Super yummy 煎肉眼

Owen今晚有約，两夫妻自煮西餐撐枱腳，主菜係煎肉眼(上次梁九記買的，好得喎) 加埋3個side dish一盤上哂，食，老公洗少好多碟呀。

今次跟住YOUTUBE呢個VIDEO 煎扒, 非常OK, 老公大竪毋指, 大讚件扒外脆內軟又juicy, 你哋可以去睇下. 

 https://www.youtube.com/watch?v=kR6ZxmY9wVk

 經驗:
*唯一無跟足係我只將件扒放雪櫃4個鐘(video話兩日), 
*扒大約煎１分４５秒就6成熟, 　但你哋要自己按扒厚薄調節．　
*溫度計在鑊上不準（因受火力影響）


三個Side dish, 分別係:
焗薯，洋蔥茄汁焗菇，洋蔥煙肉焗蠔 (食譜將後補)

 

金蒜粉絲蒸帶子

琴日在家為大姑奶提早慶生宴其中一味菜,   今日先同大家分享呢個美味帶子食譜，呢個蒜蓉醬超惹味,  仲一D味精都無, 仔仔用個蒜蓉醬撈左兩碗飯呀.

今次買到特大新鮮帶子，我預每人兩隻，將佢哋搬埋同一個殼上，一盤過蒸哂，吾洗分兩次方便好多。

帶子裙邊較韌， 吾喺個個喜歡， 但為咗唔浪費剩下的粉絲同金蒜醬，我將佢另外用碟上蒸咗3分鐘，結果都清哂。


食譜:

鮮活帶子10隻

粉絲適量，事先用水浸軟

金蒜醬半份：　按此往 - 金蒜醬食譜


蔥花適量



做法：

帶子去內臟洗淨，舖上適量已浸軟粉絲，和灑上適量金蒜醬，大火蒸５分鐘，最後淋上用糖調味的生抽，灑上蔥花便可上桌。

**蒸煮是間請按帶子大小自行調較, 今次係特大，所以用咗5分鐘。

今次請客再出動蒸爐，一次過蒸肉，魚同帶子，只用明火煮其餘兩味，有呢個好幫手，請客好輕鬆呀。

雞脾糖心蛋菜飯 (食譜)

今朝一早醒左瞓吾返，就係去買定老火湯料，等老公晏D放工返黎接力開火，仲教埋佢幫我醃定鹹雞脾， 今晚一家三口就有鹹雞菜飯， 又有靚湯飲喇。


呢餐係我同老公合力炮製， 覺得零舍好味呀。 



菜飯

材料：

小棠菜半斤，切粒/  薑蓉一茶匙 / 　紹酒1/2 湯匙  /  珍珠米 (6碗飯的份量) 

1) 下小許油炒香薑米，下菜粒兜炒，贊小許酒，下鹽, 糖各小許調味，盛起隔汁備用

2) 米洗淨加水和雞湯(我煮三杯米，下了1杯水+1 4/5杯雞湯)，亦可隨意調教雞湯同水的份量。也可只加清水　（雞湯份量越多則越濃味）

3) 當飯煮至熟前1-2分鐘，便可加入菜粒，快手拌勻，蓋起繼焗1鐘便完成。

**不要焗太久，否則菜黃了影響賣相，也會太淋

鹹雞脾

材料：

新鮮雞脾3隻
四季鹽焗雞粉半包
鹽1/4茶匙
花雕酒2湯匙 (後下)

1)雞脾洗淨，用刀將多餘的黃油去掉

(你睇3隻脾都有好多油架) 

2) 徹底抹乾，在骨邊"介"兩刀，灑上鹽吸雞粉醃最少3小時

3) 蒸前30分鐘下花雕2湯匙抹勻， 蒸15分鐘至熟透

糖心蛋

我用左呢個方法好多次，從未失敗過，大家都試下：

1) 用小煲將水煮至大滾，水要高過全部蛋半吋

2) 大火煮至水滾，將室溫蛋輕力投進  (蛋要從雪櫃取出最少3小時，否則會易爆)，  轉中火煮5分半鐘，最好用計時器, 期間不要蓋上煲蓋

(水滾後頭一分鐘，用筷子輕輕攪動雞蛋，可令蛋黃固定在蛋的中央）

3）撈起雞蛋，放在冷水中浸至冷卻便完成！

**時間按蛋大小調節一下

**不同爐具火力不一，最好先做一次，查看結果，作下次準則

菜肉生煎包

 


自從上兩個星期執書櫃搵到本彩蝶軒食譜，呢排就愛上做中式包點，繼蝦餃同燒賣後，是日下午茶係生煎包子， 蒸好即煎，個底卜卜脆， 老公同仔仔一人食咗3個都話唔夠喉。 


流程不太覆雜，加上有今次用咗蒸爐40度低溫發酵，40分鐘就發好麵團， 慳咗好多時間。


皮料 (約8個2吋半小包子)：

麵粉250g
糖40g
發粉1/2茶匙 
乾酵母 1/2茶匙
水120g (大約)

餡料: 

椰菜 (小的1/3個)
免治豬肉 (100g)

-豬肉用鹽/糖/生抽/雞粉/麻油各小許調味.
-椰菜切絲, 用小許 油略為炒香, 起鑊攤涼, 切成幼粒與豬肉混合, 順同一方向攪十數下備用.


