美味的焦糖脆脆戚風 (crunch cake)

本來對現時鬧得熱烘烘的美心天使蛋糕沒甚興趣，因為覺得好似好單調咁，但上星期三雀友生日聯歡友人送上呢個蛋糕，試過的確係正喎，蛋糕本身好清香，不太甜，配焦糖脆脆食簡直係一絕。唯一小缺點就係面頭ｄ忌廉厚左少少。

琴日去左Sogo買銀包，跟住就戚起條根上去”心甜烘焙”睇o下有無粟膠賣，又有喎，o係網上跟左Shirley (sina)的食譜整 ，得左!!  真係好多謝佢無私的分享呀。

Shirley的 blog是 Sina的, 引用唔到，不過好多網友想知到食譜，希望佢唔介意我舖出黎喇（在此再三鳴謝）http://shirleyliving.mysinablog.com/index.php?op=ViewArticle&articleId=1413827

最難最難都係抿忌廉o既工序，又要唔厚，又要平滑，真係唔易，加上戚風模有小小斜邊，更添左難度。 今次唔算成功，不過我會加油，再接再勵，因為呢個蛋糕真係太美味啦。

梅菜肉鬆蒸豆腐

百x豆腐係我唯一會食的豆腐，因為佢好滑，好似豆腐花咁，有唔會好似傳統豆腐咁太重豆味，係咪好矛盾，食豆腐竟然要食少豆味的!!  

講返呢個菜上面係梅菜炒肉鬆，預先整整好，其實就咁訴可以當一個餸, 但係我就喜歡將佢舖o係百x豆腐上，再一齊蒸10分鐘（當然要倒左ｄ倒汗水先），再o係碟邊淋上加左糖調味的豉油，就係一個一濃一淡的最佳配搭啦。  我足足有成年無整過呢個餸啦，今晚呀爸呀媽過黎食飯，整呢個最o岩老人家，佢地好鐘意。　見佢地食得開心，我就充滿力量啦。

自家食譜：

材料 ：甜梅菜一棵   /  $10半肥瘦豬肉(攪碎)

1)      梅菜洗淨，浸兩小時，搾乾水，切粒，用小許糖，生油撈勻，備用

2)      豬肉用糖，粉，生抽，油醃好備用

3)      豆腐離盒放再碟上約半小時(倒去流出的水份)

4)      梅菜先下獲，炒一會，下豬肉，炒至半熟

5)      下調味 (老抽，生抽和糖) 炒至豬肉熟透，試味，

6)      調到合適自己的口味就下小許生粉水，令材料黏在一起，有黏性，不散開

7)      將梅菜豬肉舖在豆腐上，大火蒸10分鐘，倒去部份倒汗水(只留小許)，再淋上以糖調味的生抽便可上桌。

美味簡易焗雞 (附食譜)

上星期黃太請我食飯，用焗爐整左隻五香粉燒雞，味香，又唔油。　不過我唔係好鐘意五香粉，所以o係佢啟發下，用鹽焗雞粉整左另一個版本。

反正琴晚得我同阿B 兩個食飯，簡單地整左個焗雞再加個炒雙蔬 (炒芥蘭＋合掌瓜片)就一餐。

材料：

已溶雪冰鮮雞一隻 (選較小的)

醃料：四季鹽焗雞粉一包  +   鹽1/3茶匙 + 1茶匙五香粉  (混好)

-雞洗淨，抹乾，用醃料搽勻，醃最少2-3小時 (不要搽太厚，薄薄搽一層醃料便可)。

-焗爐較250度預熱15分鐘

-用一湯匙油抹勻雞身，入爐焗30分鐘

*如焗爐有旋轉燒雞配件，就更方便。

本來我個焗爐有配件可以整旋轉燒雞，但係當時無諗過會整，嫌阻地方就掉左，所以要將隻雞剪開先焗。

士多啤梨瑞士卷

今似係咁大個女第一次整瑞士卷，我跟左為食貓 "bees" 制作 的食譜 ，一d都唔難，仲好軟熟添。 　本來想落街買芒果，但係發現屋企雪櫃仲有半盒韓國士多啤梨，都係用埋佢先啦。

成個過請都o係預算之內，唯一出事就係：  我係用牛油紙墊住蛋糕放o係隔壽司籍上面卷， 一路卷一路順勢用牛油紙包住個卷蛋，扭埋兩邊收口，再將入雪櫃， 雪凍之後，一撕開，登，登，登，凳........  成個蛋糕d皮就疵晒o係張牛油紙常上面，咁，佢就由啡色變成而家o既淡黃色啦，直情好似係換膚一樣呀。

不過真係錯有錯著，大家睇o下個slide show就會發現個但糕攤凍後又d皺皮，唔係咁靚，反而甩左個表皮仲靚得多添。

迷你紐約芝士蛋糕 (已加食譜)

上星期整o係百佳買料整芒果蛋糕個時，見到sour cream 減價就買左一盒，今日到期。琴晚就"乍乍林"用佢黎整New York cheese cake.  今次試用2.5吋mousse ring黎整，六吋食譜可以整7個。  一人一個，唔駛切，仲方便。 我用蛋糕紙杯包住，可以就咁拎住黎咬，直情連叉同碟都可以慳返添。

Ha, 唔知點解自從專左呢個爐，就焗唔到以前金黃食o既 New York Cheese cake 呢，焗到升高晒都唔轉食。 雖然一樣味道，但係啡啡地會靚d，等我再研究下點解先。

材料 ： 6吋1個　　　或 2.5吋慕絲圈７個

消化餅   ４pcs               牛油      35g

忌廉芝士       250g                糖    80g          酸忌廉     60g          

蛋            1隻        

1) 於模邊掃牛油和灑高根粉，消化餅壓碎，拌入已溶牛油，舖在模底 , 用錫紙包好底部，以免入水

2)      焗顱預熱170度

3)      忌廉芝士於室溫放軟，加糖打至滑身，再加入雞蛋拌勻，不要拌太久

4)      加入酸忌廉拌勻便可倒入模中。

 

5)      用坐水法，水要起碼3/4吋深，焗約半小時，

6)      倒去水份，再焗約15分鐘便成。

＊＊個人經驗，焗好要放涼再雪凍先脫模會靚D架。