紐約芝士蛋糕 New York Cheese Cake (食譜)

 老公的迷你版

今日係部門同事的生日，為佢做左呢個人見人愛嘅New York Cheesecake, 豐富順滑芝士同特厚餅底深得同事們愛戴 。
當然不忘整個迷你版比老公宵夜，佢今晚專登留肚話要KO佢喎。

  

材料 ： 7吋1個　(我將8吋份量材料放進7吋模)

餅底:

消化餅   8pcs                
牛油      70g

餡料： 

忌廉芝士   500g                 
糖    150g           
酸忌廉     120g     

全蛋  1隻         

蛋黃 1 隻

1)  在模邊掃牛油和灑上麵粉.   用錫紙包好底部，以免入水, 置焗盤上備用

2)  消化餅壓碎，拌入已溶牛油，舖在模底, 用鐵匙壓平,   放進雪櫃半小時


3)   焗顱預熱至150度

4)   忌廉芝士於室溫放軟，加糖打至滑身，再加入酸忌廉拌勻

5)  加入雞蛋拌勻 (不要拌太久,打至滑身便可 ), 倒入模中, 輕敲焗盤數下， 讓氣泡浮面， 再用牙簽刺穿。

 

6)  焗盤注入3/4吋水，150度焗約50分鐘


＊＊各個爐溫不同， 要不時視察以免焗焦。

南瓜天婦羅

聽日仔仔開始考mock，今晚整左佢最愛的鰻魚飯同天婦羅南瓜同佢打氣, 等佢食飽飽開心温書，加油呀仔仔! ， 

呢味又平又靚又好食，仲級超易整 (下文附做法)。

  
南瓜天婦羅：　

－南瓜切片，薄薄灑上些麵粉備用
－天婦羅炸粉（日式超市有售)，按包裝說明加入冷水 (我用100g粉+160g冷水)開好
－南瓜沾上炸漿，熱油慢火炸熟便可



**不同牌子炸紛用法不一， 請參考個別包裝。
 

鮮魷魚蒸肉餅

(10人 份量）,  人小把份量減半

豬絞肉（帶小許肥）1000G
鮮魷2隻切粒
馬蹄8粒切粒

生抽3湯匙
砂糖 1.5湯匙
鹽 1/2 茶匙
水 2 湯匙
生粉2茶匙
油1湯匙

1)  絞肉加入生抽，鹽及糖攪勻調味醃15分鐘

2) 魷魚洗淨，撕去一半的紫色衣，切粒備用 (（我覺得有點衣會香D同靚D）

3) 馬蹄切粒備用

4) 把2湯匙水加入絞肉，用筷子順同一方向攪勻，另找肉變得輕身，再加入生粉攪勻

5) 把魷魚及馬蹄粒放入絞肉混合，最後加入油攪勻

6)  把肉平舖在 （不要太薄）碟上，大火蒸15分鐘,  

     **把鑊蓋傾側小許， 令小部份蒸汽漏出， 可助減少倒汗水

7)  離火， 試肉汁味道， 如不夠濃可下點生抽／糖調味。

黃咖哩牛腩

用在曼谷買的籃象黃咖哩醬做的。  調味簡單的下些糖同椰奶，已經好夠味。

急凍牛腩條1包
薑片數片
冰糖1粒 (1/2個兵乓球大小)
花雕1湯匙
大洋蔥1個切片
薯仔2個
籃象 (Blue Elephant)黃咖哩醬1包

Kara 椰漿約 100ml（隨意）
魚露, 糖, （隨意）





 做法：

１） 牛腩出水 (15分鐘) 撈起備用,　燒滾水 (份量要蓋過牛腩條)，加薑片數片  / 冰糖 / 花雕，　放加牛腩約炆一個半小時 +  焗30分鐘 / 或到牛腩淋軟，撈起牛腩， 湯留用（用隔油網網去湯上面的油份）




 
2) 薯仔蒸20分鐘至8成熟， 襯熱撕去皮， 切成件備用


3）易潔鑊燒熱2湯匙油，細火爆香洋蔥爆炒一會，中間撥開一空間，下小許油爆香咖喱醬，





 
4) 下適量之前炆牛腩的湯煮滾，再加入牛腩+薯仔, 同炆20分鐘, 加椰醬煮滾及最後試味，如需要可用魚露，糖調味便完成。

 





**不同牌子咖哩醬辣度／味道都有差異，　建議先用3/4包,　試味後再加.　
**我用Kara 椰漿,　較杰身同濃味.　

**椰漿可增加香味同減輕辣度,　但不需下太多， 否則顏色變淡， 就會減少泰式風味。
**我用LＣ煲炆牛腩，　用水的份量較少,　用不同煲具,　水及調味份量請自行調整．

低溫慢煮三文魚配薯菜

買咗蒸爐好幾個月， 想試做低溫慢煮好耐， 但礙於仔仔同老公對熟三文無乜好感， 襯今日得我一個食晚飯，就試整kill time.    原來咁簡單嘅低溫慢煮方法可以做出咁甘香咁軟滑嘅三文魚，D魚油一啲都無流失，超級好味，一試就愛上咗。

做法：
230g三文魚扒用適量鹽，黑椒，3湯匙橄攬油醃半小時，用錫紙包好，放入蒸爐用六十五度蒸四十分鐘就完成。 配合任何自己喜歡嘅蔬菜,就系健康又好味嘅一餐啊!

