2008年11月30日星期日

土魷肉餅煲仔飯


今晚得我同阿B兩個食飯,懶懶地整個煲仔飯,加個清炒菜心,咁又一餐啦。今次係整土魷肉餅飯,本來我相加個鹹蛋,但啊b反對,一票對一票,咁就算啦,Daddy唔o係到,無人幫我投票,咁下次等Daddy先落啦。

經過上次經驗,我落小左少少水,煲飯一粒粒,就好靚啦。

**平時整肉餅會加水去撈,但係整煲仔飯的肉餅就唔需要,反而要落多少少油,唔係會好乾架。
**記得o係肉餅上篤好多個洞 (篤到落底),唔係蓋住d米唔通氣,下面d飯會好濕,d肉餅又好難熟架。

2008年11月28日星期五

白白+滑滑 -  鮮奶蛋白 (食譜)





呢排天氣開始轉涼啦,坐o係屋企凍凍地,成日都係整凍o既甜品,忽然慼起條筋,不如今晚整個熱o既黎食。 呢個甜品超簡單,只要屋企有奶,蛋同糖就得。

就係 ─── 白白滑滑o既鮮奶蛋白
整好攤一陣就食得,即刻暖笠笠架。

以下分量可以整兩碗,同老公兩份食一碗,另一碗留返聽日凍食。
 呀仔反而唔吼,佢寧願食雪條,無佢符。
--老公雖然好fit, 但係膽固醇高,所以唔落d蛋黃啦。

材料:

鮮奶 250g       1.5 湯匙 (或按自己口味調教)
蛋白  3 (細蛋)

1)  鮮奶加糖加熱,煮至糖溶 (不要太熱,d糖溶晒就得),攤一降溫**
2)          加入蛋白,用電動打蛋氣打勻 (不要打太耐)
3)          過濾兩次,倒入碗內@@,蓋上錫紙,(中火)隔水蒸10-15分鐘便成
         @@(時間視蛋size及火力)


**鮮奶加熱後要攤一會(或坐水減溫) 才加入蛋白,太熱會便蛋花架。
@@如過不用碗,改用較淺身溶器,好縮短蒸的時間。

2008年11月25日星期二

木糠布丁 - 消化餅版本 (食譜)






阿B話好耐無食過木糠布甸,成日都叫我整,真係怕左佢。 今日食完飯,襯佢兩個落街打波,我就哩入廚房發功。  呢個甜品真係最容易,連魚膠粉都唔駛落。我本來諗住用樽仔整會靚d,但係完來用樽仔整個樽口太細,入cream 同餅碎時會難d,攪到個買相都無咁靚添,下次都係用返杯整會靚d啦。 
今次一家三口一至通過用消化餅,大家都認為會香口d,等我試o下好唔好味,再講比你地知o下。  (琴晚食左啦,我地都覺得消化餅比馬利餅好味呀)。

材料 (約5樽份量)

淡忌廉   250g       鍊奶   50g
雲呢拿油數滴       馬利餅 / 消化餅 70g

1)          餅乾敲碎成木康狀備用
2)          淡忌廉打至7成起,加入鍊奶,雲呢拿油,再打至杰身
3)          一層餅碎,一層忌廉,重複放容器內 (用唧袋會好d)
4)          放進冰格雪1,2小時便成。

*唔喜歡食大硬好放雪櫃上格, 要雪耐少少,不過我覺得硬硬地好食d。同埋整得4樽,實一次過食晒,唔會剩低,hehe……

2008年11月23日星期日

自製紅燒乳鴿 (附流程)




似唔似樣呀!  老公同阿B大讚皮脆肉嫩。 又多一個宴客菜啦。

我不嬲都係乳鴿癡,出親酒樓食飯,必叫紅燒乳鴿,睇完Minicorgie的網頁,結合佢的做法再用自己的滷汁同煮食經驗,同o係麥芽糖水內加入白醋(呢個係其他網友的做法),集各家之大成,決定要挑戰一下,結果係非常成功的。  在此再三鳴謝。

