Owenmama's Kitchen: 2025

2025年10月5日星期日

自家燶邊叉燒 (食譜）

住家半肥瘦燶邊叉燒 (食譜）

自家燶邊叉燒 (食譜）
我哋呢D鍾意煮嘢嘅師奶仔, 最開❤️ 就係買到靚食材! 今次就係買到件急凍黑毛豬梅頭肉，自己切條，做咗碟半肥瘦燶邊叉燒。
👀叉燒喺焗爐度爆油，超治癒😍

而家坊間有好多現成醬料；已經唔駛用一大堆醬料都可以整到似模似樣嘅叉燒！熱辣辣出爐即食；媲美名牌食店出品㗎！

食譜前請容許Owenmama懷勉一下過去：
細個時爺爺是開燒臘店既；屋企門前有個比人還高嘅柴火燒爐；同好多用大鐵罐裝住嘅醬料！我對整燒臘無興趣；只係成日攞筷子去撩麥芽糖食！最懷念係放學後經過爺爺的車仔燒臘店；佢都會醒件叉燒頭比我食；當時係下欄；現今成為上品！爺爺過世三十多年喇; 每次整叉燒時都會懷勉一下兒時；好多場景至今仍然歷歷在目！

食譜:

新鮮半肥瘦梅頭豬肉750克

醃料（1）：
老抽1/2湯匙
玫瑰露酒1湯匙
砂糖3/4湯匙

醃料（2）：
叉燒醬適量（分兩次用）

掃料：
麥糖3湯匙
叉燒醬1湯匙

1) 掃料攪勻成漿

2) 豬肉洗淨，抹乾，用醃（1）醃1小時；令肉有底味。

3) 加入3湯匙叉燒醬放雪櫃最少醃3-4小時(用手揉勻)

4）再次倒去多餘的醃汁；加適量叉燒醬揉勻準備入爐

5) 焗爐預熱般180度，焗盤先包錫紙；把肉放在網架上放進焗10分鐘

6）取出，掃上掃料(要均勻, 多點也不怕)，再焗5分鐘，(此時叉燒已熟透)

7）將爐溫升至250度；在叉燒上掃上一層掃料；焗至邊位焦香便可出爐（約8-10分鐘）

8）讓叉燒靜止10分鐘；便可切片上碟。

Tips:
1) 要吃靚叉燒就要吃半肥瘦，否則便沒風味！
2) 多掃掃料，要燒到邊位微焦，掛汁；油潤帶光澤才合格！
3) 必要用玫瑰露, 如改用其他酒類便不對版了。
4) 個別爐溫同叉燒厚薄都會影響焗的時間，最緊要不時檢視及目測。

2025年9月3日星期三

蒜香辣椒蒸蠔 (食譜)

【蒜香辣椒蒸蠔】

每次喺屋企整到味道似酒樓出品嘅菜式都會感到滿心滿足！北上最愛食物之一；呢個蒜香辣椒醬其實都好易整；仲無味精，無添加！配大大隻台山蠔；鮮甜惹味；真係極都唔夠喉啊！

其實呢個香蒜辣醬配任何海鮮；尤其貝類同蝦蟹效果最好！只需簡單幾步，有興趣就快啲跟食譜試吓啦！

蒜香辣椒蒸蠔

材料：
鮮蠔5隻

香蒜醬：
萬歲粟米油2湯匙
蒜頭1個(切幼粒)
豆瓣醬1.5茶匙
生抽1茶匙
砂糖1.5茶匙
生粉1茶匙

配料：：
蔥粒及辣椒粒隨意

1/ 先準備香蒜醬：慢火燒熱2湯匙萬歲粟米油；下2/3蒜粒慢火炸至微微金黃便要離火；以餘溫炸至金黃色。

2/ 蒜粒連油一拼倒盛大碗中; 趁熱下餘下1/3生蒜粒 /豆瓣醬 /生抽糖 /生粉撈勻成香蒜醬

3/ 鮮蠔開殼（不懂開可請魚販代勞) ; 擦淨蠔殼；灑少許生粉在蠔肉上；用手指輕力搓揉去潺及污物，沖淨備用

4/ 燒滾一鍋水；下蠔大火蒸6分鐘或至蠔肉8成熟（時間視乎蠔的大小調節）

5/ 打開鍋蓋把香蒜醬淋在蠔上；再度蓋上鍋蓋大火蒸2分鐘或至蠔熟透

6/ 取出蠔；在上面灑上蔥粒及辣椒粒便可趁熱享用 (重口味的朋友可加小許蒸魚豉油)

Tips:

**步驟 #1蒜粒炸至時開始微微金黃便要離火；以餘溫炸至金黃色。如過火便會有苦味。

**步驟 #2香蒜醬調好後試味及按個人口味調節鹹／甜度

**步驟#4原隻蠔連殼蒸煮時因底部傳熱性較低烹調時間會長些; 需自行目測觀察

2025年9月2日星期二

零失敗香蕉蛋糕 (食譜)

香蕉蛋糕

好耐無開焗爐；整呢個零失敗蛋糕攞返手感就最啱喇。

今次做咗長型磅蛋糕同紙杯型，我個人覺得長型磅蛋糕較優；雖然要焗40分鐘，比杯裝焗耐好多，但賣相靚D；口感又較濕潤比杯裝優勝；值得推介！

大家可各適其適；自行選擇呀！

食譜:

食材（5-6人） 1小時內

- 食材
- 無鹽牛油150g
- 砂糖120g
- 雞蛋3隻
- 低筋麵粉180g
- 梳打粉3/4茶匙
- 發粉1/3茶匙
- 香蕉(用差壓成泥狀)3隻

1全部粉類過篩備用, 3.5吋 x 7 吋模內舖上牛油紙
2預熱焗爐160度, 香蕉用叉壓爛
3牛油, 雞蛋置室溫約2小時至完全退冰軟化, 牛油加砂糖用電動攪拌器打勻至轉淡色
4逐一隻雞蛋加入慢速攪拌
5加入已篩好的麵粉和發粉, 慢速攪拌至充分混合
6加入香蕉泥拌勻
7杯裝蛋糕：入杯 (7-8分滿便可) , 焗約15-20分鐘至金黃色, 用牙籤插入蛋糕中央, 取出時牙籤乾淨, 不會黏上麵糊便可
8長條磅蛋糕：焗約15分鐘，當蛋糕面開始凝固，用餐刀在中央垂直切一深1cm的小坑（目的是讓蛋糕將在加熱時在坑中湧出，令蛋糕更美觀），再關上爐門繼續焗製至表面金黃(約40分鐘) , 用牙籤插入蛋糕中央, 取出時牙籤乾淨, 不會黏上麵糊便可.
9脫模，撕去牛油紙便可食用。

2025年8月19日星期二

梅菜肉餅冬瓜環 (食譜)

星期日老爸嚟食飯；煮咗幾味小菜。

其中一味新菜式【梅菜肉餅冬瓜環】超得老爸歡心。濃味梅菜肉餅配清淡軟滑冬瓜肉；呢個配搭真係好得呀，堪稱另類老少平安食譜。

冬瓜環為尋常不過嘅梅菜肉餅賣相，宴高貴咗（哈哈）；，宴客都上得大枱架！

食譜:

冬瓜一片（2吋厚）

甜梅菜100克

半肥瘦豬肉300克（絞碎）

冬瓜調味：幼鹽1/3茶匙

豬肉醃料：生抽1湯匙 / 蠔油1湯匙 / 糖 1/2湯匙 /

生粉 1茶匙/水1湯匙 / 油2茶匙

汁料調味：生抽適量

1. 梅菜用清水浸半小時；再徹底洗淨內藏的沙粒及污物

2. 梅菜搾乾水份；切粒再用『白鑊』烘乾水份, 待涼備用

3. 豬肉加醃料內的生抽、蠔油、糖撈勻，再下生粉攪拌後下加進梅菜粒；最後加油撈勻備用

4. 冬瓜去皮，用模或小刀改成圈狀（內圈可大一點）

5. 可按喜好再上面切紋裝飾

6. 在冬瓜面均勻灑些幼鹽(底味)；之後蒸8分鐘後取出都去倒汗水

7. 把肉餅釀進瓜環內；用筷子再用餅中刺些孔再蒸20分鐘至肉餅熟透

8. 取出；灑上蔥花並在碟上汁液加適量生抽（加色／加味）便可趁熱享用

2025年8月7日星期四

韓式炆牛仔骨煲(（明火+ Instant Pot壓力煲食譜)

黑雨下的韓式炆牛仔骨煲

工作日已好少下廚；黑雨竟然有機會！

上半日超忙要reschedule當日D會；下晝就安靜D可以煮下飯仔添。我整整咗韓式牛仔骨煲；兩父子超開心，因為份量大，第二日午餐都有着落添呀！

呢個韓式炆牛仔骨煲（厚切）肉軟腍; D汁有牛香+帶果香又甜甜地; 撈飯真係無得輸㗎, 就連D配料都超吸汁美味! 家中二男仲話好有韓國餐廳水準呀，哈哈！

我今次用壓力煲煮，不過唔係好普及；所以都把明火煮法分享俾大家！

韓式炆牛仔骨煲

材料：

厚切牛仔骨 1kg (厚切1.5吋)
冬菇數粒(浸軟去蒂)
小白蘿蔔一個（切件)
小紅蘿蔔一個（切件)

栗子6粒

紅棗4粒 (切半去核)

調味料:

蒜粒1湯匙

南水梨1個 (磨成蓉)

生抽6湯匙
老抽1湯匙
味醂6湯匙
冰糖適量
水適量

明火法：

-牛仔骨解凍用水浸30分鐘（去血水）
-牛仔骨出水10鐘，撈起清洗及瀝乾
-南水梨磨成蓉；與調味料調勻備用
-把牛仔骨放入煲內，加入適量水調味料及冰糖煮滾; 轉小火，蓋上煲蓋炆45分鐘，熄火焗15分鐘
-加冬菇、栗子，再細火炆15分鐘，熄火焗15分鐘（如水蒸發便要補充；加水份到幾乎蓋過所有料便可）
-撇去面層油份
-加入紅、白蘿蔔、紅棗，小火炆30分鐘，試味，如需要用生抽／糖較到合自己口味便完成。

**韓式牛肋骨煲口味較甜，請自行按口味用砂糖生抽最後調較。

Instant Pot壓力煲法：

-牛仔骨解凍用水浸30分鐘（去血水）

-牛仔骨出水10鐘，撈起清洗及瀝乾

-南水梨磨成蓉；與調味料調勻備用

-把牛仔骨放入壓力煲內，加入調味料、適量水及冰糖; 蓋上蓋【壓力】煮12分鐘；

- 釋放壓力後打開蓋-撇去面層油份

-加冬菇、栗子，及紅、白蘿蔔紅、紅棗，用【蒸煮】模式煮30分鐘

-試味，如需要用生抽／糖較到合自己口味便完成。

**韓式牛肋骨煲口味較甜，請自行按口味用砂糖生抽最後調較。