2010年11月29日星期一

18th 週年晚飯 - Omakase @花盃



11月29日係我同老公結婚18週年,佢一早吩咐我安排地方同佢食婚,因為28號係我老媽子生日一家人去左會展Congress食自助餐,前一日先食完咁豐富同咁"漏"o既一餐,所以今年我揀左花盃食魚生+壽司,咁就應該會好d。

今次係食 Omakase (即係無餐單,食乜由師傅發版),師傅會事先問你有乜野唔食,然後佢安排當日最靚o既食材,味道由淡至濃,逐款慢慢奉上,共20多道菜式,樣樣都超好味。同師傅+食客一路傾一路食,好開心呀,食左兩個幾鐘,一d都唔覺長,食度尾段,我已經飽都叫停,但係師傅好帖心,見我飽,但係又為食,就會將兩個份人兩分成一大一小,老公就食大份,咁我就有得食落去啦。 最後我地兩個連甜品都食唔落,飲埋咖啡就埋單。

有好多款魚生我連個名都味聽過,好似針喻,赤綠魚...連銀雪魚都可以做刺身,仲有炸生文魚鱗,同鐵板吞拿魚筋,無錯,係大條吞拿肉同肉中間個條白色筋,整出黎充滿油香,送酒一流呀。種類不能盡錄,件件都咁肥美好味,而家都仲回味緊呀。
呢餐可能係我咁大個女食過最好味o既一餐。 多謝老公!

2010年11月21日星期日

剪綵 - LC鳳爪排骨飯






第一次為新煲剪彩o既鳳爪排骨飯配白焯菜心。鳳爪排骨係媽咪幫我o係香港仔一間凍肉店買o既現成貨,味道真係同酒樓o個d一樣,咁整出黎確係好味。



2010年11月17日星期三

大煲 - 19週年禮物



唔經唔覺,今個月29號就係我同老公結婚19年週年喇 (咪以為我地好老,我地好細個就結婚喇,哈哈),我地細細個係鄰居,由細就一齊玩到大 ,可能我地一齊過得開心,時間真係過得好快! 好多謝佢對我處處忍讓,唔係都可能捱唔到已而家。

呢個係老公知我想買好耐又唔捨得,終於由佢出手,話當係週年禮物,以後定當盡心盡力,有咁”大煲”,整咁”大煲”過佢嘆! (偷笑中!) 

小妹同老公在此好多謝各網友o既祝賀!!
我地會一定會開開心心,融融洽洽咁相處落去,直到永遠,hehe........

2010年11月13日星期六

柱侯牛腩



睇返Blog內o既網誌,原來對上一次整牛腩已經係年幾前,今日Owen 有同學到訪,去到街市,突然間好想整炆牛腩,諗諗o下橫踮都炆開就埋左比平時整開o既兩個份量,要黎同呀哥+鄰居分今同味。  今次又d唔同,就係加左柱侯醬,加左之後味道又真係香濃好多,Owen同同學仔都話好味呀,同學仔本來話食一碗飯,最後食左兩大碗呀。  

我地成日"喱"o係廚房煮呀煮,都係希望家人同朋友食得開心,見到佢地食到停唔到口,o個份滿足感真係.........形容唔到咁正呀!

食譜:材料:急凍牛腩條一包、牛筋2磅,蘿蔔1條、八角兩粒、薑片
調味料︰生抽、冰糖、水,柱侯醬

做法:


1.先把牛腩條一開二加蔥和薑汆水,(原條亦可)
2. 把八角用袋子裝好,連同牛腩放進鍋
3. 加進調味料,水的份量要足以蓋住牛腩
4. 蓋上鍋蓋炆至沸騰(30分鐘),熄火後繼續焗15分鐘

5. 
第4程序重覆兩次 (如要加牛筋可再重覆第二次時加入)
6. 蘿蔔切塊,加進原鍋牛腩內細火煮30 分鐘,試味及最後調味,完成!

註:  牛筋可選急凍牛筋,先出水,過冷河,(6)時加入與牛腩同煮。


****************************************************************
各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o Facebook同我溝通呀!

2010年11月9日星期二

星期日一人午餐 - 榨菜豬肉蒸豆腐








星期日一人午餐 - 榨菜豬肉蒸豆腐

星期日老公多數要返工,而阿仔又多數有節目,中午o個餐都係得我一個食,雖然新般黎呢到,但係下面d餐廳都開始食都悶,所以呢兩個星期都開始做一人唔餐,無咁肥膩,又實o岩自己口味。 第一擊就係呢個榨菜豬肉蒸豆腐喇。


做法:

免治豬肉($5),加入烏江榨菜一包(事先以清水浸半小時),簡單的用生抽+糖+生粉+小許清水調味,最後加小許生油撈勻,再舖在豆腐上蒸10分鐘,加個白飯,就成為簡單又好味o既一人午餐喇。

雖然賣相一般,但係送飯就真係超正架!

**我用o既係o係雜貨舖買o既包裝好o既"烏江榨菜", 1個人1包就o岩o岩好,已經切左絲 同調過味,不過都係較鹹,浸o下水會淡味d。



****************************************************************
各位朋友,本人已於 Facebook 開了 Fan page, 請登入以下網址 add 我啦。

以後大家除左可以上Yahoo blog,仲可o Facebook同我溝通呀

2010年11月2日星期二

朱古力鏡面芝士蛋糕



上星期日一難得集齊一家人為老爸提早慶祝73歲生日,連好難o係星期日放假o既姐夫都黎埋,老人家開心到不得了。

為老爸整左個芝士蛋糕,上層係朱古力鏡面, 下面係原味芝士餡,我仲拎左一部份餡混合溶左o既朱古力同Rum酒,咁個餡就有兩個口味,無咁單調喇。 
祝爸爸生日快樂,身體健康,心想事成呀!

蛋糕食譜係Mix & Match出黎o既:

1) 芝士餡我係跟下面連結做 (份量 x 兩倍)http://www.rthk.org.hk/elearning/dessert/cake_charlotte.htm

2) 鏡面係跟名師食譜,不放便公開,有興趣o既朋友請用私人回應留email address,我會盡快回覆。

3) 再加一片清蛋糕/或者用消化餅底都得。

****************************************************************
各位朋友,本人已於 Facebook 開了 Fan page, 請登入以下網址 add 我啦。
以後大家除左可以上Yahoo blog,仲可o Facebook同我溝通呀!