2012年3月29日星期四

My Baking Corner - Gierre




多謝老公出錢出力,為我打造嘅baking corner,因為個爐太大,要將原先廚櫃o既擋板同燈罩拆去先至放得落, 仲要做埋清理,老公琴日為左佢忙左一日,我真係好多謝佢。

以後一次可以焗多盤brownies,蛋糕, 各朋友,同事們,等食啦!


今晚返去會試下開爐,希望以後同佢合作愉快喇。

Goodbye and Thankyou


 "爐生" 告別作 - 朱古力忌廉蛋糕




今日我要告別幫左我5年o既好幫手,佢係我d朋友5年前送比我o既生日禮物,佢幫我焗左好多個成功o既蛋糕,火力有足又均勻,不過今日之後佢將要退役喇。 收埋佢之前忍唔住要用多佢一次,作最後敬禮。 

今次應Owen要求整左o個朱古力蛋糕。 你地睇下佢真係仲好Work 架。  我會睇下邊位親戚會接收佢,等佢可以繼續發熱,發光。


Goodbye and Thankyou!










"爐生"真面目





2012年3月18日星期日

Homemade Pizza








夏天最好就係整Pizza,天氣咁熱,麵團發酵會好順利,加有Kitchen Aid幫手,一個鐘多d就有熱辣辣o既Pizza 食。 自己整一來平,二來自己鐘意食乜就放乜,真係唔錯架。  

麵團材料:

高筋粉100g
酵母 1/2茶匙 (加30g暖水,1/2茶匙砂糖預先發酵至起泡備用)
水40g
砂糖 3/4茶匙
幼鹽 1/2 茶匙
油5g

-所有材料攪成麵團 - 先用中速混合材料成麵團,用手感覺麵團濕度,standby 小許粉 / 水 調節麵團濕度,太黏加小許粉,太乾則加小許水,最後再用個速打約5分鐘成麵團
-深碗掃薄油,麵團置碗內,用保鮮膜蓋好,放溫暖處發酵至兩倍大 (我用左約45分鐘)
-取出麵團,用手略搓排氣,桿成薄塊,越薄越好,用叉再麵團上均勻地刺上小孔,掃上千島醬,灑上其他材料,最後放芝士
-放入已預熱20分鐘,200度的焗爐,用最低架位焗20-25分鐘便可。

**麵團要薄和不要太貪心,放太多料會令麵團潮濕,個底會較難熟



2012年3月14日星期三

簡單的一餐 - 豉油皇炒麵




上星期六老公有飯局,剩底我同Owen, 兩個人煮飯又唔係,又唔想出街食,兩母子食完午飯就去左遊街市搵”煮意”, 行經麵點見到d麵餅,Owen 問: 媽咪,你識唔識炒麵? 咁即係佢想食啦。 無問題,雖然未炒過,但係應該係easy job。    完來兩個生麵餅可以炒到好大好大碟炒麵架,炒到我手軟,整多幾次我諗連拜拜肉都收埋呀,哈哈。


做法:

1) 生麵兩個,
-出水(滾水落,用筷子弄散 一散開即離鑊,浸冷水。冷卻後瀝乾水備用)
-用較剪剪數下,麵條過長會很難跟配料混合

2)配料切絲(無特定配料,隨喜好加乜都得)
-如下菜類就要先炒熟備用

3) 燒熱易潔鑊,加小許油,先爆香洋蔥,再下麵條兜炒至麵全熱,
下配料,及適量炒麵豉油兜炒至全部材料混合,麵乾身便可上碟。

**豉油不而過多,太濕/太黑都不好。
**姿整d就可以好似我咁煎一片蛋皮切絲裝飾,如果灑上炒香左o既芝麻就更香口啦。



2012年3月5日星期一

自家忌廉磨菇湯




本來買左磨菇要黎試整Beef Wellington,但係忘記左一早醃左隻春雞,都係要用焗爐焗,一爐不能同時焗兩味,所以去後犧牲左牛柳,冰住先下星期再整。
剩返d磨菇唔留得,就整忌廉磨菇湯好了。  200g磨菇整左兩-三人份量o既忌廉湯,好濃,好香,好好味呀。





磨菇切粒幼粒



 用牛油炒至乾身
 炒到咁就得喇。 (我留左小小唔打瀾,最後放落湯到,得佢有d咬口)






加半碗雞湯用攪拌器打爛,放入煲內煮沸,加入半碗雞湯,半碗脫脂奶,半碗忌廉,加鹽,黑椒調味,最後用適量麵粉開水埋薄芡就得喇。