情人節自煮晚餐 - 牛油焗龍蝦尾 (附起肉示範video)

  一如以往，情人節我同老公都會留ｏ係屋企玩煮飯仔，費事出去同人迫。

今年情人節晚餐嘅主菜 - 有焗龍蝦尾配牛柳，如果大家都有興趣學試做，睇下呢個video就清楚。

請按以下link往YouTube看video：

龍蝦尾起肉示範video 

起肉後，用少許鹽，黑椒醃十分鐘，灑上牛油粒，放入預熱二百二十度的焗爐焗12分鐘便可。（時間請按龍蝦尾大小自行調節）

泰式酸辣魚煲

星期六兩父子異口同聲話想食泰國餐，見禮拜体息無乜勢藝，一於整返餐全泰餐満足佢地。　

兩父子好滿意，大滿足！
 
菜單：
1）泰式酸辣盲鰽魚煲
2）魚露炸雞半翼 (食譜已舖)
3）甜品-班蘭葉椰汁西半布丁 (食譜後補）


呢除左雞翼好耐前整過，酸辣盲鰽煲同甜品都係初試。　　我地一家去食泰國菜都起歡叫魚爐，喜歡佢個湯酸酸，甜甜，辣辣好開胃，不過香港多數餐廳都係用烏頭　（泰國曼谷食到的反而係盲鰽），我地就麻麻地。　　今次我都買左條大盲鰽，屋其無魚型爐，就用邊爐鍋上，用娃娃菜墊底，呢個我無跟任何食譜，完全係靠味覺記憶煮出黎，因為唔複雜，所以整出黎好似樣呀。


＊＊用盲鰽有個好處，就係佢煲耐左ｄ肉都唔會”鞋”又唔會好似烏頭咁有草青味。


材料：

盲鰽一條　（我買的約１斤重）

配菜：

舖底：　娃娃菜２棵


灑面用：　唐芹2 棵
　　　　　　芫茜數 棵
　　　　　　蔥數棵
　　　　　　(全部切段備用)



湯料：

雞湯1000ml (我用邊爐鍋，加上魚很大，所以湯的份量要多一點）
蒜肉１０粒，切粒備用，
指天椒 切粒 (多少隨意)　我怕辣只用左兩隻
青檸３個，榨汁備用
糖約３湯匙　（每人喜歡ｏ既酸甜度不一，份量自行調節吧） 



做法：
1) 用小煲煮滾雞湯，下蒜粒，青檸汁，糖調至合自己的酸甜度熄火
2) 娃娃菜切碎，舖在邊爐鍋底，加入半份湯料備用
3) 盲鰽洗淨，隔水蒸至熟 (時間按魚大小調節），將魚轉往鍋內，加入另外半份湯料，加入辣椒粒，灑上配菜
４）開火，至滾起，便可邊滾邊食，用辣椒魚露佐食，風味一流呀！

泰式魚露炸雞翼

有一年同老公o係曼谷Greyhound 食過呢個炸雞翼之後就愛上左， Owenmama 返到屋企當然唔會放過，一於試下學佢整。 製成品像真度有90%架，老公耐唔耐就會話想食，但因為有魚露，炸過o既油唔可以翻用，好浪費所以無整。   咁o岩前日炸春卷留低左d油，就用多一次成倒就無咁浪費喇。兩年無整，老公同仔仔食得好滋味呀.

雞翼簡單到震，因為佢較乾身, 卜卜脆好香口，用黎送冰凍檸茶／可樂，或者送啤酒就無得彈啦。　　呢個只係不正宗ｏ既冒牌，不過好味就得喇。

材料：
雞中翼１５隻（選大的，唔係剪開炸完無乜肉食），洗淨，抹乾，一剪為二，用醃料醃過夜

(醃料：　泰國魚露２.５湯匙　／　花雕酒３/４湯匙 ／　老抽１茶匙 (純粹加D顏色)

-炸前一小時從雪櫃取出，讓雞翼回復失溫 (否則炸時油溫會急速下降，影響火力)

-以慢火熱油炸熟雞翼，擎去多餘油份，炸第一次目的係要炸熟 (左圖就係炸左一次o既樣)

-臨食前用以滾油以大火翻炸至乾身香脆，便可上碟，(可用泰式雞醬佐食)
**唔翻炸唔會乾身香脆架。

溫馨建議：

*魚露份量可就個人口味加或減。 不過魚露唔同牌子，鹹味都可能有出入。

*我星期六只先用了2湯匙魚露，琴日中午用焗爐整左一隻試味，發覺唔係好夠味，所以加左半湯匙魚。 建議你地都好似我咁，先落少D份量魚露，試味後先按個人口味調整。 咁就唔會失手啦。

