糯米釀雞翼

公司今年好好，年卅放全日假，於是今日全家黎我屋企團年。

今年同哥哥，媽媽一人整D，我只負責其中五味，所以決定整幾味較精美嘅菜式招呼佢地。而家介紹其中一味係糯米醸雞翼。

早一日去筲箕灣買定黃油冰鮮翼，夜晚去骨同用鹽醃內外放入雪櫃，再浸冬菇同糯米，第二朝9點多就起左身，因為呢個真係功夫菜，　預計蒸飯，炒飯，釀，風乾，加埋要大半日先得，本來唔駛咁早起，不過我擔心今日天氣潮濕，所以要預多d時間風乾，唔係就唔會脆口。   

上次整已經係幾年前，耐到家人都吾記得我整過，佢地對呢個餸讚口不絕，只要佢地欣賞， 過程幾覆雜都無所謂啦。

材料：

炒糯米飯一份（米半斤，做法跟youtube高師傅video)

雞全翼12隻（切去雞鎚，用較剪小心去除中翼中的骨） 

1） 雞翼抹乾，用小許鹽醃內外最少1小時

2） 釀入已凍的糯米飯，用牙簽封日

3） 掃＂上皮汁＂(用2茶匙蜜糖，3/4茶匙白醋，2茶匙水開成）

4） 吊起風乾至表面乾燥（因琴日潮濕，用左7小時才至理想乾度）

5） 小火燒熱油，下雞翼炸至表面微黃，撈起，大火燒滾油，下雞翼返炸至香脆微啡色撈起

6） 用廚紙抹索去多餘油份便可上碟

紐約芝士蛋糕

上星期四為好友Joey慶生，為佢做左人見人愛ｏ既紐約芝士蛋糕，加埋藍莓醬裝飾同時又可以減輕油膩口感，簡約，精美靚又好味呀！


食譜：      7吋1個　　(圓型甩底模 )

材料 ： 

餅底：  

消化餅   8pcs      牛油 60g

芝士糊：

忌廉芝士  500g             糖 140g          酸忌廉     120g           

全蛋 1隻        蛋黃1個

做法：

1)      於模邊掃牛油和灑麵粉，消化餅壓碎，拌入已溶牛油，壓平舖在模底 , 用錫紙包好底部，以免入水，放雪櫃半小時.

