Owenmama's Kitchen

2015年1月14日星期三

鹹雞脾溏心蛋菜飯

過去一星期一家人輪流病冇乜入厨，Owen話好恨食菜飯，琴日見好D就煮比佢食，加隻鹹雞比同溏心蛋，一人一份，加碟清菜，就成為週日晚餐。

其實功夫不太多，但就好美味!

菜飯

材料：

小棠菜半斤(切粒)/ 薑汁酒 (薑蓉一茶匙 +紹酒3/4 湯匙) / 糖，鹽各1/2茶匙 / 珍珠米 (6碗飯的份量)

1) 下小許油燒熱下菜粒兜炒, 下薑汁酒下鹽, 糖各調味，炒至菜8成熟，盛起隔汁備用

2) 米洗淨加雞湯+清水(比例為 2:1)，亦可隨意調教雞湯同水的份量。也可只加清水　（雞湯份量越多則越濃味）

3) 當飯煮至熟前1-2分鐘，便可加入菜粒，快手拌勻，蓋起繼焗1鐘便完成。

**不要焗太久，否則菜黃了影響賣相，也會太淋

鹹雞脾

材料：

新鮮雞脾3隻
四季鹽焗雞粉半包
鹽1/4茶匙
花雕酒2湯匙 (後下)

1)雞脾洗淨，用刀將多餘的黃油去掉

(你睇3隻脾都有好多油架)

2) 徹底抹乾，在骨邊"介"兩刀，灑上鹽吸雞粉醃最少3小時

3) 蒸前30分鐘下花雕2湯匙抹勻，蒸15分鐘至熟透

糖心蛋

我用左呢個方法好多次，從未失敗過，大家都試下：

1) 用小煲將水煮至大滾，水要高過全部蛋半吋

2) 大火煮至水滾，將室溫蛋輕力投進 (蛋要從雪櫃取出最少3小時，否則會易爆)，轉中火煮5分半鐘，最好用計時器, 期間不要蓋上煲蓋

(水滾後頭一分鐘，用筷子輕輕攪動雞蛋，可令蛋黃固定在蛋的中央）

3）撈起雞蛋，放在冷水中浸至冷卻便完成！

**時間按蛋大小調節一下

**不同爐具火力不一，最好先做一次，查看結果，作下次準則

2015年1月8日星期四

蜜汁烤豬背骨

一家三口元旦晚餐的主菜，睇落好似好大件，但係其實骨多肉少，仔仔一個人可以食到一條。三口子清哂檯上食物都唔係好飽，兩父子好齊心咁話下次份量要加碼添。

係急凍豬背骨，平時我會在吉之島或Apita特價時買，減價平均50蚊條。今次在杏花邨Fusion買，55蚊條。記住選肥D的，焗起嚟會香D同唔會咁乾呀。

呢個喺自家食譜，用中式醃法容入西式菜式，呢個版本都好成功。

食譜：

豬背骨1件 (每件11枝骨)

醃料：

生抽4湯匙，老抽1湯匙，糖2湯匙，玫瑰露酒2湯匙

掃料：

3湯匙麥芽糖 +3湯匙醃料，隔水座溶成掃料

做法：

-豬背骨隔夜解凍，徹底洗淨，抹乾，再肉上用叉刺上很多小孔, 及在底部的骨與骨之間的膜切坑紋（可令醃料滲進），如有血水要擠出。

-用大焗盤中放豬背骨, 淋上醃汁，用手抹勻，確保底面都均勻沾上醃料，最後把多肉的一邊向下，再淋上醃汁, 確保骨膜間的坑充滿汁料，再用保鮮紙封好，最少醃一夜 (如可以醃兩日更理想), 中途反一兩次

-焗前兩小時取出回溫, 將骨反轉，肉向上，將盤底的汁再塗抹一次在上面。，

-焗爐預熱220度，焗盤鋪上錫紙，將豬骨放在上面焗20分鐘，開爐門，在骨上掃一層掃料，再焗5分鐘，開爐門，再掃一層掃料, 於5分鐘後再重複一次此步驟。最後將爐溫升至250度，再焗約5分鐘，焗骨邊微焦及熟透便可出爐。

