亂拍青瓜

 

琴日同老公去左公司樓下o既京華飯莊(即係北京樓)食晏，因為好掛住o個度o既茉莉茶薰素鵝，真係好好味架。一坐低，侍應就端想一碟前菜 ，係涼拌青瓜拼素肉粒，d青瓜好好味，不過得幾粒，我同老公都唔夠喉，今日一於整一大碟，襯今晚去阿媽度做節大家食返夠本先。

青瓜處理方法跟蘇絲黃o既方法，切小條，拍扁，再去掉中間籽報份，再用小許鹽醃至出水(我醃左20分鐘)，索乾水份 就可調味。

調味方面，半來想跟佢只用鎮江醋加糖同麻油，但係試味時覺得唔係好o岩我口味，我就用返涼拌茄子的醬汁，另外加埋鎮江醋整，當然仲有我至愛的芫茜啦。
有樣野好怪，我老公一向最討厭芫茜的味度，但係放落涼拌xx上面，佢就無問題，都唔知點解


家人食後評語：
係好入味架，不過家人唔係好鐘意鎮江醋味，因為較濃味，我絕對同意，所以先將Ｄ汁左溝右溝，只落左好少鎮江醋，都好搶味，下次會用返茄子個汁。

香蕉戚風小杯

琴日過媽咪道食飯，見都佢有兩條起晒梅花點o既香蕉，諗起屋企雪櫃有無個檸檬，就拎左返屋企，整香蕉戚風小杯。 一個6吋份量，可以整到9個兩吋半的蛋糕仔，我同阿B可以做早餐，剩翻o個d，今朝就比媽咪拎去同阿爸食。

樽裝綠茶布丁

見到有d網友用左個好靚o既樽仔黎整甜品，無意中發現原來係日本公司有得賣o既北海道牛奶布丁o既樽，不過好貴，$20一枝，我諗有$10係個樽o既價值，但值得一讚，個牛奶布丁的確係好香滑，好好味，所以都值o既。

我自己買左一枝食，跟住返到公司見有同事食緊，就叫佢唔好掉個樽，留比我。經過兩星期，一共儲到7枝啦，唔駛講，今日就要即用。  哈，咁""岩載到500ml份量o既綠茶布丁，簡直係 Perfect!!!!!   要黎請我部門d同事食(連埋我o岩o岩7個人)，佢地猛話個樽靚。  講真，真係好靚架，仲可以整其他布丁/甜品添。

好開心，以後又多幾個好拍檔喇。

極品藍莓芝士蛋糕

上次試cheese bar 新模時用剩左ｄsour cream, 今日到期，唔想浪費，就再整多次藍莓芝士餅，襯今日有友到訪，就用黎招呼佢地，一舉兩得。

今次個餅切得好靚，你睇幾多藍莓係裡面..... 仲好creamy 添。

Owenmama生日感恩+回顧

到星期三(30號)，就係 Owenmama o既大壽，正式步入中年喇。　時間真係過得好快，一陣風咁就同老公３０年啦(咪以為我地好老，其實我地10歲就識，一齊玩，係屋村o既鄰居)。 好彩到今日我地都仲係非常恩愛，全賴老功處處遷就同容忍我d臭脾氣，唔理我o岩定錯，佢一見我唔開心，就一定開口"tum"翻我。 不過自從阿b出左世，我ｄ脾氣都開始改好了一點，因為我開始要去遷就別人了，個個都話無人治到我，除左個仔喎，激死死。

做人要懂感恩，雖然我無宗教信仰... 多謝已離開的Cindy，令我更識欣賞真惜身邊的一切, 因為唔知自己有幾長命，諗起就要寫低，萬一忽然走左，老公都知我諗緊乜：

-感謝上天賜給我一個近乎完美的男人, 咁多年來，對我越來越好，連食飯叫餸都係揀我鐘意的，從無諗自己；愛我, 愛阿b，愛埋我屋d企人，最緊要係愛做家務，hehe...... 我由細到大，除左煮野食，對其大家務都無參與。　而我老公因為十歲死媽媽，十九歲死爸爸，家姐早嫁，又有一個弱智的哥哥 (係咪似粵語片情節？) 所以，自小就要照顧家務，同我呢個懶鬼簡直係天作之合呀。 佢真係對我好好，仲成日同我講，如果佢有錢d，我將會係世上最幸福o既女人 (不過我而家都係啦)，多謝老公。 我以後會盡力改我d臭脾氣架啦。 我一野蠻你就發我圍啦，我受得住架。

-感謝上天賜我一個超b，阿b真係好叻，佢8個月就識自己楂奶樽食奶，一歲就介尿片(不過全靠婆婆o既訓練功勞)，仲有，佢記性好，悟性亦高，讀書學野好快就記得，缺點係違全左我o既墮性，坐唔定囉，無耐性。不過佢係一個好有家人心的小朋友，我都好安慰。 亞b，如果你以後勤力d，認真d，就perfect la.

