預慶中秋 - 超美味斧頭扒

超美味斧頭扒

對上一次整斧頭扒已經係8年前； 星期六同老公去赤柱逛經過超市見澳洲斧頭扒大特價； 捆綁式特價要買2件,   計計吓每件回歸8年返前價位； 實在無法忍手!  

今次Owen要求生D， 正合我意........ 就5／6成熟啦； 切開嗰陣見到嫩嫩嘅粉紅色; 一家三口一齊 "嘩"  咗一聲；   肉滑嫩juicy； 加個Pizza, 薯菜;  兩父子見到件扒咁正超雀躍; 即刻要開枝香檳！ 咁呢餐就當埋做節喇！

做法： 

急凍斧頭扒1件 （約1100g， 2.5吋厚）
海鹽/ 黑椒隨適量
蒜數粒
油適量
牛油2湯匙

1）徹底解凍後開封， 用廚紙吸乾水份; 完件用隔網盛起放入雪櫃風乾數小時

2） 灑上海鹽、黑椒粒抹勻， 用錫紙包裹牛骨柄

3） 易潔鑊下3湯匙油、牛油1湯匙、蒜數粒， 大火煎封兩面扒面每邊約1.5分 (邊位也要煎封）

 

4)    將扒放在焗盤上， 放入預熱200焗爐，每邊焗9分鐘 (共18分鐘);   讓兩面均勻受熱

5） 將扒取出

6) 易潔鑊下2湯匙牛油及1湯匙油;  爆香蒜粒， 大火將扒兩面煎至香脆，每面1秒便可離鑊   (用牛油煎至微焦， 牛扒更有油香， 賣相更亮麗吸引)

**因鑊的弧度骨邊位置不能沾鑊； 可用火槍燒炙燒煎封骨邊。

 

7）將牛扒靜止10分鐘讓牛扒吸回肉汁便可切開食用。

Tips:  

**呢個係Owenmama的做法； 非正宗但簡單方便又效果唔錯；值得同大家分享

**提提大家唔好衝動見平就買；  一定要先留意焗爐夠大先得， 否則你要選購短骨; 可入到自己       焗爐的扒先好入手呀!

**呢個烹調時間約5成熟。    烹調時間請按牛扒厚度／個人喜好的生，熟度自行調節。

**記得補驟（7）提及將牛扒靜止10分鐘讓牛扒吸回肉汁便可切開； 否則肉汁會流失； 影響味道㗎！