完美的燶邊叉燒

 

上星期宴老公一班舊同事黎我度飯聚，當晚整左9味菜式，呢味係佢地個個最讚不絕口ｏ既一味，仲一陣間就掃清光。  呢次係我做咁多次自家叉燒最滿意o既一次，因為唔係次次買到好似今次呢幾件肥瘦相間o既靚靚梅頭肉，仲有呢次夠晒"燶邊" ，真係好有店舖出品feel。
加上一出爐即切即食，難怪客人話

下次再黎都要encore呢味呀。

呢個食譜係小女子自創，醬料比一般坊間食譜簡單，只要小心睇火同掃夠醬料，你都一樣可以整到完美o既自家叉燒。

 食譜：

半肥瘦梅頭，回家切成叉燒條狀 (肥d唔緊要，太瘦會鞋)

調味： 生抽 + 糖 / 梅瑰露 / 叉燒醬

掃料：蜜芽糖+水 (分量為1:1，坐水攪勻成漿，會易掃d)

1) 豬肉洗淨，抹乾，用老抽1茶匙+生抽1 1/2茶匙+糖3茶匙+梅瑰露酒1湯匙醃1小時 (醃料要較甜，生抽不用太多，否則會太鹹)

    *目的係令肉有底味同酒香，唔會淡貿貿

2) 加入叉燒醬醃兩小時(用手揉勻)

3) 焗爐預熱230度，把肉放進焗10分鐘，取出，掃叉燒醬(要均勻)，再焗5分鐘，再掃一次醬，再焗5分鐘

4) 取出，將叉燒轉放再焗架上，下面放盤 (盛肉汁)，掃上一朕蜜芽糖水，再入爐焗至焦香便可上碟。

   *用蜜芽糖水會濃d同靚d，同用蜜糖係兩回事
   *個別爐溫同叉燒厚薄都會影響焗ｏ既時間，最緊要睇火呀。