雲石戚風 +徒手脫模法 Video

呢個第一個用Kitchen Aid整出黎o既蛋糕，第一次用佢黎打蛋白，感覺真好呀，真係不費吹灰之力就整左呢個蛋糕喇。


我將個脫模法拍低左有興趣ｏ既朋友可以去睇下呀。

Demo :  徒手脫模法Video 


 

Owenmama朱古力三重奏

三月係大嫂，兩位姨姨同姐夫的生

日月， o岩o岩過左o個個星期日同佢地一次過慶祝，晚餐o係酒樓食，我就剩係整蛋糕。
,
一個星期前已經開始切計蛋糕，都係將唔同的食譜mix & match, 諗起我地一家人都最愛Brownies, 今次大膽構思用Brownies 做蛋糕底，於是早一日要整定，結果焗完太厚，片左個面就剛好, 第二層就用左朱古力慕絲，為左減低甜膩感，加左ｄ香蕉片，上面就用左朱古力頸面。　簡單的裝飾加上金箔，就便左呢個蛋糕啦。　

三層朱古力，三重唔同口感，呢個係自創配搭，所以我叫佢”Owenmama朱古力三重奏”　

結果係出奇的好，三重唔同的口感，底層Brownies煙韌，中間慕絲軟滑，加上香焦片好香好夾（好彩ｄ蕉無變黑，下次會加多ｄ），面層的朱古力鏡面香濃，成家都好鐘意，大成功，減肥中連飯都唔食的姨甥女仲食左三件添呀。

今次做左７吋方形，屋企無一個蛋糕底墊夠大，唯有用砧板放啦，賣相影響左ｄｄ，下次要買定ｄ大靚靚底墊至得。

Brownies食譜(７吋方形)：

90g牛油

170g 純黑朱古力 (有糖)

75杯 砂糖

1/4茶匙 幼鹽

2隻 大蛋

80杯 中筋麵粉 (All-purpose flour)

15 g 可可粉 (無糖)

做法:

(1)    將牛油, 純黑朱古力, 朱古力隔水座溶

(2)    加入砂糖, 幼鹽拌勻

(3)    加入全蛋拌勻

(4)    中筋麵粉, 可可粉先過篩, 輕手拌入朱古力中至攪拌均勻

(5)    放入已預熱180^oC的焗爐內焗約25分鐘

**焗好攤涼後雪一夜，取出攤一會用７吋放模"ut"出底片，因太厚要片開一半先可用作糕抵。

**剩下的Brownies(下欄)唔好浪費呀放入雪櫃雪一，兩天都無問.淨食或然者將佢變成另一個甜品（Brownies 變身　－　食譜按此）

 

朱古力慕絲

黑朱古力 150 克
淡忌廉 370 克
冧酒 2 茶匙 (可省)
糖 60 克
魚膠片 8 克
朱古力鏡面一份
   
1)   淡忌廉加糖打起(7分, 起紋便可） 放雪櫃內備用（預留 3 湯匙）
2)   朱古力隔水座溶，加入冧酒攪勻備用
3)   之前預留的 3 湯匙淡忌廉隔水煮熱，放入已浸軟魚膠片，攪至完全溶化，倒進朱古力槳中，充份混合，
4)   加入打起的淡忌廉混合成慕絲糊
5)   蛋糕置模中，雪 4 小時 至慕絲成型
6)   淋上朱古力鏡面, 雪至凝固, 脫模便成。
 

C)  朱古力鏡面

水　 50g   /   淡忌廉　 40g / 糖   60g    /   可可粉 20g   / 魚膠片   5g
1)   忌廉 + 水＋糖煮滾
2)   滾至起 泡後加入可可粉，其間不斷攪拌，以免黏底，息火
3)   加入浸軟魚攪片，攪拌至溶化, 立即過篩
4)   當 (3) 涼至 35 度左右，淋在蛋糕上雪至凝固便成

