2014年1月5日星期日

自製海南雞飯




老公成日話我前世一定係一條虫,仲要係被雞啄死o既,所以佢係我o既天敵,就算成日食都唔會厭。 

老公呢排隔一兩日就話想出去食海南雞飯,但係一路都去吾到,琴日專登買定隻雞醃定,聽日整個自製版比佢食。  隻雞要提早一日用鹽同酒醃定至好味,就好似我以前整o既酒香雞一樣,不過呢次係浸熟而唔係蒸熟,加埋自製雞油飯,真好味。 老公話以後唔駛出雞食海南雞飯啦。  

海南雞做法 :

冰鮮三黃雞 (要黃油雞,我買的是較大的

*新鮮雞更好,不過我附近街市無鮮雞檔。

1) 徹底解凍,洗整,完全抹乾,以2湯匙幼鹽擦勻全身內外,再用1 1/2湯匙花雕酒 + 1/2湯匙玫瑰露塗勻雞內外,再把數片拍扁的薑片放入雞肚內。 以保鮮紙包好放入雪櫃醃至少醃12小時小時,但臨煮時提前一小時把雞由雪櫃拿出,稍為回溫。

2) 以面蓋無洞的大煲燒一煲水,加數片薑,要足以蓋過全雞,水大滾後下雞(雞肚向下),蓋上煲蓋,轉小火(不用待水滾)5分鐘,再熄火焗45分鐘(其間絕不能開蓋)

3) 把雞撈起,立即放入冰水中,使皮收縮。

4) 把雞掛起風乾若3小時,視乎當天濕度,至表皮乾爽和出現油光,斬件前掃小許麻油,便可斬件上檯。


**如雞較小則要相應減少醃料份量和熄火之後焗的時間。

原來精髓係最後將雞吹乾的步驟,吹香左o既雞真係會好似酒樓食到的一樣,真係好有雞香架。

****************************

油飯做法:




燒熱鑊下雞油,迫出油份,再下蒜+薑片爆至金黃,撈起備用(鑊剩下油),雞油渣棄掉。   將以洗淨,擎水的米下鑊炒香,再下適量雞湯。 把米和湯轉到飯煲,再把之前爆香的薑+蒜舖上,煮熟便成甘香雞油飯。  

*我用左珍珠米,3杯米約用3杯湯,不過每樣米受水程度不同,要安自己經驗條節。
*真正海南雞油飯要落好多香料同椰漿,但我個人覺得咁已經好好食,又方便添。  







20 則留言:

  1. 回覆
    1. 睇落好多,但做落又吾係咁覆雜,因為風乾時同煮飯都係等時間,落手做吾係好多野^^

      刪除
  2. 其實都唔算難, 係比D時間等佢乾啫..等我下次都試吓.

    回覆刪除
  3. 隻雞斬得好正! 我就學極都唔識..

    回覆刪除
  4. 喺我屋企應該都唔可能做到吃乾隻雞呢步, 因為囝囝哋會等唔切, 見到隻雞會即係要食.

    回覆刪除
  5. 好肥美嘅海南雞呀,我呢度啲雞係白色皮,整好都無你啲咁靚。

    回覆刪除
    回覆
    1. 隻雞吹乾前無咁黃,乾左會深色左。 但係你無黃油雞就無呢個效果了。

      刪除
  6. 第一次發問,請問個醬點整??

    回覆刪除
    回覆
    1. 呢個係我護亂整的版本。我用左1隻指天椒(連埋D子已經好辣),所以加左D紅甜椒肉(唔辣)要黎加色,3粒蒜肉(切粒),兩個青檸汁加4-5茶匙砂糖(視乎大小,較o岩甜味就得),1茶匙魚露。

      刪除
    2. 勁呀, 我好想學呢個餸, 多謝你的回覆!!!

      刪除
    3. 唔好客氣,整左話我知呀。

      刪除
  7. 哈哈,咁講法,我前世都應該係一條蟲,我都一樣對於雞係食極不厭。海南雞一定要試下整先得~~

    回覆刪除
  8. 我最鐘意食海南雞飯碗雞油飯... 正啊~~

    回覆刪除
    回覆
    1. 係啊,老公食到一粒都無剩呀,仲一路食日路話正呀。 

      刪除