2010年5月29日星期六

蠔油爆雞翼




好耐無入廚煮飯,事因每星期六日都忙於攪搬屋o既野呢道去,個到去。
今日終於有機會入廚,點解? 因為老公踢波"拗柴",成隻腳腫晒,連行路都有問題,又點去買野丫。  不過咁都好,唔係咁我今日都無機會入我最愛o既廚房加上大伯今日返黎食飯,佢唔係好食得外面d肥膩野,自己煮就最好啦。

今日都係整左幾味間單小菜,淨條魚,炒碟菜同埋整左下面o己蠔油爆雞翼,呢個都係一個好送得飯o既菜式黎,值得推介比大家。

材料:

雞中翼15隻,一開為二

醃料: 生抽 1.5湯匙,老抽1茶匙,糖1茶匙,酒小許

芡汁:-蠔油兩湯匙,生抽一湯匙,糖一湯匙,
    水半碗 (連同其他材料)  
    -生粉水小許 

 做法:

-燒紅鑊,下薑片爆香,下雞翼爆炒至金黃,微焦 (先煎香兩面,再兜炒至7-8成熟)
-贊酒,下芡汁,較至最細火,蓋上鑊蓋,焗5分鐘
-揭開鑊蓋,轉中火,再兜一會,試味,最後下小許生粉水至合適杰度,上碟。




各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o係 Facebook同我溝通呀!

2010年5月26日星期三

Happy Birthday to Hubby

首先要同今日生日o既老公say sorry, 呢排忙住張羅搬屋事而,加上屋企開始立立亂,今年無蛋糕同你慶生,出年整夠兩個補數。 hehe...

上星期日一家三口去左會展食自助餐同佢預祝。 話就話同佢做生日,但係地方就係Owen 揀o既,每當屋企有人生日,佢都話要去Congress食自助餐。  老公當然就晒佢啦。

今日正日,Owen 好識做,話准我地兩老出去撐檯腳,今次我比老公話事,佢諫左食泰菜。   我地去北角o既曼谷泰國菜館,我地耐唔耐都會去食, 樣樣都咁好味,價錢一d都唔貴添。
老公,祝你日日都快樂!!   



兩個人狂叫,結果要打包^^








2010年5月16日星期日

窩蛋牛飯(食譜)





今晚老公要on duty, 所以無出去買搬屋o既野,得我同Owen兩個,簡簡單單整個窩蛋牛肉飯再加碟焯芥蘭就一餐 (今日買到好靚o既芥蘭苗)。  之前我大姑奶問過我點整呢樣野,我未整過,不過就用我o係出面食到o既味,寫左個簡易食譜比佢,今日有機會試o下自己整,睇o下效果如何,結果又幾似樣喎。 不過我無用全生蛋,用左太陽蛋,我諗小d菌會安全d掛 (都係安慰自己)。

材料:

鮮牛肉攪碎 -  $30 / 雜豆 $3 (先飛水去雪味) / 太陽蛋 或 生蛋

醃料: 生抽2茶匙,糖1茶匙,油1湯匙 (醃半小時)
             **想牛肉滑d,可下 1/4茶匙梳打粉+1茶匙水 (但可刪減)

芡汁: 蠔油2湯匙,生抽2茶匙,糖一茶匙,水半碗,麻油小許,生粉水小許 

做法:

-燒熱一湯匙油 (易潔鑊),下牛肉,用鑊剷把牛肉分開,
-牛肉變色後下雜豆
-下芡汁,炒至汁滾起,試味 (按個人口味加生抽或糖調味)
-最後逐少加入生粉水,一面兜炒至合適杰度,熄火
-把肉汁淋在白飯上,放上太陽蛋 (或生雞蛋),大功告成。

2010年5月2日星期日

心頭愛




好耐無上blog了,因為呢排忙於搬屋o既野,周圍買野揀野兩頭滕,連胃口都細左,不過如果可以順道減肥就唔區o既。    淨係呢張梳化就足足忙左一個星期,兩個星期六前o係DSC見到佢,好鐘意,有唔貴,有貴妃坐,d皮又靚,都係買到$4,000, 就返新屋度位,見o岩就o係對上個星期六去訂,點知去到就話無晒貨,剩翻陳列品,但係白色又比人坐到烏糟晒,平$1000都無買到。 跟住幾日就去勻九展,疏化倉,實惠,IKEA, 總之有疏化買o既地方都去再揀,但係始終都係揀唔到(唔係唔o岩坐,就係太大或太貴)。 

好彩我影左相,跟住上面個牌子o係網上搵到佢,終於比我搵到佢出黎,打上去訂貨,我d普通話又有限,攪左一大論,到簽合同問點比錢先出事,原來因為國內有外匯管制,一定要用國內戶口先可以過數比內地公司,結果周圍問朋友都攪唔到,結果又告吹。 最後決定琴日同老公專登去深圳香蜜湖行一轉,上去訂貨兼比錢。 最後計數連運費雖然比o係DSC買貴好多, 但係同老公商量過大家同意,就卜鎚。 為左心頭愛,唯有o係其他地方度慳d啦。

琴日我地去o既係 香蜜湖 世紀中心 紅星美凱龍全球家居生活廣場,裡面完來真係好大,國內靚o既疏化品牌都有齊(包括而家香港大熱o既滋華士,但係佢d款大高,我坐就吊腳),睇到我地眼都凸,真係好多野睇。  大家如果搬屋,都可以去睇o下架。