2)    焗顱預熱180度

3)   忌廉芝士於室溫放軟，加糖打至滑身，再加入雞蛋拌勻，不要攪拌太久, 混合便可

4)   加入酸忌廉拌勻便可倒入模中。

5)   用坐水法，水要起碼半吋深，焗約35 - 40分鍾至表面乾燥(要不時查看，以防過火）

6)   倒去水份，再焗約10分鐘至表面微黃便完成 

7)   出爐，攤涼, 雪過夜，脫模，再按起好放上酸忌廉或藍莓醬裝飾便完成  

     （除裝飾，亦同時減銷肥膩口感）

墨魚滑蒸釀豆腐

上星期一連三餐團年加慶生飯聚，食到好膩呀。琴晚一家無去街，就整返ｄ清淡菜式清下腸胃。呢味係仔仔提議ｏ既墨魚滑蒸釀豆腐，清淡又易整，一合豆腐剛好三人份量。

材料：

盒裝蒸煮豆腐　１盒
墨魚滑　３兩　（＄２０　現成的，街市某些海鮮檔有售）
生粉小許


汁料：　

滾水 1 湯匙+糖 3/4湯匙攪至糖溶化，加 生抽 2.5 湯匙
         
*(不同品牌生抽鹹度不一， 糖份量好按個人口味加減)
*一般人會贊熟油才上桌，但我想健康d，所以無咁做，改為用滾水溶糖，再加生抽就ok。


做法：

１）　豆腐切成６件，　用小匙在頂部挖去小許（約２ｍｍ深）成一個茶匙般大小的橢圓形淺洞。

２）　在洞上灑上一層薄薄的生粉

３）  釀上一粒橢圓形的墨魚滑

4)   隔水蒸10分鐘，小心的倒去倒汗水，最後淋上汁料便完成。

日式茶碗蒸

五分鐘的準備工夫，就可以做到做似樣o既日式茶碗蒸，佢o既日式風味，係來自鰹魚汁，只要加一湯匙，就會同你o係餐廳食到o既差不多喇。 

琴日同Ｏｗｅｎ兩個簡單地整個燒花魚定食，小油又好味呀。

日式茶碗蒸做法如下：

-蛋同雞湯比例為 1 : 2.5 (即100ml蛋加250ml 雞湯）雞湯份量內包括1湯匙(量匙)鰹魚汁

-先打散蛋，再下雞湯攪勻，過篩再倒入茶碗

-中火火蒸8分鐘（蒸的全程要蓋上碗蓋，如無茶碗，用錫紙蓋面就唔會有倒汗水喇)。

**如做普通蒸水蛋側不用下鰹魚汁

**蒸的時間按容器大少及爐具火力自行調節

韓弍牛肋骨煲

阿仔出去食過一次韓國牛肋骨煲就愛上，今日照舊留家伴讀，見大把時間就去買鮮牛坑腩試整 ，胡亂用企有的調味料做左自家版本，阿仔話似到十足十，咁識Tum阿媽，抵我比心機整嘢比佢食。

新鮮牛坑腩一斤（切件)
冬菇六粒(浸軟)
洋蔥一個(切塊)
白蘿蔔（小）一個（切件)
紅蘿蔔一個（切件)

調味料:
生抽四湯匙
味醂二湯匙
冰糖一粒
水適量

-牛腩出水十分鐘，撈起放入另一煲內，加入適量水，加入調味料煮滾，轉小火，蓋上煲蓋炆45分鐘，熄火焗15分鐘
-加冬菇及洋蔥，再細火炆30分鐘，熄火焗15分鐘（如水蒸發便要補充）
-加入紅，白蘿蔔，加水份到幾乎蓄過所有料，小火炆40分鐘，試味，如需要用生抽／糖較到合自己口味便完成。

**我用LC鐵煲，蒸發水份較慢，用的水份比用一般煲為少，炆的時間都會短D。請留意。
**韓式牛肋骨煲口味較甜，但最重要係較啱自己口味。

Sawadee 泰全餐 （１） － 南瓜椰汁布丁

呢排Owen仔要為DSE mock 準備，所以黎緊o既星期六，日除左必要o既團年飯外，都會倍佢留o係屋企閉關。   呢d時候，正好有幾會比Owenmama 於廚房攪足一日。

星期六食左西餐，燒豬背骨 + 朱古力梳乎厘， 琴晚老公就話好奈無食過咖哩魷魚，就咁就索性整個個全泰餐喇。

首先整左個甜品先　－　南瓜椰汁布丁

＊＊事先聲明，Owenmama　呢個甜品並非正宗泰式，只係按自己喜好mix & match, 正宗的南瓜布丁係蒸熟同埋有蛋ｏ既，不過我覺得呢個配搭ｏ岩我ｄ，同有ｄ泰菜ｆｅｅｌ嗟。


做法：
南瓜處理：

小南瓜2個，直徑約３吋，切去頂部留用， 用尖刀沿圓周刺穿頂部，向下按，再刮去瓜囊 (見下圖)，蒸１５分或至熟透　(因南瓜大小及生熟度調節， 以用長簽可以輕易刺過頂部黃色厚肉部份為ok)，攤凍，用廚紙索乾內步水份備用

椰汁布丁：

脫脂奶100ml + 椰漿200ml + 糖30g（可按口味加減) 煮熱至糖溶化， 加入 魚膠片1 3/4片(先用冷水浸軟)， 輕力攪拌至魚膠完全溶化， 過篩，稍為攤涼至微暖

