2011年8月19日星期五

西班牙海鮮飯 (downgrade 平民版)





西班牙海鮮飯 (平民版)
之前老闆幫我買左本多國菜Cookbook,其中o既西班牙海鮮飯好吸引。琴晚Chik 起條筋好想整,就去買料,正式版係要用意大利米(Risotto),我無,No problem,  我屋企有珍珠米,又要用蕃紅花,我又無,No problem,  我有黃薑粉 (因為我之問過我老闆,蕃紅花無特別香味,主要係令d飯邊黃色,加上好貴添),抱住大無畏精神,一於整個平民版。
不過我無跟足Cookbook做法同材料,集數家之大成,我仲加左炒香o既煙肉粒落d米度,呢個平民版整出黎好好味,唯一係第一次用鑊煮飯,d水好快扯乾,要經常加水,最後加多左少少,d飯最後夠乾身,不過經過呢次,我有信心下次應該會準確d,不過老公Owen都好捧場,猛話好味添。
呢個飯好足料,賣相都算似模似樣呀。









2011年8月8日星期一

心心酥 






 數星期前同事買左謝寧o既蝴蝶嫂返公司,味道唔錯啊,攪到我都好想整,想整蝴蝶酥好耐上星期o係"Fusion"買到現成片裝酥皮,就動手,做發超簡單,但係就好好味, 因為我怕佢地會彈開,所以o係底部用手指捏成一個小尖峰,整出黎竟然變成心型,錯有錯著,我覺得比蝴蝶更靚呀。
一片酥皮可以整到十幾小件心心酥,老公一次過KO晒,佢話好食到停唔到口呀。 佢食極唔肥梗係唔驚喇,我只係食左一件試味,不過有真係唔錯喎。

星期五晚無節目,再整左三個份量,要黎送黎添呀,真係好簡單,你地都試下啦。



做法:

1)現成酥皮一片, 兩面平均灑滿砂糖
2)  由兩邊向內對接,每接約一吋, 再把兩個接疊
3) 切成小件, 每件約1cm, 在底部用手指壓成尖峰,焗完便會成為心形 掃小許牛油,再灑上砂糖
4) 預熱焗爐190 度, 20約分鐘至金黃色便可
**中途當心心定形後,我會取出加多一浸砂糖於餅面上,咁個面就會閃令令,會靚d同甜d呀。



 





2011年8月3日星期三

翻版咖哩炒蟹 (食譜)


鐘意煮野食o既人通常都係為食貓,o係街食完好野,亦最鐘意照板煮碗。 自從o係布吉返黎,就好掛住泰式咖哩炒蟹,上星期三得我一個人食晚飯,就膽粗粗買左隻肉蟹返屋企試整,諗住成功就整比阿仔同老公試。
 
今次我用左利川罐裝咖哩汁,再加水,花奶,糖同dd魚露,最下再加入蛋漿,就整左個簡易版o既咖哩蟹啦。

雖然唔係正宗泰式風味,但係我都好滿意架喇,仲幾簡單添,剩係食洋蔥同唐芹都可以食成碗飯呀。  

材料:

肉蟹一隻,罐裝咖哩汁半罐,花奶1/3罐,水1/2碗,糖1大湯匙,魚露小許,蛋1(打勻)
洋蔥,唐芹適量

1)      蟹洗淨,抹乾,切件,撲小許生粉,下鑊炒至8成熟,離鑊備用
2)      起鑊,爆香洋蔥,蟹回鑊,贊少許酒,兜炒,
3)      轉細火,下咖哩汁,水,花奶,加入糖,魚露調味,煮滾一會(此時汁開始便杰,要留意不能太乾,如果唔係加蛋後會更杰,必要時加小許水調節),下唐芹段,熄火,於鑊邊打圈加入蛋漿,同時兜炒至混和收汁便成。



2011年8月1日星期一

Owenbaba 親自下廚 - 100分晚餐




星期六我正日生日,Owen要練波無join我地食飯,Daddy一早pl ​an定琴晚親自下廚整返餐一家三口再慶祝,佢足足廿年無入過楂過鑊剷 ​,琴日見到佢o係廚房工作,細如切d蔥絲,大至斬雞都如臨大敵,真係好好笑。

佢一早o係我個blog到搵定晒食舖,有d乜野唔識就叫我入去示範,但係我一示範完就立刻趕我出去,唔準我插手喎。  就算係斬雞,我都係企o係側邊教佢,唔準郁手,不過佢都好有慧根,只係雞胸位碎左d,我幫佢用d蔥花遮醜。

須然佢揀呢幾味都係簡單菜式,但係真係整得好好味,佢好精,堅持要買東星班,因為一定唔會衰咁話,就算蒸過左龍都唔會"鞋"喎。

多謝老公精心為我炮製o既呢餐飯,樣樣都好好味,我比你100分!!