其實呢個菜並無乜難到,最緊要係天氣乾燥就最好,如果風乾唔夠,就唔脆架。

有一樣野好神奇,隻鴿明明煲完係白"sai sai"的,但係搽左糖醋水,風乾時會越來越深食,炸完真係會變得咁靚架和。 等我初時仲擔心炸完會唔夠顏色添。




1) 用花椒,八角,老抽,生抽,鹽,糖,玫瑰露,水開滷水汁 (呢個係我自己用開的滷汁,比網上搵到的食譜間單)。

 試味,要鹹d,因為乳鴿未醃過,無味架,要靠d滷汁比d味佢。 煲滾放已出水的乳

下次會試o下先用d鹽醃一個鐘先,可能會更入味)鴿,滾起後轉細火煲20分鍾。




2)跟住開麥芽糖水,一碗水加一湯匙麥芽糖,再加入3/4湯匙白醋。










 


3) 熄火把鴿撈起即沖水洗淨(刺穿眼部,免炸時爆),再掃上(2),等幾個字再重複一次,然後風乾數小時。 

 (我一共風乾了7小時,琴日無乜風,其中兩小時用風煽狂吹)






 














4) 用大滾油(中火)把乳鴿炸至今金黃,臨撈起前轉太火炸一會(迫出多餘油份),撈起,瀝乾,攤10分鐘便可切件,以淮鹽佐食。









稍為攤凍先斬件上檯. 

2008年11月8日星期六

分甘同味 - 紅酒炆牛尾






**實物因較多汁,只好夾起機件影相啦。


B下星期開始測驗,今日唔可以去街,阿B話好想食牛尾,我話你如果肯比心機溫書,就整比佢食。   呢個餸製作需時,又要溶雪,切好多粒粒(蔬菜),平日要返公無可能整到。  
都好,上次我整炆牛尾無試過加紅酒,碰巧屋企又一枝紅酒放左好耐(因為老公嫌佢太”KUN”, 飲少少就會”Wing”),  一於要黎炆牛尾,反正放o係到都係封塵。

今次加左紅酒同月桂葉,同上次有d分別,我覺得個味到比之前豐富d,有隱隱的酒香,顏色偏深紅,同係街食的好似添。

今次一次過炆左兩磅,反正都係要炆咁耐,就炆多份分比隔離關太,一於分甘同味啦。
**呢個餸太好送飯,阿B同老公兩個每人食多一碗飯,當然無預到喇,攪到老公食到一半要落去燒味店買多個白飯返黎先夠食。 hehe........

2008年11月7日星期五

好軟熟呀!!






今日下午,閑來無事,落街食飯時,見都d芒果好靚,有夠熟,最好要黎整甜品啦。 諗起芒果糯米茲了。 睇左網友的網頁,屋企淨係得糯米粉同椰汁,所以參考左她的食譜,改o左少少,粘米粉一買要買有一大包,十年都用唔晒,無用到,分量改為同樣重量的糯米粉;食譜只要200ml 椰汁+200ml水,屋企得一罐400ml的揶汁,唔想浪費,索性唔加水,淨用椰汁。用小量椰汁溶左d糖就再加埋原有的椰汁,一邊攪一邊加入粉類內,重點係唔可能有粒粒。 再蒸15分鐘。 攤凍就包得,再碌椰絲,結果都好軟熟呀!!
 
材料 :

糯米粉 150g     
糖  80g
吉士粉 10g               
椰汁    400g  / 油 1湯匙
芒果肉 1 1/2個 切粒
椰絲適量

2008年11月4日星期二

大閘蟹,I'm Back!!!



因為有孝在身,不方便去人屋企,d朋友好好,星期六約埋黎我屋企食蟹,d蟹好靚,足5兩,係老三陽買,我地約埋三份人去分一籮,本來要80蚊,而家56蚊就有一隻,我地o個份都有16隻架,兩個鑊一齊開,都要分兩次先蒸得晒。 d蟹好靚,爆晒羔,連d腳d係黃食架。

我有幾年無食過大閘蟹,因為試過兩次食完幾個鐘之後都嘔,唔知係太寒定係太肥膩。 但係d朋友咁有心,d蟹又咁平咁靚,一於搏一搏,今次真係無事喎,咁就好喇。   終於可以大聲講:大閘蟹,I’m back!!!