漲卜卜的 - 焗釀春雞

 琴晚老公返工，又係兩母了撐枱腳，前兩日o係Jusco買左兩隻600g春雞(@$19.9，去左胸骨，釀入炒飯再焗, 同手掌差唔多大，一人一隻，加個清菜沙律，好Perfect o既一餐。

做法：

 

*雞的處理：隻雞要徹底溶雪抹乾先醃，雞內的內贓要徹底清理，醃好釀飯前要用廚紙索乾肚內所有水份，唔係d血水會滲落d飯度，唔好睇有唔好食。

將雞o既胸骨除左（用較剪幫手），好彩無整爛隻雞 ，個雞肚範圍就會大左，好似一個袋咁，可以釀碗幾飯架。

 醃料方面，我只係用左3/4茶匙幼鹽去醃雞(內外都要塗鹽），醃至少兩少時，

 

釀入炒飯，要有咁實”ut”咁實，咁隻雞先會脹卜卜架，再用簽封口， 

臨入爐時 掃一層牛油，再灑上黑椒粒，入爐焗25-30分鐘（焗爐要預熱，溫度220度）。

*至於炒飯就係普通o既火腿雜豆蛋炒飯（材料隨意）。

 

沙爹甘菇肥牛

 

 

 

坊間有好多現成調味料，只要大家轉一轉腦筋，就好以用地黎做出簡單，好味，效果食肆出品無大分別ｏ既菜式。

今次我就用左沙爹火鍋湯底，做左呢個簡單到極ｏ既沙爹甘菇肥牛粉絲，食譜內的做法只有兩行字，你話係咪超簡單呀。

材料 (5人份量)：

肥牛半磅

-預先分開，中間切開一分為二

甘菇一包　

-切去根部，清理乾淨備用

紛絲2包（小）

-冷水浸軟，用鑊燒熱一鍋水，熄火，將粉絲放進 ，數秒後立即撈起，過冷河，稍為剪數短，瀝乾備用。 (呢個係我自家做法，咁處理過，d粉唔會無咁索水。

調味料：

沙嗲湯底一包

水 250g

雞粉1/2茶匙

糖1/2茶匙

做法：

將所有調味料放入鑊中煮滾，放入肥牛，略為用筷子分開，至牛肉5成熟下甘菇，繼續用筷子攪動至牛肉8成熟，下粉絲，轉用鑊剷+筷子攪勻，至牛肉熟透，試味，上碟。

 

假日下午茶 - 厚批

星期六一家留喺屋企休息，做左個厚底Pizza做下午茶，三十多蚊材料就整到個10吋熱辣辣足料厚批，我的爐下火是內置發熱線，可將pizza放在牛油紙上，再直接放在爐底烤，好方便呀，連個抵都脆架， 真係超正呀^^10吋厚批 食譜：

1） 200g 高筋粉
2）80g 水
3）乾酵母1茶匙+糖1／2茶匙+暖水50g（調勻待5分鐘至起泡）
4）糖3茶匙，鹽3／4茶匙
5） 提子油2湯匙

 -全部才料混合用機攪／搓至光滑，滾圓，發酵至倍大
-擀至圓薄身（要薄點，因焗時會脹起），塗上千島醬（我加了小許錬奶調味）-灑上toppings （按個人喜好）放入預熱200度爐焗至批底微黄（約15分鐘）
-灑上芝士再焗約8-10分鐘至金黃便可出爐

**我的爐下火是內置發熱線，所以我可以把pizza直接放在爐底焗，會容易熟D，普通爐放下架位要自己觀察，再調較時間

 

 

No Good !- Spaghetti 360 @The Peak

星期六，同老公楂車上山頂食飯兼行山 ，行經Spaghetti 360 門口，見佢個露天座個view好正，加上佢個餐牌上d相好靚，食物又唔太貴，就入去試下, 點知大失所望，一ｄ都唔好味，碟意粉食左兩啖就我諗無下次了。


