翻版咖哩炒蟹 (食譜)

鐘意煮野食ｏ既人通常都係為食貓，ｏ係街食完好野，亦最鐘意照板煮碗。 自從ｏ係布吉返黎，就好掛住泰式咖哩炒蟹，上星期三得我一個人食晚飯，就膽粗粗買左隻肉蟹返屋企試整，諗住成功就整比阿仔同老公試。
 
今次我用左利川罐裝咖哩汁，再加水，花奶，糖同dd魚露，最下再加入蛋漿，就整左個簡易版o既咖哩蟹啦。

雖然唔係正宗泰式風味，但係我都好滿意架喇，仲幾簡單添，剩係食洋蔥同唐芹都可以食成碗飯呀。  

材料：

肉蟹一隻，罐裝咖哩汁半罐，花奶1/3罐，水1/2碗，糖1大湯匙，魚露小許，蛋1隻(打勻)
洋蔥，唐芹適量

1)      蟹洗淨，抹乾，切件，撲小許生粉，下鑊炒至8成熟，離鑊備用
2)      起鑊，爆香洋蔥，蟹回鑊，贊少許酒，兜炒，
3)      轉細火，下咖哩汁，水，花奶，加入糖，魚露調味，煮滾一會（此時汁開始便杰，要留意不能太乾，如果唔係加蛋後會更杰，必要時加小許水調節），下唐芹段，熄火，於鑊邊打圈加入蛋漿，同時兜炒至混和收汁便成。