日式咖喱鷄

日式咖喱鷄飯

一鍋過準備我同Baba晚餐， 同埋兩父子外帶午餐盒， 配水煮花椰菜； 簡單快手到極致， 仲好好味添😊  為食仔Owen見到大大盒咖喱雞飯盒開心到飛起呀！

今次預先一晚買定雞髀， 去骨之後用幼鹽同薑片醃一晚  ， 第二日放工返嚟幾個字就整咗一大鍋咖喱喇。   直情無技巧可言，哈哈！ 

簡單步驟： 

1/  雞髀去骨切件； 加小許幼鹽及數片薑片（先拍扁）撈勻醃1小時（我放雪櫃內醃過夜； 煮前取出回室溫）

2/  薯仔、紅甘筍切件先蒸10分鐘； 浸水降溫及浸去表面澱粉、瀝乾水份備用

3/  燒熱油下雞肉爆至半熟、下洋蔥爆炒至雞肉8成熟

4/  下熱水、咖喱磚煮至溶化

5/  最後下薯仔件及紅甘筍件慢火煮10分鐘便完成

＊因薯仔件及紅甘筍件已預先蒸熟； 不用煮太久否則汁會過濃稠

清甜滋潤 - 青紅蘿蔔粟米馬蹄瘦肉湯

 年輕時最增討厭飲熱嘢； 對湯水非常抗拒！ 隨住年紀增長， 竟然愛上飲熱湯。 

呢排天氣凍凍哋，時乾時濕好容易病！
飲碗熱湯真係成身暖哂㗎！ 自己煲足料無味精， 點都好過出去飲例湯嘅！（雖然我最鍾意， hehe）！

今次呢煲青紅蘿蔔粟米馬蹄瘦肉湯； Owen話煲湯時聞到臭屁， 笑死😂！ 不過飲落口就清甜滋潤， 連D渣都好食㗎！

做法超簡單； 豬肉出水沖淨瀝乾；全部材料加水煲2個鐘左右， 加適量鹽調味就飲得！ 超易無難度！

材料: 青、紅蘿蔔、粟米、馬蹄、瘦肉、南北杏、蜜棗