打孖上...天使 + 雲石芝士

上星期六慶祝”雙楊父子” (即係兩對楊姓父子) 生日，所以應承左送上兩個蛋糕做賀禮。   原來放工後一次過整兩個蛋糕係好忙，已經構思左兩個較簡單的蛋糕，但係真係好忙，加上老公唔o係度，一個人要一路整，一路洗碗

－先做戚風（天使蛋糕底）

－襯焗緊戚風蛋糕，就整定焦糖脆脆，

－準備一個蛋糕的消化餅底，放入雪櫃雪硬

－戚風倒扣攤涼

－打甜忌廉，放入雪櫃備用

－開始製作雲石芝士餡

－打淡忌廉，再打芝士

－溶朱古力，預備魚膠漿…..

中間仲不停咁洗碗，真係手都跛，腳又軟，不知不覺整搞左幾個鐘，完成雲石芝士蛋糕都１０點幾，先可以煮個即食麵。   好彩o個日天氣凍，個蛋糕11點就涼晒，可以抿忌廉， 到完成老公就開門返黎，從未試過見佢放工返黎咁興奮，因為最後o個輪碗唔駛我洗呀，好野。

下次如過一次過要整兩個蛋糕，其中一個一定會整紐約芝士，咁就一定無咁忙，時間亦易控制d。 或者放假先會打孖整啦。

好彩兩個蛋糕都好受歡迎，咁就"Lum" 返晒啦。