- 麵粉，糖， 發粉，乾酵毋拌勻， 邊攪邊加水， 至麵團成形， 改用手搓至滑身不黏手 (可能 
  天氣乾燥, 我搓的時候感覺麵團有D乾, 加左少少油落麵團)。
- 將麵團轉往掃了薄油的深碗中，用保鮮紙蓋好，發酵至倍大 （我用蒸爐40度發酵，30分鐘
  就OK）
- 將麵團搓成長條，分成8份，再桿成圓型薄皮
- 將適量餡料放在皮上， 慢慢捏合成包型
- 放入蒸籠猛火蒸8分鐘， 取出， 排在油鑊上將包底煎至脆, 襯熱食用. 

**最後剩下o既餡料我做左幾隻廣東雲吞, 無浪費呀. 

 

自製荀尖蝦餃

 

  上星期日一家齊集去哥哥屋企晚飯， OWEN同爸爸合力做燒賣， 今次第二次已經好熟手， 我就玩新玩意， 試做難度較高的㗎餃。

蝦餃係跟彩蝶軒食譜，工序不難, 但原來要包得靚好難，初試做得麻麻地，要練多D至得.

一家人初次晚餐中食點心，感覺好特別， 不過一家聽到OWEN有份整，都好捧場， 大讚好味。  美中不足係蟹子無貨，令燒賣的賣相差左少少。

食譜來源:  彩蝶軒食譜

蝦饀料:

蝦仁 120g

荀粒小許

調味：

鹽 1／4茶匙

糖 1／2茶匙

雞粉1／2茶匙

麻油／ 胡椒粉各小許

- 蝦肉用鹽+生粉搓擦30秒，用水沖5分鐘至白色，切粒，徹底抹乾備用

- 蝦肉加入荀粒， 再加調味料順方向攪十數下，冷藏30分鐘

**原本食譜有馬蹄同金華火腿, 不過我無跟足.

皮料：

1） 澄麵 35g

2） 生粉120g

3） 滾水約90g

- 澄麵與小時許生粉混合，邊攪邊加入滾水 （我用KA），蒸氣小點時，加入餘下的生粉， 改用手搓成不黏手粉團。（有需要加粉或水調節）

- 將粉團切成小粒， 備用時用保鮮紙蓋好避免乾燥。

- 將小粉團桿成圓形薄片（越薄越好）， 包入餡料，摺成餃狀， 放入蒸籠， 猛火隔水蒸5分鐘，襯熱進食。

 

自家3色丼

太古城LB同事都好熟悉呢個飯 .   午餐都好喜歡去人氣日式餐廳店排隊幫襯,  但每次要排半個鐘以上, 仲吾係日日有得食添.  

原來自己整超簡單, 30幾蚊材料就整到3大碗, 吾駛排長龍, 又食得滿足!

3人份:

菜心 8兩,
-切粒, 浸洗瀝乾, 用小許油爆炒, 下糖, 鹽各1/4茶匙炒至剛熟,  起鑊瀝乾汁備用.

-蛋4隻, 炒成8成熟滑蛋備用

-急凍雞扒2大件, 解凍, 洗淨,徹底抹乾, 去皮切丁, 用1/3茶匙鹽, 3/4茶匙砂糖, 1.5茶匙生抽，小許紅椒粒(隨意),   麻油醃半小時, 再炒熟備用 (炒時加丁點抽可雞肉更上色).

-把以上材料舖 在珍珠飯上, 以甜豉油伴食, 風味百份百.

清燉金銀菜湯陳腎湯

呢幾日氣管炎, 乾咳到頭都痛, 琴晚老公專登去買湯料返屋企比我潤下. 今次首次用蒸爐燉湯，效果真係出奇的好，　大家睇下D湯幾清，D水份完全無蒸發， 原汁原味呀。



材料:

菜乾 5棵 -  浸 30分鐘, 徹底洗淨
大白菜 8兩  -  洗淨, 一開二
陳腎 2隻 - 熱水浸 1小時, 一開二，出水備用
瘦肉 $20,　洗淨，　出水備用
金華火腿 數片
無花果乾 4粒
蜜棗 3粒
鹽小許 (最後調味用)


將以上處理好的材料放入24cm的LC內， 加水至9分滿， 放入蒸爐100度蒸燉2個半鐘就OK，中途無需加水，真係超方呀．以後會燉多D靚湯滋潤下.