我地點左：

1)煙三文魚凱撒沙律 - $78
d菜爽甜，ok，但係煙三文魚無咸味，隻橙顏色
怪怪，切完隻碟上流有橙色，唔知係咪加左人造色素，驚驚 

  

2)點心拼盤 - $88

-炸蝦好味，餃子係急凍貨，帶子同雞翼都無味。

 

3)海鮮意粉 – $78

-呢個最差，個賣相同餐牌上的相差很遠，o個pat汁好似糊仔咁，睇見都驚，也罷，食落仲離譜，d海鮮連一點味道都無，好明顯係雪左超耐，直情不能接受。

 4) Ice Mocca Coffee - $38

-只可以話係正常

美味薑蔥炒蟹

好耐無炒過薑蔥蟹啦，星期日炒左一大碟，食到咀都損晒。不過而家d蟹比以前貴好多，唔係好大隻都要96蚊一斤，d 錢越來越!唔見駛喇。
不過有真係好好美o既。

材料： 蟹三隻，薑三大片，蔥隨意，（我緊係落好多啦)，肇興酒一湯匙

調味：蠔油1.5湯匙，生抽1湯匙，糖2.5茶匙，水2 湯匙 (唔同牌子醬料鹹度不一，自己試下味啦)

1) 蟹洗淨切件，瀝乾水份，撲上生粉以半煎炸兜炒至熟，起鑊，瀝乾多餘油份

2) 燒熱兩湯匙油，下薑爆至聞到薑香味，下蟹兜炒一會，下肇慶酒，兜炒

3) 下芡汁兜勻，下蔥，蓋上鑊蓋，焗一，兩分鐘，試味，便可上碟。

**如當日好多餸煮，可預早進行(1)，臨食飯再進行其餘步驟。

1人晚餐 - 梅菜蒸豬肉

梅菜蒸豬肉

琴晚得我一個人食飯，傷風左成個星期，又唔想出街咁肥膩，就整左呢個很家常，但很好味 的梅菜蒸豬肉，加幾條菜心，就係我的一人晚餐喇。

(1人份量)：

材料：

免治豬肉$10 (剛夠一人食)

特甜梅菜一小棵 (之前買左一札，一人份用一小棵就夠了)

做法：

-梅菜先用水浸半小時，之候用水沖淨 葉上的小沙粒

-搾乾，切成粒備用

-豬用用 2茶匙生抽，1.5茶匙沙湯調味， 之後加入1茶匙水攪勻，

-加入梅菜粒，最後加入小許生油拌勻

-壓扁舖在已塗油的碟上　（不要過薄）

-隔水蒸十分鐘，完成!

**我買的是超甜梅菜(較乾和深色)，如果是普通的梅菜，則浸的時間要長一點，糖的份量亦要多一點。  

太古城屋台屋

老公如果閒日放假，都會過黎太古城同我午飯， 琴日同老公去左屋台屋食午飯喇，佢有多定食套餐，價錢由來已$68 - $102不等，好多選擇。　通常都係一款日式食品＋一個湯麵／烏冬包飲品（不過麵／烏冬唔同湯底要加$6-$9不等，只有一，兩款無乜料ｏ既唔駛加，轉飲即磨咖啡就要加$8)， 加下加下，連埋加一，都過90蚊。 不過好彩份量夠同味道都唔差，所以都好多人支持。

尤其在太古城，總括黎講呢個價錢有咁o既份量同質素，都算抵食架，所以老公過黎好多時都會去幫親，亦值得推介比大家。

 

我地叫左兩個餐，一個最平同一個最貴的：

1)   $68/set – 雜錦天婦羅 +蕃茄蟹肉拉麵(+$9) +咖啡（+$8）

連加一總數$93.5-

天婦羅好足料，大蝦/蟹柳/南瓜/茄子/蕃薯都有齊，而且個漿唔好脆口，合格

 

2)   $102/set – 雜錦魚生飯 +豬骨湯拉麵（+6） +咖啡   (+8)

