2008年3月30日星期日

京都肉排






嚴格o黎講,只可以叫京都肉,因為我係買o左梅頭肉整,並無"排"。 因為五點先去買餸, 如過買豬排一定醃唔徹,於是就買梅頭肉切片,返屋企琢鬆再醃,我仲死驚佢"un", 用支差係咁督佢地,醃o左一個鐘,都夠入味,仲夠曬"林"添。 酸酸甜甜,好開胃啊!!

2008年3月23日星期日

涼拌海踅頭




每次去東湖飲茶,都會叫海踅頭食,要$30+一碟,得十幾舊倒,因為唔係間間酒樓都有得食,所以貴d都會叫黎食。(平時大家食o既海踅係一條條o既,應該係鬚黎既),開踅頭係滑d正d。
呢排因為Apple (阿婆o既暱稱)病重,成日都要去律墩治醫院探佢,每次都會經過灣仔街市,竟然見到有海踅頭賣,就買d返屋企試整。 食o既時候再加d用糖+醋醃過的青瓜,好清新,好開胃。
海踅頭並唔難整,回家將海踅頭切粗粒,用蝦眼水(約80度左右)煮一陣,好快就要撈起,因太熟會變橡筋一樣,跟住用水浸去鹹味(海水),要換幾次水直至完全淡口。 瀝去水份,用小許雞粉(開小許滾水)+生抽+麻油就食得。

2008年3月16日星期日

Ah B 終於恨到喇!! - 焦糖燉蛋










應承過Ah B,如果佢乖乖地介口(凍同甜),可返就即刻整焦糖燉蛋比佢食,佢呢兩個星期都好乖,就算我同Daddy食雪糕,佢都係睇住吞口水,乖仔!!
今日佢終於無咳,d藥食晒全部療程,就守諾言整比佢食,睇佢幾開心。
上星期六特登買o左幾隻梳芙厘杯,比以前用開的鐵杯大d,又靚d阿。不過以前用鐵杯傳熱d,燉蛋好快焗熟,用梳芙厘杯無咁傳熱,要焗耐d,不過真係靚好多o既。

2008年3月8日星期六

翠肉瓜甘荀牛肉








呢味餸好味,又靚又可送飯,牛肉係o係惠康肉檔買的,已醃好,味度同口感似係酒樓食o個d,想o係屋企食牛肉又怕"un"的話可以試下,相信佢同酒樓一樣落左添加劑去醃,但係耐唔時一次無乜壞o既。


做法係:
1) 甘荀切粒蒸8分鐘(瀝去倒汗水),備用;
2) 先炒牛肉至8成熟,炒時下小許黑椒,備用;
3) 下小許油炒翠肉瓜,一會後下金荀粒,再下牛肉兜炒;                               
4) 用小許蠔油,生抽,糖 , 再加豆粉小許和水小許,兜炒便完成。