金銀菜豬肺湯

幾個家人剛都咳好， 襯星期日一家人嚟我度食飯， 就訂定個豬肺煲個潤肺靚湯一家人分享。  處理豬肺功夫係多小小， 但家人好喜歡，一大煲湯 連湯渣都清哂, 值得呀。



 材料：

金銀菜豬肺湯
豬肺1個 （請肉檔老闆代清洗乾淨）
唐排一斤半（切件）
菜乾2札
大白菜1斤
紅蘿蔔1個
蜜棗8粒
南北杏十多粒


準備：

菜乾浸軟， 沖淨葉上的沙， 扭乾備用
白菜洗淨， 切開備用
紅蘿蔔切件


豬肺處理：

 豬肺放在白鑊中豬10鐘， 撈起沖水，瀝乾

 其間肺中的水分會不斷流出

 再重覆一次， 確保豬肺內的污損水徹底流出

 將豬肺與豬骨一同出水10分鐘， 撈起沖淨，

與其他材料一同放在大煲內， 加水煲2小時便完成。

清燉冰糖雪梨茶

天氣又凍又乾，老公同Owen都又幾聲乾咳，見雪梨當造，琴晚就整左呢個清甜潤肺甜品比佢地。自己整幾蚊一盅，又平又滋潤呀。

一人份量：

雪梨一個
雪耳少許（可免）
南北杏少許（約十粒便可）
水一碗半
冰糖適量

1.雪耳用冷水浸發，揸乾，切成小塊備用

2.雪梨去皮，去心，切成小塊，與雪耳，南北杏同放入燉盅內，注入適量水分及加冰糖

3.燉一小時便完成

西蘭花鮮魷

簡單的步驟， 但做到酒樓菜式風味。



材料：

細西蘭花2個
細鮮魷2隻
蒜頭切片3粒
雞湯200ml
生粉水適量

1) 西蘭花焯至剛熟， 舖在碟上備用

2) 魷魚洗淨， 去衣， 切片及界花，抹乾備用

3) 易潔鑊下加2 茶匙油燒熱,  下蒜片爆香， 下鮮魷爆炒至9成熟,  加入雞湯煮滾， 下生粉水埋薄芡

4) 將魷魚和芡汁淋在西蘭花上便可上碟

瑞士雞翼

上個星期同老公去翠華食晏， 佢點個咗瑞士雞翼， 5隻要$55， 圍起要$11一隻， 真係超

貴, 見佢咁 鐘意， 屋企冰廂有包舊滷水 (下面有儲存方法)， 就整比佢試吓, 自煮價$28有

14隻， 食到佢同仔仔夠晒喉。 其實真係好簡單就可以整用自家舊滷水浸熟，秘訣係全程開

蓋，以中火煲滾後轉細火浸約20-25分鐘，就做到皮滑肉嫩嘅瑞士雞翼，簡單到無朋友呀。  

1）雞翼14隻解凍/洗淨, 擠去長骨邊血管內的血,抹乾，用1/2茶匙幼鹽擦勻醃30分鐘  

  （令雞肉有底味）

2）沖洗雞翼表面的鹽份， 抹乾備用

3）滷水煮滾， 投進雞翼 （滷水要蓋過全部雞翼）

4）全程開蓋， 中慢火煮20至今晚分鐘便完成

 

 

Owenmama 滷水汁：

老抽 100ml  /  生抽50ml / 水800ml / 紹酒2湯匙 / 八角2粒(可刪減) / 冰糖2-3粒 (大半

個兵乓波的大小)慢火煮至冰糖溶化，甜度按自己喜好+/-糖調較。  

個舊滷水我用過黎滷過雞翼同牛展，所以係，本身好有味， 今次用再按比加水同調味就可再用, 仲越用越好味。  

儲存方法： 炆完野將用剩o既滷水汁徹底攤凍，放入雪櫃，睇二日會變成Jelly狀，之後轉用

保鮮袋包好放入冰櫃，不停返用的話可以雪好耐㗎。 

** 但係如果超過兩個月再返用， 就唔好再留喇。