連加一總數$127.6

魚生樣樣都好新鮮，超好味呀，碗飯都唔算細，一個女仔唔會食得晒，好在老公擦得，幫我包底。

豬骨湯拉麵 – 湯底比較以前淡口左，無平日咁濃味，減了分。

 

3)    加8蚊的即磨咖啡，轉了咖啡豆，推步了，下次唔會加了。

熊亭日本放題

灣仔熊亭日本放題我地一家三口平均一兩個月都會去一次，鐘意去o既原因係平日一至四無乜人去得兩三檯人，唔會好嘈，d食物黎得快，唔會漏單，佢d魚生好新鮮，呢個價錢真係好值架(試過一次Weekend去，一多人就差好多喇，所以我地會選weekday去）。

我同老公至喜歡佢o既魚奶湯，最少會飲兩碗，佢用"魚立"魚淆湯底，加埋菇同滑滑豆腐，喜歡魚湯的實愛呀。
魚生都好新鮮，好多款，好味啊。
燒物都好得，尤其大蝦真係好大同彈牙架，其他野都合格。
Overall樣樣都ok，當日唯一唔及水準o既係天婦羅，d粉太厚了。

鹽漬三文魚定食

 

上星期Apita日本節買左幾片鹽漬三文魚，今日成為我地兩母子晚餐，加埋麵鼓湯同茶碗蒸旦，一人一份定食，易整但豐富^^

我同Owen都覺得鹽漬比煎新鮮的更好味，因為有d鹹鮮Feel, 肉質較結實同甘香，重無咁油膩。  加上日本節大減價，$100一包有5件，我買左兩包，可以放o係冰箱兩個月，真係好抵。 可式Promotion完左，要等下次先可以再買喇。

Owen + Mama 焗豬扒飯

 

琴日老公又要返工，星期日晚佢唔o係度食 ，我通常會試整d新菜式，因為得我地兩母子食，就算衰左都無所謂呀。

Owen好鐘意食一哥豬扒飯，琴日就買晒野，一於挑戰佢。  Owen聽到好開心，舉手話要負責炒飯，我當然比佢整啦。 不過太耐無炒，生疏左d，不過最後都炒得好靚呀。

我先煮左個汁，但係個顏色好紅，同一哥唔係好似， 所以我又發揮我o既大無畏精神，大膽咁落左兩湯匙淡忌廉落去，結果個食真係變淡左，開始像樣了。

焗完出黎真係同一哥一樣樣，Owen仲猛讚話好得呀。 

老公見我Post上Facebook, 立即Whatsapp我話下星期六佢放假要食呢個喎，笑死我呀。

 

Owenmama醬汁做法：

茄膏 – 1/2 罐 (小的地滿) / 雞湯200ml / 茄汁 4湯匙 / 糖2湯匙 / 生抽1湯匙 / 淡忌廉 1.5 /生粉水適量

1) 用易潔鑊下小許油，下茄膏煮熱，下雞湯，茄汁，糖，生抽，用細火煮熱，期間不停攪拌

2) 試味 (調至合自己的酸甜度)，熄火，加忌廉攪勻 

3) 如即焗好立即用生粉水埋芡，亦可放在一旁備用，等入爐前才翻熱埋芡

**糖同茄汁的份量請按個人口味調較
**忌廉係我自己亂加用黎較個顏色，可隨意刪去
 **個汁睇落淺色，但係焗完就o岩o岩好喇。

似模似樣咁喎，不過要讚佢碟飯炒得唔錯呀。






將炒香的洋蔥，豬扒，蕃茄同菠蘿再炒飯上　

舖上蕃茄及菠蘿粒，淋上適量醬汁 ，放入預熱250度焗15分鐘左右，再灑芝士碎，焗多5分鐘就食得喇。Yum Yum^^

**芝士可刪去。

預熱焗爐２２０度，焗至表面微焦，再沙上點芝士碎焗再焗至芝士容化便完成。