2010年9月26日星期日

上湯龍蝦伊麵底 (食譜)







琴晚宴客,見到唔係成日有o既本地龍蝦,好靚好好肉,就買左6隻,再買左3個伊麵; 呢個餸其實好簡單:

1)將已開邊龍蝦洗淨,抹乾,再撲薄粉,半煎炸至9成熟後撈起瀝油

2)再用兩燙匙油起鑊,龍蝦回鑊贊酒

3)倒入適量雞湯加生粉水打薄芡,灑上蔥花,再淋在已煮熟o既伊麵上就得啦。

我唔想用咁多油去走油,所以要分兩次(蝦頭同蝦身)用半煎炸o既方法做,咁就唔會咁浪費啦。 你地都試下,整出黎o既效果同酒樓無乜大分別,好有成功感架。



2010年9月23日星期四

日式茶碗蒸




日式茶碗蒸

上星期o係 Jusco買左幾個專係用黎蒸蛋o既有蓋碗(只係10蚊個,但係好靚呀),前幾日就即刻用黎整茶碗蒸蛋,有呢個碗超簡單:

材料只有:蛋+雞湯,比例為1:2  先用叉將蛋打勻,加入雞湯輕力混合,過篩,將蛋液倒入加入日式配料o既茶碗(配料- 蟹柳,冬菇),蓋上蓋,蒸8分鐘即成無豆皮滑滑蒸蛋,一人一杯,好滋味啊。呢個杯仲好保暖添,真係超值呀。

2010年9月16日星期四

韓風餃子泡菜煲



呢個菜式雖然其貌不揚,但係真係幾好味,酸酸辣辣,容易整又好開胃架。

只要將適量o既泡菜加雞湯煮湯底 (嗜辣o既可以再加紅椒粉),再加入豆腐,菇類同預先煮熟o既餃子,就可以上檯,我就會插電鍋一面滾住黎食,Owen 仲鐘意加d烏冬添,老公返工o既時後,兩母子咁就一餐喇。   呢個菜式,如果冬天食會更加正呀。

2010年9月12日星期日

椰汁芒果西米露 (中粒版)





 椰汁芒果西米露 (中粒版)

每次o係外面食到好味o既食物,我都會急不及待咁試整然後同屋企人分享,今次係椰汁芒果西米露 (中粒版),係o係新居附近o既甜品店食到o既,做得都既有heart, 又鮮芒果蓉,加埋"中粒"西米,好好"趙口",不過一碗得dd西米粒,到喉唔唔到肺,仲要買$21一碗,係"地茂"舖黎講,都算幾貴。


今晚趁家庭聚會,一於整一大煲比大家試o下。 呢個甜品一d都唔難整,買到"中粒"西米,會好"趙口"d,仲預早用攪拌機打左d芒果蓉,加埋芒果肉,學足屋企附近甜品舖o既做法,但係當然足料好多啦。 幾十蚊,夠十幾人分,成家都話正!!

做法:

-西米煲5分鐘,其間要用木匙慢慢攪拌
-關火,蓋上煲蓋,把西米焗至透明,(如焗15分鐘仍然未得,就要再把西米煲滾,再焗 ,我用o既西米比一般西米大粒數倍,呢個步驟都重複左一次至得)
-把西米粒撈起過冷河(充分冷卻),瀝水,放雪櫃備用
-冰糖+水煮開,加入椰醬,關火,攤涼,加入西米粒,放於雪櫃(最好雪過夜)
-食o既時候加入芒果粒和預先打好o既芒果蓉。

2010年9月9日星期四

最好的手信- Creme Burlee



同事都最愛我整o既 Creme Burlee, 星期一成個 department 去 Anita新居食飯,我就整左呢個去做手信,簡單又好味。  Anita 同佢工人整左一餐好豐富o既晚餐,好多謝佢啊。

老公好耐無食過呢個,佢成日叫我整我都無"so"佢,o個日佢放工返黎打開雪櫃見到就笑晒口,但係我話佢知我地部門8個人,8杯都係o岩o岩好,無佢份,佢即刻扁晒咀。  琴晚終於有時間,佢11點幾放工黎,我就整定左一杯勁大杯o既比佢食,佢開心到不得了啊。  好彩佢咁瘦,唔係食咁肥o既宵夜就係肥死人啊。

2010年9月6日星期一

繼續醉 - 醉雞翼



上次我係整全雞,跟住係蝦,今次繼續醉落去。做法一樣咁簡單,將雞翼用清水煮熟,過冷河,再用醉雞汁加入自己喜愛的酒調味,再浸過夜就得架喇。呢個天時食一流呀。


****************************************************************
各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o Facebook同我溝通呀!