-出爐後立待豬背骨靜止休息5-10分鐘，不要即刻分切, 等肉自己吸回肉汁先切開。

**我全程約焗35分鐘便完成，因個別爐溫有差別，初次要自行觀察調節。

**用BBQ醬佐食好有美式風味㗎。

2015年1月5日星期一

廚餘利用 - 臘腸粒炒飯

琴晚得我一個人食飯, 用前晚食剩的碗多飯同大半條臘腸，一棵蔥，仲有雪櫃內的1/3個洋蔥，加隻蛋就成為呢個美味嘅炒飯 , 即係除咗蛋，全部都係廚餘或剩餘物。做個一人前炒飯啱啱好。最重要都係個句，食得唔好浪費呀。

材料：
已蒸熟臘腸3/4條雞蛋一隻打散冷飯一碗半洋蔥1/4個切粒備用蔥花隨意糖，鹽各1/2茶匙

洋蔥，臘腸，蔥切粒，蛋打散備用

易潔鑊下一茶匙油，爆炒洋蔥及臘腸粒，至洋蔥變為半透明（期間臘腸會出點油，所以油不用下太多）

下冷飯，用鑊鏟把飯粒弄散，下糖，鹽炒勻

鑊中弄開一個空位，下一茶匙油，下蛋漿兜炒

最後下蔥花兜勻便可上碟。

2015年1月4日星期日

X'mas cup cakes - mousse & cream cheese topping

Cupcake 好靚，但我好怕butter cream 好heavy, 今年為Owen school party做的30個cupcake除左之前試過的的chocolate mousse topping, 仲加左粉紅同粉綠的cream cheese topping, 等同學仔多D選擇. 兩個都係Owenmama 自創的配搭，結果唔錯呀，其實好多甜品的食譜可以自由配搭組合，做出新鮮自家版本，咁先係烹飪最有樂趣同滿足感嘅地方。

PS. 同時做法種，要不停洗用具, 多謝老公不停幫我洗用具，吾係一定冇咁快完成呀!

可做約15個2吋杯子蛋糕

乾材料：
中筋麵粉(All-purpose flour)200g
可可粉25g
發粉1茶匙
梳打粉3／4茶匙
砂糖190g
鹽1／2茶匙

液體材料：
暖牛奶或暖水240ml
牛油溶液75g

做法：
1）乾材料的粉類混合過篩在大碗內，加入砂糖，用手動打蛋器混合
2）加入液體材料充分混合字至順滑，確保冇粉粒
3）入杯， 5成滿便可，放入預熱170度焗爐，焗大約20-25分鐘,用牙籤測試，穿過蛋糕拔出是乾身的話，便可取出。
*放室溫攤凍就得

朱古力慕絲Topping:

黑朱古力 150 克
淡忌廉 370 克
冧酒 2 茶匙 (可省)
糖 60 克
魚膠片 6 克

1) 淡忌廉加糖打起(7分, 起紋便可）放雪櫃內備用（預留 3 湯匙）
2) 朱古力隔水座溶，加入冧酒攪勻備用
3) 之前預留的 3 湯匙淡忌廉隔水煮熱，放入已浸軟魚膠片，攪至完全溶化，倒進朱古力槳中，充份混合，
4) 加入打起的淡忌廉混合成慕絲糊 , 入袋

5) 雪約20分鐘至慕絲或開始凝結, 便可用作唧花。

**要快手，否則慕絲會因手的溫度溶化。

芝士Topping：

忌廉芝士250G
淡忌廉220G
糖80G
魚膠3片（15G）
水3湯匙

1）忌廉芝士室溫放至軟化，加糖打成滑身
2）魚膠片用凍水浸軟，加水，隔水座溶備用
3）淡忌廉打至起紋（6成）
4）魚膠水加入芝士醬中混合，再加入淡忌廉攪勻
5）將芝士餡分成兩份，分別滴入食用色料攪勻便可入袋
5) 雪約20分鐘至慕絲或開始凝結, 便可用作唧花。

**要快手，否則芝士餡會因手的溫度溶化。

**因為做 cupcake不同做蛋糕，topping內魚膠的比例會略減。