件)
-雞湯適量
-鹹菜半份 (街市雜貨店有售，最少買半棵，用剩包好放雪櫃下次用)
-白胡椒粒2茶匙
-胡椒粉(隨意)
-唐芹斷 (隨意，呢個一般係無o既，不過係我同哥哥至愛，都好夾架）

－鹹菜切條用水浸1小時，撈起備用
－豬肚洗淨，切去多餘脂肪塊，用滾水煮2分鐘，撈起備用
－用小煲煮熱清雞湯，或清水加雞粉亦可
－下胡椒粒，豬肚，小火煮45分鐘，
－下鹹菜，再煮20分鐘，試味，如不夠辣好添加胡椒粉
－下唐芹段，關火，完成。

**鹹菜一定要浸，否則會超鹹，亦因為佢半身有鹹味，所以呢個菜不用另加鹽調味。
**如果喜歡食鹹菜，可以下多一點，不過最後調味時可能要多下點湯調味。
**我係第一次用原粒胡椒，發覺很香，但不夠辣，所以喜歡辣要另加胡椒粉調味。

 材料

 

條氣順晒 - 焗西米布丁

有睇我網誌o既朋友都會記得我之前去前老闆Yvonne屋企食飯，整左布丁全餐，牛奶同綠茶係大成功，我好滿意，但係西米布丁就失敗，太"削"，唔夠實，令我梗梗於懷，琴晚發夢都夢到整西米布丁。 但係d同事就非常窩心，係咁話好食，可能驚我唔開心啦。

但係屋企d吉士粉用晒，百佳，惠康都無得買，今日先o係Apita 買到，今晚就即刻整。

今日仲係我第一次將整呢個布丁o既流程拍低，因為Joyce 話要新年前學識呢樣甜品，新年整比佢老公同家人食，就試o下拍低佢，等佢唔駛特登老遠黎我屋企學，希望佢o岩駛啦。

今次就好成公，終於順翻條氣，唔駛成日chok 住條氣啦。

以下係食譜，呢個係我經上次失敗後，檢討後得出o黎o既，過然成功了：

約7小杯份量 -材料： 

1	西米  ４0g
2	吉士粉 30g +粟粉 10g ＋50ml水開勻 (或用 吉士粉 40g  + 50ml水開勻 亦可)
3	牛油     30g    糖   40g (按個人口味加減) 水分 200ml (可以係水 + 奶 或 椰汁)
4	蛋 黃1個 (蓮蓉隨意)  (如下蓮蓉，糖最好少點，否則會太甜)

做法：

(1) 滾水放入西米，轉最細火煲5分鐘，熄火，焗至半透明、過冷河，完全冷卻後浸在凍水中，到煮之前隔水備用
(2) 吉士粉+粟粉用50ml水開勻
(3) 材料(3)加入加熱至牛油同糖溶化
(4) 逐少加入(2)吉士粉水，邊煮邊快手攪勻，免結成小塊，再加入西米攪至杰身
(5) 熄火加入蛋黃(4)攪勻，入模

*倒一層薄的布丁漿入模，加入蓮蓉，再倒入一層較厚的布丁漿，
*放入已預熱200度上火(高架位) 焗至面層起焦便可 (我用了約20分鐘)

Brownies 變身

前晚做蛋糕用剩嘅Brownies, 動動腦筋，加埋屋企有的材料， 就變身成為另一道美味甜品，一餅兩吃，冇浪費.  呢個食法好好味呀，賣相又唔錯，一樣有三個唔同口感 (脆口的杏仁同朱古力，軟滑的雪糕　+　Brownies的煙韌), 呢個組合比起之前的迷你慕絲簡單好多，而且用具同工序亦少好多，大家可以試下，客人們實會喜歡呀。

Owen堅持用朱古力味雪糕（小朋友口味），但係我同老公就覺得用雲呢拿味雪糕無論觀感同味道都匹配好多喇。

 

迷你版brownies 底香蕉朱古力慕絲

 

 

今日老公宴請兩位同事同家人，共七大兩小，設計菜單時要照顧兩位三歲同五歲嘅小客人，又要迎合大因口味,最後七味餸加兩個甜品，各賓客都好滿意，通通一掃清，老公仲教佢地打台灣麻雀，成晚笑聲不斷，大家都好盡興呀！ 

是日兩款宴客甜品 - 迷你版brownies 底朱古力慕絲,  + 人見人愛嘅焦糖燉蛋, 佢地讚D甜品賣相同味道有質素，氹到Owenmama 超開心。

今次重點介紹迷你 Brownies 底朱古力慕絲,  我習慣加一小節香蕉喺慕絲入面 ,我覺得口感會清新啲同會帶出朱古力香, 裝飾方面， 因為用鏡面， 簡單裝飾就得，唔係反而太over, 我只係唧左小小用剩嘅慕絲，同用點左朱古力嘅杏仁粒，加埋小片朱古力葉片就得。 三個唔同層次嘅朱古力味，包你會愛上佢。

製作流程:

1) 先焗好Brownies, 用小模切為小件（放圓模在上，用力按下就得），再片薄一半成為餅底。（改用蛋糕或消化餅底亦可）

2) 用唧袋將慕絲唧入模內至7成，加入一小節香蕉（如不愛香蕉可省）再封頂，預留兩分位給鏡面, 雪4小時至慕絲成型，

3) 製作朱古力鏡面, 當鏡面涼至40度左右，淋在蛋糕上, 雪至凝固。(不用鏡面，平頂灑上可可粉作裝飾亦可，亦會簡單D)

 4)  脫模（我用火鎗），隨意裝飾便完成。

Brownies食譜：

http://owenmama730.blogspot.hk/2014/06/brownies-with-ice-cream.html

朱古力慕絲 (10 x 2.吋模)

黑朱古力 150 克 淡忌廉 370 克 冧酒 2 茶匙 (可省)
糖 60 克 魚膠片 8 克 朱古力鏡面一份
   
1)   淡忌廉加糖打起(7分, 起紋便可） 放雪櫃內備用（預留 3 湯匙）
2)   朱古力隔水座溶，加入冧酒攪勻備用
3)   之前預留的 3 湯匙淡忌廉隔水煮熱，放入已浸軟魚膠片，攪至完全溶化，倒進朱古力槳中，充份混合，
4)   加入打起的淡忌廉混合成慕絲糊
5)   蛋糕置模中，雪 4 小時 至慕絲成型
6)   淋上朱古力鏡面, 雪至凝固, 脫模便成。
 

朱古力鏡面
水　 50g   /   淡忌廉　 40g / 糖   60g    /   可可粉 20g   / 魚膠片   5g
1)   忌廉 + 水＋糖煮滾
2)   滾至起 泡後加入可可粉，其間不斷攪拌，以免黏底，息火
3)   加入浸軟魚攪片，攪拌至溶化, 立即過篩
4)   當 (3) 涼至 35 度左右，淋在蛋糕上雪至凝固便成