-把布丁漿倒入已冷卻的南瓜內，待布甸漿完全冷卻後方入雪櫃，雪約5小時便成。


因為想要做到切到一件件，所以個布典ｏ既魚膠份量要較一般布甸重手，結果效果果然如預祈一樣。椰汁布甸同蒸熟左ｏ既南瓜好襯呀。

唔好睇佢細細個呀，一個可以切開6件架，賣相靚有好味，不防一試呀。

朱古力梳乎厘

琴晚食豬背骨餐，可能骨多肉少，飽飯冇幾耐Owen 就話口痕，見佢呢排為考mock口溫夜溫，就整左個簡易甜品比佢食，反正口感似泡沫咁輕，加上星期六吾會早瞓，一人一杯冇問題。

一份五杯，仲有兩杯分比鄰居食，今朝佢地還杯時仲勁讚好味呀，攪到Owenmama好開心呀。

材料 ：

黑朱古力粒 40g砂糖 40g 
水 40g
可可粉 20g
蛋白2隻

做法：

1)  杯內塗少許牛油及均勻沾上一層砂糖砂糖備用。

2）將朱古力隔熱水座溶，加入水和篩過的可可粒，攪拌至無粉粒，攤涼備用。

3）蛋白分兩次加入砂糖打至打至企身，分三次與（2）輕力混合。

4）將（3）倒在杯內，約8成滿便可（我呢次倒少左，多D會升高D）放入預熱180度的焗爐焗約13-15分鐘或至充分升起便可出爐

5）出爐後快手灑上糖霜裝飾 （否則會因冷縮熱脹而下沈）

簡易烤豬背骨 (肋骨)

星期四老公來太古城同我食午飯，行吉之島時見到豬背骨做特價，好靚仔，有好肉，兩pack共一公斤都係買$55，就買咗兩件返屋企整。

第一次整相當成成，老公同仔仔食到手指要吮埋呀！

今次用最簡單嘅醃料，只係要係焗嘅途中掃幾次糖漿，就可以做出美味又好樣嘅烤背骨。

食譜：

豬背骨兩件（約一公斤）

醃料：

生抽四湯匙，老抽一湯匙，糖兩湯匙，玫瑰露酒兩湯匙

掃料：

3湯匙麥芽糖 +1.5湯匙，隔水座溶成掃料

做法：

-豬背骨隔夜解凍，徹底洗淨，抹乾，在底部的骨興骨之間的膜切紋（防止過分收縮），如有血水，心要按凈。

 -用大盤中放豬背骨，淋上醃底，用手抹勻，確保底面都均勻沾上醃料，最後把多肉的一邊向下，再用保鮮紙封好，最少醃五小時，醃過夜更好。

-焗前兩小時取出回溫，

-焗爐預熱220度，焗盤鋪上錫紙，放上一個小架，將豬軟骨放在上面焗二十分鐘，取出掃一層掃料，再焗二十分鐘，其間最好多掃一，兩次掃料，熟透後再焗骨邊微焦便可出爐。

**時間按骨厚薄自行調節。

-出爐後立即多掃一層掃料，及待豬背骨靜止休息5分鐘，不要即刻分切,  等肉自己吸回肉汁先切開。

自製海南雞飯

老公成日話我前世一定係一條虫，仲要係被雞啄死o既，所以佢係我o既天敵，就算成日食都唔會厭。　

老公呢排隔一兩日就話想出去食海南雞飯，但係一路都去吾到，琴日專登買定隻雞醃定，聽日整個自製版比佢食。  隻雞要提早一日用鹽同酒醃定至好味，就好似我以前整o既酒香雞一樣，不過呢次係浸熟而唔係蒸熟，加埋自製雞油飯，真好味。 老公話以後唔駛出雞食海南雞飯啦。  

海南雞做法 ：

冰鮮三黃雞 (要黃油雞，我買的是較大的) 

