醉鮑魚

五一當日o係我屋企為我的Darling Daisy提早慶生，當日其中一味就係呢個醉鮑魚。

本來諗住清蒸，但係因為買左條石班，咁兩樣菜式o既味道就相撞左，反正朋友們未試過食醉鮑魚, 就將佢轉一轉，等佢地視下。　本來呢個菜要浸隔夜先最好食，好彩ｏ個日一早去左買，計下都有７個鐘頭浸，即管搏下。結果都ok喎，個個都話好食呀。

呢個餸大睇又好食，做法仲好簡單，不過因為買左15隻(約斤半)，擦鮑魚就擦到手軟。

食譜：鮮活九孔鮑魚(買較大的較好)
汁料： 醉雞汁，水，酒 (我用左花雕 + 玫瑰露 + 白蘭地)

1) 鮮活鮑魚用擦擦淨，用水徹底清洗
2) 燒滾一鍋水，水要浸過全部鮑魚
3) 下鮑魚煮約2分鐘 (不要煮過熟)
4) 撈起過冷河，再脫殼，再徹底洗一次
5) 將鮑魚排再大碗中，下調味汁 (酒和水按個人口味調較)，必要浸過鮑魚
6) 放入雪櫃浸過夜便可　

溫馨提示：**我用李x記醉汁，覺得佢較鹹，所以加左少少水調味
**酒的份量無準則，按自己口味調就ok，但要先下酒，試味後再下水，否則如果酒的份量多，再下水會太淡了。