冰鎮芥蘭

超簡易冰鎮芥蘭

好耐之前睇"肥滔"o既飲食節目介紹過呢個菜式，已經覺得會唔錯，呢排芥蘭當造，就立即試ｏ下。

只需將芥蘭莖灼至剛熟，過熟就唔爽脆,（昨天的芥蘭只有尾指粗，所以大火滾分幾鐘就得），立即撈起放冰水中冷卻，再撈起，抹乾，放雪櫃中雪數小時便可用日本豉油＋芥辣佐食，係酒樓食會用碎冰冰鎮上檯，但屋企食就唔駛啦，但係一定要夠凍先似樣。

做o既時間只係數分鐘，就整出呢個口感好清新，好甜o既菜式。 菜都可以當刺身食，真不錯呀。

**灼芥蘭ｏ既熱水要加小許油，鹽同糖。

**剩下o既菜葉唔好浪費，我買左d魚片頭一齊滾，咁就多個上湯芥蘭魚片頭啦，一菜兩食，ok架。

自家製全日宴

上星期日初次成功整左銀雪西京燒之後，心思思想整個全日本菜餐，星期三終於有機會完成，菜單：

1. 蜆肉茶碗蒸
2. 大蝦/南瓜天婦羅
3. 銀鱈魚西京燒
4. 冷烏冬
5.　韮菜花

星期一醃定銀雪魚，星期三食就剛好喇。 點解食得咁密？全因星期日第一次整，一檯１０人食４片魚，原來唔係好夠，所以我同老公只係食左一，兩啖，，所以老公要我盡快再整，佢今次要盡情食喎。　呢餐既份量，如果出去食一定唔少錢， 自己整又平又可以食到夠，老公同Owen老公好滿意呀！　

豆豉鯪魚油麥菜

呢個係我最鐘意食o既蔬菜類菜式，不過o係外面食就好肥膩，自己o係屋企煮就會健康ｄｄ，但係味道一樣咁好，仲可以整好大碟，食到夠晒喉添，送飯仲一流添。

材料：

油麥菜１斤半，切段，菜頭切片

豆豉鯪魚一罐，魚肉剪成塊狀 (罐內的油只留 1/3)

紹酒一湯匙

雞粉 1/2茶匙

1)      燒熱鑊下豆豉鯪魚連油爆香(不用另外加油)

2)      下菜兜炒，在鑊邊贊酒

3)  蓋上鑊蓋焗30秒

4)  下雞粉調味，兜炒至菜全熟便好上碟

真係好簡單架，如果你屋企人都鐘意出街叫呢個餸o既話，快d試o下整比佢地食，包佢地加你分架。

**一罐豆豉鯪魚剛好整到斤半菜 ，唔係就會太多魚，如果少人食，全部材料就按比例減少，不過多左o既豆豉鯪魚就會浪費。