*新鮮雞更好，不過我附近街市無鮮雞檔。

1) 徹底解凍，洗整，完全抹乾，以2湯匙幼鹽擦勻全身內外，再用1 1/2湯匙花雕酒 + 1/2湯匙玫瑰露塗勻雞內外，再把數片拍扁的薑片放入雞肚內。 以保鮮紙包好放入雪櫃醃至少醃12小時小時，但臨煮時提前一小時把雞由雪櫃拿出，稍為回溫。

2) 以面蓋無洞的大煲燒一煲水，加數片薑，要足以蓋過全雞，水大滾後下雞(雞肚向下)，蓋上煲蓋，轉小火(不用待水滾)煮5分鐘，再熄火焗45分鐘(其間絕不能開蓋)。

3) 把雞撈起，立即放入冰水中，使皮收縮。

4) 把雞掛起風乾若3小時，視乎當天濕度，至表皮乾爽和出現油光，斬件前掃小許麻油，便可斬件上檯。

**如雞較小則要相應減少醃料份量和熄火之後焗的時間。

原來精髓係最後將雞吹乾的步驟，吹香左o既雞真係會好似酒樓食到的一樣，真係好有雞香架。

****************************

油飯做法：

燒熱鑊下雞油，迫出油份，再下蒜+薑片爆至金黃，撈起備用(鑊剩下油)，雞油渣棄掉。   將以洗淨，擎水的米下鑊炒香，再下適量雞湯。 把米和湯轉到飯煲，再把之前爆香的薑+蒜舖上，煮熟便成甘香雞油飯。　　

*我用左珍珠米，3杯米約用3杯湯，不過每樣米受水程度不同，要安自己經驗條節。

*真正海南雞油飯要落好多香料同椰漿，但我個人覺得咁已經好好食，又方便添。  

露筍火腿雞卷

琴晚玩得太夜，今日冇乜精神，諗住買幾件雞扒整日式親子丼就算，見到街市有大露荀賣，就改為整Owen成日都叫我整嘅露荀火腿雞卷。呢個配搭係Owenmama自創嘅，吾油膩又好味，配意粉就最啱了。

賣相好睇又好味，但係一ｄ都唔難整，啖啖肉，係另類o既老少平安。

   材料(一人一件份量)：

1)   雞扒一件，去皮，兩面灑上幼鹽抹勻備用 (至小醃20分鐘）

2)   雞扒放微波爐保鮮紙上，舖上一片火腿，再放上露荀段（事先拖水至半         熟）

3)   卷實成香腸狀，將保鮮紙兩邊卷實，再封錫紙

4)   將雞扒放滾水中煮慢火煮10分鐘　（時間按雞扒大小調節）

5)   離火攤10分鐘待定型後撕去錫紙和保鮮紙，吸乾雞肉上的水份 

6)   用平底鑊燒熱油， 煎香雞卷表面便可切開上碟。

          

簡易花膠扒時蔬 (附發花膠方法）

屋企人都愛食花膠，前幾年都會買大隻的花膠炆比佢地食，不過花膠一年貴過一年，十吋大
o既花膠要幾百蚊一隻。  今年買左d五吋長的小花膠，經濟好多，而且發o既時間亦短左好多，一斤裝可以食好多餐呀。

大型花膠製作方法請按此

小型花膠-做法見下 ：(未發時約5吋長)

 

1) 花膠用清水浸至呈白色(數小時）。　再用薑蔥水+花雕酒細火煮至10分鐘(時間視乎花膠厚薄，）撈起，浸十分鐘冰水，用水浸著放入雪櫃普通格一夜 (老闆教的)。   

 **有D花膠上會黏著些啡色黏物，要徹底清理或切去。

 

2) 花膠隔水後切件，先用雞湯慢火煮至花膠淋軟(雞湯份量不用太多)，倒去雞湯，加入適量即食鮑魚汁（我用了約半枝）再煮滾淋在菜上（可用生菜，豆苗或西蘭花）便可上檯

＊＊鮑汁我用美ｘ盞的，本身都杰杰地，不用埋芡，　
＊＊花膠汁較濃味不要緊，因淋在菜上會出水，汁會稍微變稀。