2009年2月28日星期六

芒果芝士蛋糕 2009版本




不過呢d “up dup” o既天氣真係同yahoo 系統failure一樣咁令人沮喪。 星期四係 Anita (我老闆)生日,星期三就o係屋企整蛋糕,構思左整芒果芝士,一放工就去買芒果 ,一返倒屋企就焗蛋糕底,諗住食完晚返攤凍就可以開工整餡,點知攤凍後就成個糕面都潮濕晒(已經開住抽濕機),要片得比平常厚,有點浪費。 鬼咩,o個日濕度係92%),最後都過了骨。
   
星期四一早起身裝飾個蛋糕,好簡單的加了d生果,仲整左d藝術糖做裝識(昨晚整定放係雪櫃待用),自己都好滿意,滿心歡起拎返公司放入個陳年壞鬼雪櫃仔到雪,點知到臨食拎出黎,d藝術糖竟然溶晒 (可能因為個小冰格無左度門,d積雪令裡面潮),整番少少殘渣,個面仲比d糖水整濕晒。 o係屋企d糖花都雪左一晚都無事,竟然咁樣臨尾香,真係沮喪。  
**不過我都比左上面張相佢地睇,叫佢地當d藝術糖仲o係度啦。  

今次用左1個芒果肉磨蓉加半杯jelly 水,再加左半片魚膠片整左個面,亂打亂撞的創作,特登整厚d,都唔錯呀! 最衰o個日我早走無食,話唔到比你知個面層如何,不過同事們就話好好味喎。 (不過佢地次次都係咁”tum"我架啦。

2009年2月16日星期一

天鵝泡芙



星期六/日係我最 productive 的日子,因為通常一日會下廚煮飯仔,另一日除了出外晚飯,都係留o係屋企。 整野食就最o岩啦。


呢個原本諗住情人節o個晚整架,但係o個晚太豐富,實在食唔落,就推遲o係琴晚整。 一共整左8隻,一半送給關宅,另一半自己食。 

我同阿b 都認為 puff 配吉士忌廉較濃味,但係要配合天鵝造型,忌廉就會靚好多喇,加埋糖粉,真係好靚呀!!



呢幾隻係佢d brothers 呀!!

2009年2月14日星期六

蒜蓉龍蝦糯米飯


今日係情人節,祝情侶同夫妻們都甜甜蜜蜜,恩恩愛愛。

今日無諗住出街食飯,唔想同人迫同唔想食情侶套餐,決定同老公買餸玩煮飯仔。 一早諗定整個羔蟹糯米飯, 買晒蒸籠,荷葉同糯米先發覺成個小西灣街市都無羔蟹(綠食o個d)。 於是就特登走出去魚灣街市,都係無,好失望,不過賽翁失馬,比我搵d好靚o既龍蝦,每隻有大人手板o咁長,好好肉,連個頭都係滿晒肉同羔,好正呀。    

我將d糯米浸左6小時,再用荷葉舖住籠底黎蒸(荷葉上要刺小孔),蒸15分鐘,加入甜豉油汁(豉油2湯匙+糖1.5茶匙+水2湯匙)攪勻,再上搽左蒜蓉o既龍蝦再蒸20分鐘(時間視乎龍蝦大細,龍蝦大就要早d放)。  

不過我今次買得太多龍蝦,上臺欣賞完都要另外上碟先再淋甜豉油同贊油。
賣相都唔錯架,哈哈.....



2009年2月12日星期四

德爾哥比風蘋果蛋糕







今日老闆Anita 的朋友o係北海道空運o左兩隻長腳蟹比佢,佢好慷慨,送比我地當下午茶,我地仲開左枝香檳o黎送蟹呀(d香檳係聖誕節suppliers送比我地o既,我 地就雪住,隨時可以開飲)。 買左兩個檸檬本來諗著唧落d蟹度,但係原來原汁原未仲好,所以剩低一個我就要左佢,仲係reception拎埋一個蘋果,返屋企整蛋糕先。
整得太多蘋果muffins, 今次試o下新食譜,跟大少奶整左個德爾哥比風蘋果蛋糕(我 用左6吋圈,我想個蛋糕厚身d,不過焗的時間就要長10分鐘左右),但係我見佢o既評語話呢個蛋糕較為實身,我就係材料度加入左2湯匙牛奶 (加蛋白前落),等d蛋糕漿唔好咁"杰", 整出黎真係幾軟喎。 我係面同個底落左一層清蘋果,焗完比新鮮o既青蘋果清甜好多呀呀。
不過我怕太甜,無係個面度再搽牛油同果醬,雖然無咁閃令令,但係味度就清清地唔錯架。

2009年2月3日星期二

美式芝士蛋糕賀人日


呢個係我整黎同屋企人慶祝人日o既蛋糕, 食譜來自上星期o係圖書館借o既"做西點最快樂 - 賴淑萍著",呢個係一個焗芝士蛋糕,有d似New York cheese cake, 但係佢係用蛋糕片做底,仲會o係箍邊灑上椰絲,同蛋糕片上灑上提子乾,最得別係o係蛋糕餡內加入打起o既蛋白霜,令個蛋糕無一般焗芝士蛋糕咁實,仲加左d 蛋白向味,軟軟地,食起黎無咁"漏"添。

因為版權所限,食譜不便公開,有興趣的朋友,可以去圖書館借閱 (編號 - 427。16 5734) 或留個email address比我啦。