-感謝上天賜我一個幸福家庭，好媽媽，爸爸，家姐，哥哥同自小都好照顧我地的兩位阿姨，如果世上真係有神，我誠心向你祈求，希望你保守佢地同佢地o既 家庭。

-感謝上天賜我一份好的功作，我o係呢間廣告公司工作了19年了，工作環境，同d同事都對我很好，好似家人一樣，不過老公話我做到廿年就要我退休喎，不過咁開心，我唔係幾捨得囉。
人生都行了一半(或大半)，到現時，我真係無憾，亦唔知幾時會離開(我有時都幾灰)，希望上天保守我老公同阿b，令佢地每日都過得咁開心啦。

***********************************************************************

星期六一家三口去左中環碗屋食日式放題預祝生日(正日放假老公友北上，買o下餅具啦)，上次去好正，因為係成期四，貴d同d野精緻d (hk$338 +10%)，魚生壽司，食鐵板燒同串燒，星期六係食和食+魚生壽司，平小小(hk$298 +10%)，除左送o個個鮑魚好正，魚生保持到水準(不過明顯上次presentation正好多囉)，其他野都係一般，有ｄ失望囉(無影相的衝動)，不過一家三口齊整食飯，一樣咁開心。　值得一提反而係個最簡單o既豆腐沙律，佢用左麻醬沙律醬，同加入日本小纓蝦，崧子，好夾味，好清新，下次我係屋企都會試o下整。

簡易蠔油雞翼 （食譜)

本來每個星期日都唔駛煮飯，媽子同老豆會去探亞姨兼食晚飯(做節除外)，但係媽子胃病入左院機日，我地日日去探佢，無啖住家飯食，琴日打比佢，佢話好返9成，等埋今日照胃鏡無事就可以出院，真係好。 我同佢講我唔上醫院，留係屋企煮餐飯比老豆食，連續幾日出街食，對老人家都唔係咁好。

老公話我好耐無整過濠油雞翼，諗o下又係喎，我諗都有半年無整啦，阿b聽到都話要食，佢最鐘意用汁撈飯。

做法好間單，

-雞翼溶雪，抹乾水備用
-燒紅鑊，用3片薑起鑊，至聞到薑的香味
-雞翼落鑊兜炒一會，下小許花雕酒　（不要炒燶）
-下水，濠油，生抽，糖和小許老抽  (作用令顏色深一點)
-細火炆約25分鐘，試味，便成。

**水份不要太多，剛蓋過雞翼就得，如煮好後汁太稀，加點調味，然後打開煲蓋，大火煲一會至收汁，不過記得睇火呀

透心涼 - 水果蒟蒻凍 (附食譜)

今日屋企又剩返我一個，老公返早，放四點，呀仔一早去踢波。 夏日炎炎，最好"俚"o係屋企上網喇。 睇到 網友Yen整蒟蒻凍，好靚好好味咁。上個月係二記買左包蒟蒻粉，一路未開，屋企又有蘆薈蘋果汁，就試下整。 等阿b同老公返黎解o下暑。

整出黎都好靚，唯一覺得不太完美就係蘋果汁內的蘆薈粒太多，令到個果凍不大通透，下次會用淨蘋汁，應該會再透再靚d。

相信，呢樣都算係最健康，最低卡o既夏天甜品，多食小小都唔驚喇。

食譜如下(改自Yen的食譜)：
a)      蘋果汁400ml
b)      水300g + 糖3湯匙 (按個人口味加減)
c)      蒟蒻粉30g
d)   水果適量

做法：

1)        蒟蒻粉＋水混和至無粒粒，
2)        再加入糖和半份蘋果汁
3)        細火煮至透明狀，再加入其餘半份蘋果汁攪勻(幫助降溫)
4)        於鐵模內放入水果，再倒入蒟蒻液，雪凍便可。


**Yen 的食譜無加入水份，屋企係剩返400ml蘋果汁(無計，唯有加水同糖)，都有好處就係令顏色通透d，亦可只用蘋果汁。
**蒟蒻液一攤凍好快就會開始凝固，步驟(3)後就要倒入模內啦。