*老抽作用純粹係令雞翼係”整色整水”，唔喜歡可以刪去。

**一定要炸兩次，第一次係炸要炸熟D雞翼，第二次係將雞翼內多餘的油份和水份迫出黎，咁先會乾身香脆

蟹肉蛋白扒豆苗（附食譜）

臨過年前，叫老公幫我喺樓上凍肉店買左兩磅蟹肉準備過年用，我都未試過，不過見個list有，仲24蚊一磅咁平，一試無防呀！。年初五嗰日Owen負責蝦仁炒蛋，我就整咗蟹肉豆苗同埋懶人雞翼，兩母子拍住上整咗呢餐美味晚餐。

急凍蟹肉只係24蚊一磅，有半舊磚頭咁大，要隔夜放在雪櫃普通格溶雪，用溶雪後都幾腥㗎，不過唔使擔心，處理咗就冇問題啦。  

老公食過，讚味餸味道同賣相都有酒樓水準添，氹到我鬼咁開心。

食譜：

豆苗一斤四両

急凍蟹肉一磅裝一件（溶雪後得返大半磅左右）

上湯450毫升

蛋白2隻

鹽，胡椒粉少許

1）急凍蟹肉隔夜放雪櫃普通格溶雪備用 

2）徹底楂乾水份，用兩湯匙油炒香備用

3）豆苗炒熟，放在筲箕上，稍為瀝乾水份

4）用鑊煮滾上湯，加入蟹肉，加小許鹽和胡椒粉調味，再滾起時，用生粉水埋薄芡，熄火，倒入蛋白輕力推成蛋花，最後將芡汁淋在豆苗上便可。

懶人雞鎚

年三十買左１２隻黃油雞全翼整糯米雞翼，　裁左１２隻雞鎚出黎放左o係冰箱，琴晚就用佢地黎整好耐無整過o既懶人雞翼。

聽個名就知呢個雞翼超級易整，食譜都只有三行，最o岩懶人整架，但味道同賣相一d都唔差架。 要黎送飯或送酒一流添。


做法：

雞鎚１２隻，洗淨，抹乾　（如雪藏雞翼請徹底解凍）
用 ３／４包四季鹽焗雞粉醃雞鎚，最好醃　３小時，臨焗前在雞鎚上掃小許油，
放入預熱２２０度焗爐 約１２分鐘，完了。

＊＊時間示乎雞鎚大小或至自己理想的乾/脆度自行調節。

送蛇迎馬團年宴

今年公司好好，年卅放足全日，於是團年飯就改為喺我度食，我同哥哥，媽媽一人煮D，大家都吾駛咁辛苦。

Owenmama：

-花膠鮑魚扒生菜

-清蒸海班

-茄汁蝦碌

-糯米釀雞翼

-素福袋

-紅豆沙湯丸

哥哥：

-蟹肉扒豆苗

-三文魚撈起

-蜜糖煎金蠔

媽媽：

-白切雞+燒肉

今年飯後甜品係中式紅豆沙湯丸，好配合團年主題呀^^

素福袋

呢個菜式，係Owenmama自創食譜，只因有日打邊爐，見D生根脹卜卜，就諗下可吾可以要嚟釀嘢。團年飯嗰日試下整比家人食。因為係做節通常會好多肉，所以加個素菜會好d。  屋企o既老人家都鐘意呀。幫佢改左個好意頭o既名叫"素福袋" 團年一齊黎接福喇。

呢個係手功菜，因為山根好薄，好易穿，要花點心機同時間，都有D難度，仲要塞到漲卜卜先至靚架。　不過有個好處，就係可以一早整定，到臨食先蒸熱，打個上湯蠔油芡就可以上檯。　大人小朋友都ｏ岩食，而且賣想好靚，屋企人喜歡到不得了。

材料：

紅蘿蔔，罐頭筍 + 鮑汁靈芝菇(美味盞)，雪耳，冬菇同山材料全部切粒，冬菇加小許生抽，糖，小許油撈勻再蒸10分鐘備用

做法：

1）炒材料，紅蘿蔔，冬菇，筍，雪耳炒勻，下少許鹽，糖，最後就落鮑魚菇粒同汁（我係用美味盞的即食鮑汁靈芝菇，有埋鮑汁，好方便），炒好後攤凍備用

2）燒滾一鍋水，熄火，投進山根用泡軟，撈起攤凍，擎乾水備用。（生根好薄，只要一軟就要撈起呀，十多秒就得，太淋會爛 

3）最後將擎乾水的山根剪一個口，便成袋型，再將餡讓入，最後用焯熟的韮菜索好袋口就得。

**呢個步驟不容易，因生根超薄好易穿，要少心同有耐性至得，最好買多D生根做後備，因為一D才身穿左，不能用。 

4）臨食蒸５分鐘，再用蠔油，雞湯打個薄生粉芡，　就係一個奉客o既好餸喇。

小貼士：

福袋內的食材可安個人喜好，落乜都得，但係建議放d爽口d的食材，我就用左雪耳同筍，亦可用馬蹄，沙葛或雲耳等代替。